¹ Ttö̧ja̧mä̧ i̧hui̧nä̧tö̧ Elim Ötahuiyättö, ja̧'hua̧ta̧'a̧nö̧ Israel ttö̧ja̧ ttö̧jo̧cu̧du̧nä̧ttö̧ ichinätö̧ Sin rȩjȩ de'a jui̧yä̧jä̧ra̧'a̧cu̧ttu̧'i̧nä̧, juȩnȩmä̧ ki̧'i̧pa̧'a̧ Ein rȩjȩttö̧ Sinaícu, to̧mu̧rȩ ji̧mu̧tȩ mo̧ro̧ pöi'omenä ta'are kä̧hua̧ jo̧mȩ ja̧u̧nu̧ o'ca'a Egipto rȩjȩttö̧ rä'opö ttichäji o'ca'a. ² O'catoi'öna Israel ttö̧ja̧ de'a jui̧yä̧jä̧ra̧'a̧ ttö̧jo̧cu̧du̧nä̧ttö̧mä̧ ttu̧ru̧hua̧ Moiserö huopinätö̧ ja̧'hua̧ta̧'a̧nö̧ Aaronrö̧'i̧nä̧. ³ Israel ttö̧ja̧ ppättinäu̧: "Huä̧i̧nä̧ totea'anä ja̧'a̧tä̧ toinado TÖ̧Ä̧NÄ̧HUA̧ ji̧yȩnö̧ pä̧nä̧ Egipto rȩjȩra̧'a̧ttö̧ idepä uriyu jäyä pȩji̧nä̧tö̧jä̧ pan'inä sutädi'önä cui'änätö̧jä̧. Ja̧'hua̧nö̧ ja̧'a̧nä̧ ucutu ja̧'a̧ ujuturu i'chächäjätömä de'a jui̧yä̧jä̧ra̧'a̧cu̧ ppäittö tote'iyätucuacu pä'ö." ⁴ Ja̧u̧nu̧ o'ca'a TÖ̧Ä̧NÄ̧HUA̧ Moiserö pä'inö: "ttötä jȩchä̧cua̧sä̧ mo̧ro̧jä̧ra̧'a̧ttö̧ pan ttähuäunä ucuturu. Ttö̧ja̧mä̧ rä'opö tottäcuotö ja̧'hua̧nö̧tä̧ ya̧cu̧pu̧nä̧ ttö̧ca̧ca̧tä̧cuo̧tö̧ mo̧ro̧ jö̧ ta̧'a̧nö̧ ttu̧cuä̧cuȩmä̧ ja̧'hua̧nö̧tä̧ ka̧cuä̧mö̧ to̧chä̧cua̧sä̧ isopäi'önä padinöta'anö tti̧'cha̧ pä'ö 'cho̧co̧tö̧cö̧. ⁵ Jua'amä jä̧cua̧'a̧ ji̧mu̧tȩ ya'atenö mo̧ro̧ pai'omenä, jahuätömä ttö̧ca̧ca̧tä̧jo̧mȩttö̧'i̧nä̧ abonänö jo̧mȩ ttö̧ca̧ca̧tä̧cuo̧tö̧ ja̧'hua̧nö̧ ca̧ca̧tö̧ dattäcuotö tti'chächijhimä." ⁶ Ja̧u̧nu̧ o'ca'a Moises ja̧'hua̧ta̧'a̧nö̧ Aron'inä pä'inätö̧ Israel ttö̧ja̧rö̧: "Ni̧pä̧ro̧mȩcu̧tä̧ cu̧huo̧juä̧cuo̧tö̧jä̧ isopäi'önä TÖ̧Ä̧NÄ̧HUA̧TÄ̧ ja̧'a̧ ujuturu rä'epö icuinömä Egipto rȩjȩra̧'a̧ttö̧. ⁷ Mo̧ro̧ päia'a tocu'äcuotöjä TÖ̧Ä̧NÄ̧HUA̧ usäru, ja̧u̧mä̧ ä̧ju̧cuä̧ji̧ ucutu huocu'ätucua'amä. ¿Titö tättö̧ ujutumä ja̧'hua̧nö̧ huocu'ätucuattö̧ pä'ömä? ⁸ Moises'inä pa'inö: "Ucutumä cuo̧huo̧huä̧cuo̧tö̧jä̧ TÖ̧Ä̧NÄ̧HUA̧ i̧sa̧ idepä iyomenä ja̧'hua̧ta̧'a̧nö̧ mo̧ro̧ päi'omenämä pan'inä sucuädi'ätucunä cucuäcuotöjä, ja̧u̧mä̧ ä̧ju̧cuä̧ji̧ ucutu kö'cö jui'ö huocu'ätucua'a ja̧u̧ru̧. ¿Tittö tättö̧ ujutu Aroncu̧ ttö'inämä? kö'cö jui'ö huocu'ätucua'amä ujuturumä'cö̧; Jua'amä TÖ̧Ä̧NÄ̧HUA̧RÖ̧TÄ̧." ⁹ Moisés pä'inö Aaronrö̧: "O'cajuiyönä Israel ttö̧ja̧ ttö̧jo̧cu̧du̧nä̧ ji'ähuäji: TÖ̧Ä̧NÄ̧HUA̧ ö̧jo̧mȩcu̧ ichätucui, ja̧u̧mä̧ ä̧ju̧cuä̧ji̧ ucutu kö'cö jui'ö huocu'ätucua'amä." ¹⁰ Aarón Israel ttö̧ja̧cu̧ ucuocua'anä jua'a de'a jui̧yä̧jä̧ ra̧'a̧cu̧ttu̧ tottomenä isoppanä i̧jȩcui̧na̧'a̧ TÖ̧Ä̧NÄ̧HUA̧ usäru. ¹¹ Ja̧u̧nu̧ o'ca'a TÖ̧Ä̧NÄ̧HUA̧ ucuocu pä'inö Moiserö: ¹² Ä̧ju̧cuö̧ji̧sä̧ Israel ttö̧ja̧ ucutu kö'cö jui'ö huotta'amä. pa̧'a̧nö̧ ucuocu ji'ähuitö: Ni̧pä̧ro̧mȩcu̧mä̧ cucuäcuottöjä idepä ja̧'hua̧ta̧'a̧nö̧ mo̧ro̧ päia'amä pancu̧ huihuatö. Ja̧u̧nu̧ o'ca'atä cu̧huo̧juä̧cuo̧tö̧jä̧ ttötä ja̧'a̧ CU̧'Ä̧NÄ̧HUA̧TU̧CU̧ Diosmä pä'ö." ¹³ Nipä̧ro̧mȩcu̧ 'cuaopina'a̧ du̧'ca̧ra̧ recuätö 'cha'chepinätö̧ ttä'ähuaränä. Mo̧ro̧ päi'a'a ttä'ähuaränä ajiya 'chȩnö̧ attocuächina'a̧. ¹⁴ A̧jiya 'chȩnö̧ ichäji ojuchi'omenä, juȩnȩ rȩjȩ de'a jui̧yä̧jä̧ rȩjȩnä̧ i̧jȩcuä̧chi̧na̧'a̧ diyau o'chi ppo̧'ö̧ ja̧'i̧nö̧'a̧nä̧ jö̧ o'chi̧. ¹⁵ Israel ttö̧ja̧ Ja̧'hua̧nö̧ ja̧'a̧ topö, jittö tta̧mo̧nä̧ pä'ä'chäcuähuinätö̧: "¿Däjȩjä̧ttö̧ ja̧'hua̧nö̧ jö̧mä̧?" Ja'huätömä jerupinätö ja̧'hui̧a̧nö̧ jö̧mä̧. Moises ji̧ä̧hui̧nä̧u̧: "Ja̧u̧mä̧ pan ja̧'a̧ TÖ̧Ä̧NÄ̧HUA̧ iyäji cucuätucua pä'ö. ¹⁶ Pi̧yȩ ja̧'a̧ hue'ähuä TÖ̧Ä̧NÄ̧HUA̧ iyäjimä: ca̧ca̧tä̧tu̧cui̧, ucutu ya̧cu̧nä̧, cucuätucuä pä'ö recuärö̧jo̧mȩtä̧, ta'are litro jo̧mȩ cuahuaruhuättö topö. Ja̧'hua̧nö̧tä̧ cu̧ca̧ca̧tä̧cuo̧tö̧jä̧: Ca̧ca̧tä̧tu̧cui̧ rö̧'ä̧nä̧nö̧ sucuädi'önä cucuätucua, ya̧cu̧pö̧nä̧ cuä'ähuaränä ka̧cuä̧tö̧mä̧." ¹⁷ Israel ttö̧ja̧mä̧ ja̧'hua̧nö̧tä̧ jȩpi̧nä̧tö̧. Korotö pönämä rö̧'ä̧nä̧ ȩmi̧nä̧tö̧, ja̧'hua̧ta̧'a̧nö̧ korotömä a̧u̧cu̧nä̧tä̧ ȩmi̧nä̧tö̧. ¹⁸ Ja̧'hua̧ta̧'nä̧ ta'are litro