¹ Ja̧'hua̧nö̧ ja̧'a̧ Tu̧ru̧hua̧ Dios Moisésrö pä'inödo: ² Israel ttö̧ja̧rö̧ jicuhuähuaja ppa̧ttä̧cha̧ pä'ö Pi-hahirot tö'cö Migdol yabo'inä dubora pabo'inä Baal-zefón pä̧tȩcuä̧nö̧ dubora rö̧ora jäyä ttö̧'ö̧jä̧ma̧ pä'ö. ³ Egipto ru̧hua̧ a̧mö̧cuä̧dä̧cua̧ a̧'cua̧ra̧'a̧: Ja̧'a̧tä̧ rȩjȩnä̧tä̧ cue'ächätöcö̧ pä'ö ttö̧ja̧ toächomemä 'cuättopoca'a. ⁴ Pa̧'a̧nö̧ jȩchä̧cua̧sä̧ Egipto ru̧hua̧ jarodö amöcuäda pä'ö, ucutu cuo'cometucu i'chä̧cua̧'a̧nö̧. Ja̧'hua̧nö̧ Egipto ru̧hua̧rö̧ umöhuäyotörö'inä be'epäjipö chicuomenä, korotö ttörö ttucuotäcuotö. Ja̧'hua̧nö̧ Egipto ttö̧ja̧ ttu̧huo̧juä̧cuo̧tö̧ ttötä o'ca toi'önä Ttu̧ru̧hua̧ kö̧sä̧ pä'ö pä'inödo Dios. Ja̧u̧ huȩnȩ ä̧ju̧cu̧, Israel ttö̧ja̧ Tu̧ru̧hua̧ Dios hueäji ta'anö ppa̧'ä̧chinä̧tö̧do. ⁵ Ja̧'hua̧nö̧ ja̧'a̧ Egipto ru̧hua̧rö̧ jittähuomenä Israel ttö̧ja̧ tö'ipächäjätö pä'ö, Egipto ru̧hua̧'inä̧, ippeye ruhuä'inä pärocua'acutä amöcuädinätödo. ¿Dä̧bö̧ ja̧'a̧tä̧ totä̧rä̧jä̧ttö̧ Israel ttö̧ja̧ tti̧'cha̧'a̧nä̧? Täcö toa'a ujutu huetö adicuä isotö pä'ijätömä. ⁶ Ja̧'hua̧nö̧ amöcuädö, Egipto ru̧hua̧mä̧ Israel ttö̧ja̧ tto'ca'anä i'cha̧ pä'ö, öäre carucä jo̧mȩ päi'önä ttadita pä'ö hue'inödo. Su̧ro̧da̧u̧ru̧'inä̧ ȩpinö̧do. ⁷ Ja̧'hua̧ta̧nö̧ ji̧yȩtä̧ adihuä juäi caruquiyä seiscientos jo̧mȩnä̧, ja̧'hua̧ta̧nö̧ o'ca juiyönä caruquiyä Egipto rȩjȩnä̧ ka̧cuinö̧ ocä'inä, ca̧hua̧yu̧tö̧ dotta'anä pȩä̧dä̧rä̧cuä̧huä̧ isotörö'inä ȩpinö̧do̧. ⁸ Ja̧'hua̧nö̧ Tu̧ru̧hua̧ Diosmä Egipto ru̧hua̧ ami iso'quittö esetö juiyönä jȩinä̧cu̧do. Egipto ru̧hua̧mä̧ Israel ttö̧ja̧ tto'ca'anä 'chinö̧do, jahuätö esehuäyotö rättopa'anä. ⁹ Egipto ttö̧ja̧ttö̧ su̧ro̧da̧u̧, Egipto ru̧hua̧ ä̧jimö̧ ca̧hua̧yu̧tö̧ o'ca toi'önä, caruquiyä o'ca juiyönä Israel ttö̧ja̧ tto'ca'anä 'chinä̧tö̧do. Israel ttö̧ja̧ ttö̧'ö̧jo̧mȩra̧'a̧cu̧ dubora rö̧ora jäyänä, Pi-hahirot tö'cö Baal-zefón pä̧tȩcuä̧nö̧rȩbȩhuinä̧tö̧do. ¹⁰ Israel ttö̧ja̧mä̧ Egipto ru̧hua̧rö̧ su̧ro̧da̧u̧cu̧ tto'ca'anä tticha'a tottomenä, juiyo ye'ecuinätödo. Tu̧ru̧hua̧ Diosrö pä̧icu̧nä̧ jä'epö ajuähuinätödo. ¹¹ Ja̧'hua̧ta̧nö̧ Moisésrö pä'inätödo: ¿'Corupä'i'ätö huattome juiya'a tä̧ji ̧ Egipto rȩjȩra̧'a̧? Ja̧'hua̧nö̧ juiya'attö ¿ujuturu pocu