Kasih ¹ Amun aku kawa bapander wan bahasa-bahasa manusia wan bahasa malaikat, tatapi aku kada baisi kasih, aku nangkaya gong nang babunyi wan kaya canang nang bakucikan. ² Amun aku baisi karunia banubuat wan minandui sabarataan rahasia wan baalimu, wan amun aku baisi iman nang kawa mamindahakan gunung-gunung, tatapi kada baisi kasih, aku kadada baguna. ³ Amun aku mambagiakan sabarataan hartaku gasan mambari makan gasan urang miskin, wan manyarahakan awakku gasan dibakar, tatapi kada baisi kasih, sadikit gin kadada gunanya gasanku. ⁴ Kasih itu sabar wan murah hati, kasih itu kada camburu, kada baparagah, wan kada sombong, ⁵ kada maulah nang kada pantas, kada mancari kaparluan gasan sorangan haja, kada mudah sarik, kada mamparhitungakan kasalahan urang lain, ⁶ kada himung bila ada nang kadabaik, sabaliknya himung banar wan nang bujur. ⁷ Kasih itu tahan mananggung sabarataannya, mamparcayai sabarataannya, wan sabar mananggung sabarataannya. ⁸ Kasih kada bisa habis, Tatapi nubuatan pacangan kadada; bahasa-bahasa ruh cagar ampih; wan pangatahuan pacangan dilanyapakan. ⁹ Sabab, kita paham sabagian haja wan kita banubuat sabagian haja. ¹⁰ Tatapi, pabila nang sampurna datang, nang sabagian itu cagar dihilangakan. ¹¹ Rahat aku kanakan, aku bapander nangkaya kanakan, aku bapikir nangkaya kanakan, wan bahitung nangkaya kanakan. Imbah aku dewasa, kada lagi nangkaya kanakan itu. ¹² Lantaran wayahini kita malihat nangkaya intang caramin kada tapi jalas, tatapi kena kita bahadapan muha. Wayahini, aku hinggan pinandu sabagian haja, tatapi kena aku cagar pinandu sabarataannya. ¹³ Jadi, wayahini katiga hal ini nang tatap ada, yaitu iman, pangharapan, wan kasih; tatapi nang paling ganal dari katiganya adalah kasih.