jo̧mȩnä̧ pa̧ja̧tö̧ to'tömenä, jitö rö̧'ä̧nä̧ ca̧ca̧tä̧jä̧tö̧rö̧'i̧nä̧, ki̧'i̧po̧ca̧'a̧ ji̧na̧'a̧ ja̧'hui̧a̧ta̧'nö̧ jitö ji̧'chi̧ca̧nö̧tä̧ ca̧ca̧tä̧tö̧rö̧'i̧nä̧ juiyoca'a ji̧na̧'a̧. Ya̧cu̧pu̧nä̧ ca̧ca̧ti̧nä̧tö̧ jitörötä recuärö̧jo̧mȩttö̧ pa̧ja̧cuä̧chö̧'a̧nö̧ jo̧mȩ. ¹⁹ Ja̧'hua̧nö̧ ja̧'a̧ Moises pä̧i̧nä̧u̧: "Ya̧tȩ'i̧nä̧ ja̧u̧ttu̧mä̧ cu̧ju̧ni̧'ä̧tu̧cua̧ koro mo̧ro̧ ju̧bu̧mä̧." ²⁰ Ja̧'hua̧nö̧ ja̧'a̧nä̧, ja'huätömä Moiserö ä̧ju̧cuo̧co̧tö̧ pinätö. Ja'huätöttö yotucunämä koro mo̧ro̧ päi'önä ku̧nä̧ri̧nä̧tö̧, ja̧'hua̧nö̧ ja̧'a̧nä̧ mi̧yö̧huä̧chiniyä̧u̧ ja̧'hua̧nö̧tä̧ surojuo'ächiniyä̧u̧. Ja̧'hua̧nö̧ ji̧yä̧cu̧ Moises amisurächi'önä topinö ja'huätörö. ²¹ Ja'huätömä 'cuäopönä mo̧ro̧ juoöta'anä ca̧ca̧ti̧nä̧tö̧ mo̧ro̧ ttucuäcuome pa̧ja̧cuä̧chö̧nä̧. Kä̧hua̧ duhui'öta'anä, eripächinö. ²² Ji̧mu̧tȩ ya'atenö mo̧ro̧ päi'omenämä ta'arenä pan jo̧mȩ ca̧ca̧ti̧nä̧tö̧, ta'are litro jo̧mȩ ya̧cu̧pu̧nä̧. O'catoi'önä ötahuiyä ruhuotö päi'önä ka̧cuä̧tö̧mä̧ pi̧yȩ huȩnȩ ji'ähuinätö̧ Moiserö. ²³ Ja̧u̧ päinä̧u̧: "Pa̧'a̧nö̧ pä'äji TÖ̧Ä̧NÄ̧HUA̧MÄ̧: Yo̧ä̧i̧ mo̧ro̧mä̧ ro̧'ö̧nä̧ 'cuächäcuähuä mo̧ro̧ ja̧'a, TÖ̧Ä̧NÄ̧HUA̧RÖ̧ ucuotö 'cuächäcuähuä mo̧ro̧. Cuȩttä̧tu̧cua̧ päcuätucumä jitätä ȩttä̧tu̧cui̧, dacuätucua päcuätucumä jitätä da'ätucui. O'cajuiyönä ka̧cui̧pö̧mä̧, i̧mi̧cu̧nä̧ pporädö ku̧nä̧tu̧cui̧ koro mo̧ro̧ jubu päi'önä." ²⁴ Ja̧'hua̧nö̧ ja̧'a̧ttö̧ pporädö ku̧ni̧nä̧tö̧ koro mo̧ro̧ ju̧bu̧ pä̧i̧'ö̧nä̧, Moises jiähuäjita'anö. Surojuo'ächo'cö ji̧nö̧ miyu̧huä̧chö̧'i̧nä̧ mi̧yu̧hä̧cho̧cö̧ ji̧nö̧. ²⁵ Moises pä'inö: "Ja̧u̧ cuäcuähuämä jitä mo̧ro̧tä̧ cui'iätucui, jitä mo̧ro̧mä̧ pätetö ku̧nä̧hua̧'a̧ TÖ̧Ä̧NÄ̧HUA̧RÖ̧ ucuotö 'cuächäcuähuä mo̧ro̧. Ucutumä de'a isarettömä cuo̧cui̧po̧co̧tö̧ cuäcuotöjä. ²⁶ Ucutumä cu̧ca̧ca̧tä̧cuo̧tö̧jä̧ ji̧mu̧tȩ ya'ateno mo̧ro̧ jo̧mȩ, ja̧'hua̧nö̧ ja̧'a̧nä̧ ji̧mu̧tȩ ta'arenö mo̧ro̧ jo̧mȩmä̧ 'cuächäcuähuä mo̧ro̧ ja̧'a̧. 