Bakumpulan Duit gasan Urang-Urang Kudus ¹ Wayahini masalah bakumpulan duit gasan urang-urang kudus, diulah haja sasuai wan patunjuk-patunjuk nang kubariakan gasan jamaah di Galilea. ² Intang hari panampaian satiap minggu, asing-asing ikam manyisihakan sasuatu wan manyimpannya sasuai nang ikam dapat supaya jangan rahat aku datang hanyar diadaakan pangumpulannya. ³ Pas rahat aku datang, aku cagar mangutus buhannya, siapa gin nang ikam satujui, diimbaiakan wan surst-surst gasan mambawa pambarianikam ka Yerusalaem. ⁴ Wan, pabila parlu aku tulak jua, supaya buhannya tulak baimbai aku. Rencana Pajalanan Paulus ⁵ Tatapi, aku cagar mandatangi ikam imbah aku maliwati Makedonia lantaran aku pacangan maliwati Makedonia. ⁶ Wan, kamungkinan aku cagar badiam wadah ikam atawa mahabisakan waktu salawas musim calap supaya ikam kawa mangawani aku intang parjalananku, kamana haja aku tulak. ⁷ Sabab, aku kada mau malihat ikam wayahini hinggan sapintas lalu. Aku baharap badiam babrapa hari lawan ikam, pabila Tuhan mangijinakannya. ⁸ Tatapi, aku cagar badiam di Efesus sampai hari Pentakosta, ⁹ Lantaran lawang nang libar gasan manggawi gawian nang panting udah tabuka gasanku walaupun ada banyak nang kada satuju. ¹⁰ Wayahini, pabila Timotius datang, parhatiakan haja supaya inya kada marasa takutan pabila baimbai ikam lantaran inya malayani Tuhan, sama nangkaya aku jua. ¹¹ Jadi, jangan ada urang nang maanggap inya randah. Dangani inya intang parjalanannya wan damai agar inya kawa babulik wadahku. Aku mahadangi inya wan dinsanak nang lain di sini. ¹² Wayahini, manganai dinsanak kita Apolos, aku sangat maanjurakan inya supaya mandatangi ikam baimbai dinsanak-dinsanak nang lain, tatapi inya sama sakali kada mau datang wayahini. Inya pacangan datang amun ada kasampatan. Salam Panutup ¹³ Bahati-hatihaja, badirian haja nang kuat intang iman. Bakalakuanlah nangkaya lalakian wan jadilah kuat. ¹⁴ Barlah sabarataan nang ikam gawi, digawiakan intang kasih. ¹⁵ Aku manggasakikam, dinsanak-dinsanak, (ikam tahu bahwa sabarataan intang rumah Stefanus adalah buah-buah panampaian di Akhaya, wan buhannya imbah mangabdiakan diri buhannya gasa malayani urang-urang kudus), ¹⁶ supaya ikam jua tunduk wan urang-urang nangkaya ini wan tahadap satiap urang nang bagawi taimbai wan bajarih lelah. ¹⁷ Aku himung banar imbah buhan Stefanus datang, Fortunatus, wan Akhaikus lantaran buhannya imbah malangkapai apa nang kurang intang ikam. ¹⁸ Sabab, buhannya manyagarakan ruhku wan ruhikam. Oleh lantaran itu, hargai urang-urang nangkayaitu. ¹⁹ Jamaah-jamaah di Asia manyampaiakan salam gasan ikam. Akwila wan Priskila manyampaiakan salam hangat intang Tuhan gasan ikam, taimbai wan jamaat di rumah buhannya. ²⁰ Sabarataan dinsanak di sini mangirim salam gasan ikam. Sampaiakan salam satu wan nang lain lawan cium kudus. ²¹ Aku, Paulus, manulis salam ini wan tanganku sorang. ²² Pabila ada urang kada manyayangi Tuhan, takutuklah inya. oh Tuhan, datang haja! ²³ Anugerah Tuhan Yesus mairingi ikam. ²⁴ Kasihku mairingi ikam sabarataanintang Yesus Kristus. Amin