'Cuächäcuähuä mo̧ro̧mä̧ mana'inä juiyäcua'a." ²⁷ Pätecuächina'a ji̧mu̧tȩ ta'arenö mo̧ro̧i̧, korotö pönämä rä'opinätö mana ttö̧ca̧ca̧ta̧ pä'ö, ja̧'hua̧nö̧ ja̧'a̧nä̧ ja'huätömä po̧cui̧po̧co̧tö̧ pinätö̧. ²⁸ Ja̧'hua̧nö̧ ja̧'a̧ TÖ̧Ä̧NÄ̧HUA̧ pä'inö Moiserö: "¿Ttä̧'a̧nö̧ recuotä ja̧'a̧jä̧ttö̧ jȩcu̧'ä̧tu̧cuo̧ca̧'a̧mä̧ ttö jȩcu̧'ä̧tu̧cua̧ pä'ö hue'ähuä huedinömä? ²⁹ Ä̧ju̧cuä̧tu̧cui̧, TÖ̧Ä̧NÄ̧HUA̧MÄ̧ 'cuächäcuähuä mo̧ro̧ i̧yi̧nö̧. Ja̧'hua̧nö̧ ja̧'a̧ttö̧ ji̧mu̧tȩ ya'atenö mo̧ro̧ JA̧U̧MÄ̧ iyinö todäre mo̧ro̧ cuäcuähuome. Ucutumä ya̧cu̧pu̧nä̧ ka̧cuä̧tu̧cui̧ cu̧jä̧tu̧cuo̧mȩtä̧; ya̧tȩ'i̧nä̧ räopapä'ömä juiya'a ö̧jo̧mȩttö̧mä̧ ji̧mu̧tȩ ta'arenö mo̧ro̧mä̧." ³⁰ Ja̧'hua̧nö̧ ja̧'a̧ttö̧ ja'huätömä 'cuä'ächinätö ji̧mu̧tȩ ta'arenö mo̧ro̧mä̧. ³¹ Israel ttö̧ja̧mä̧ ja̧u̧ cuäcuähuämä o'inätö, "maná" pä'ö. Ja̧u̧mä̧ te'inö cilantro u̧huä̧ju̧ jä̧'i̧nö̧'a̧nö̧ ja̧u̧ ö̧nö̧ä̧mä̧ i̧ri̧si̧ mayacu huihuatö a̧di̧cuä̧si̧ a̧'cua̧rö̧nä̧. ³² Moises pä'inö: "Pi̧yȩ ja̧'a̧tó TÖ̧Ä̧NÄ̧HUA̧ jȩta̧ pä'ö hue'äjimä: Ya'ate omer maná jo̧mȩ hua'adö ku̧nä̧tu̧cui̧ cuahuaruhä o'cotö'inä tottäcua'anö, ja̧'hua̧ta̧'a̧nö̧ ucuttu yo'ähuächätö'inä tottäcua'anö TTÖ de'a jui̧yä̧jä̧ ra̧'a̧ttö̧ cucuätucua pä'ö chiyinö, Egipto rȩjȩra̧'a̧ttö̧ rä'epö chicuinö o'ca'a." ³³ Moises pä'inö Aronrö̧: " I̧so̧'ta̧ yo̧'ta̧tȩ 'chu'ädö ya'ate omer jo̧mȩ maná ȩni̧ juo̧'ta̧nä̧. ³⁴ Hua'adö ku̧ni̧ TÖ̧Ä̧NÄ̧HUA̧ ä'ca jo̧mȩ cuahuaruhuä o'cotö jä̧cua̧'a̧nö̧." TÖ̧Ä̧NÄ̧HUA̧ Moiserö päinö ji̧nö̧ ta̧'a̧nö̧, Aronmä hua'adö ku̧ni̧nö̧ esecuinö ȩco̧ca̧ ppeyänä. ³⁵ Israel ttö̧ja̧mä̧ maná cuinätö̧ cuarentanö̧ a̧'ȩ jo̧mȩ ttö̧ja̧ ttö̧jo̧cuo̧mȩ ttö̧rä̧bȩhuo̧mȩ jubu. Ja'huätömä cuinätö̧ Canaán rȩjȩ beipome ttö̧rä̧bȩhuo̧mȩ jubu. ³⁶ Jitämä ya'ate omermä ta'are pa̧ja̧cuo̧mȩ ji̧na̧'a̧ juȩnȩmä̧ pä'inätö efa pä'ö.