i'cächäjijä tä̧ji ̧ porö ttö̧ja̧ toächomettö 'corupäti'a pä'ö? ¿Dä̧bö̧ ja̧'hua̧nö̧ ujuturu rä'epö icu jȩcu̧'ä̧jä̧ttö̧ Egipto rȩjȩttö̧? ¹² Egipto rȩjȩnä̧ tö̧jo̧mȩnä̧ ucuru pä'inätöjä: Ja̧'a̧tä̧ topitö Egipto ttö̧ja̧ huettö jȩta̧'a̧nä̧, pä'inätöjä. Egipto ttö̧ja̧ huettötä jȩto̧mȩnä̧ pottö ttö̧ja̧ toächomettö 'corupäti'öttö'inä abonänö adihuaja'a pä'inätödo. ¹³ Ja̧'hua̧nö̧ ja̧'a̧nä̧ Moisésmä ttö̧ja̧rö̧ pä'inödo: Yecuecuätucuä'. 'Quiyönä kätu̧cui.̧ Jitä mo̧ro̧tä̧ tocu'äcuotöjä Tu̧ru̧hua̧ Dios jȩä̧cuȩmä̧ cu̧jipätu̧cua̧ pä'ö. Egipto ttö̧ja̧ jitä mo̧ro̧ tocu'ätucuä̧u̧ru̧mä̧ pä'äji ta'anömä topocotöjä yorö'iso. ¹⁴ Tu̧ru̧hua̧ Diostä ö̧ro̧huä̧huä̧cua̧, ucutu 'corunä cu̧jätu̧cua̧'a̧nä̧. ¹⁵ Ja̧'hua̧nö̧ ja̧'a̧ Tu̧ru̧hua̧ Dios Moisésrö pä'inödo: ¿Dä̧bö̧ ttörö huocu'a'attö? Israel ttö̧ja̧rö̧ ji'ähui tti̧'cha̧ pä'ö. ¹⁶ Ucutä cuitta'ca cä'epö ki'ä̧di ̧ dubora rö̧ora huämenä, kä'coranä 'toi'önä jȩcu̧'a̧ pä'ö. Israel ttö̧ja̧ duboranä 'cuättopäcuotö rȩjȩ jo̧ä̧jä̧nä̧. ¹⁷ Ttötä Egipto ttö̧ja̧ ttöaroda pä'ö jȩchä̧cua̧sä̧, Israel ttö̧ja̧ tto'ca'anä dottächi'a pä'ö. Ja̧'hua̧nö̧ Egipto ru̧hua̧rö̧'inä̧, su̧ro̧da̧u̧ru̧'inä̧, caruquiyä'inä, pȩä̧dä̧rä̧cuä̧huä̧ isotörö'inä be'epäjipö chicuomenä, o'ca toi'önä ttörö tucuotäcuotö. ¹⁸ Ja̧'hua̧ta̧nö̧ yodoji'inä ttö jȩchinö̧ ttä̧ju̧cuo̧mȩnä̧, Egipto ttö̧ja̧ ttu̧huo̧juä̧cuo̧tö̧ ttö Cu̧ru̧hua̧tu̧cu̧ päi'önä chö̧jö̧mä̧, Egipto ru̧hua̧rö̧'inä̧, caruquiyä'inä, pȩä̧dä̧rä̧cuä̧huä̧ isotörö'inä chujuruhuomenä pä'inödo Diosmä. ¹⁹ Dios adihuä u̧mö̧huä̧ya̧ isoppa hua̧ Israel ttö̧ja̧ ttä'canä 'chä̧ji̧mä̧ kärächi'ö ja̧'hua̧ta̧'a̧nö̧ jahuätö tto'ca'anä 'chi̧nö̧. Isoppa rȩjȩttö̧ kä̧mä̧dö̧ ju'tojucu jueönä kö̧nä̧ oipoppamä kärächi'ö jahuätö tto'ca'anä kä̧mä̧di̧na̧'a̧. ²⁰ Isoppamä ichina̧'a̧ Egipto ttö̧ja̧ ttö̧jo̧mȩttö̧'i̧nä̧ ja̧'hua̧ta̧'a̧nö̧ Israel ttö̧ja̧ ttö̧jo̧mȩttö̧'i̧nä̧ 'cä̧tȩ jo̧mȩ.Juhuoppa isoppamä yo̧i̧no̧ppa Egipto ttö̧ja̧rö̧mä̧, ja̧'hua̧nö̧ ja̧'a̧nä̧ Israel ttö̧ja̧rö̧mä̧ tȩa̧u̧ kä̧dȩpi̧na̧'a̧, ja̧'hua̧nö̧ ja̧'a̧ttö̧ tö'cöpächi'ocotö pi̧nä̧tö̧ jahuätö ttö̧ja̧'a̧nä̧mä̧ yo̧ö̧tä̧ yo̧a̧'a̧ttö̧ ya'ute yodo jo̧mȩnä̧. ²¹ Moisesmä duborara'acu u̧mu̧ cä'epinö .Tu̧ru̧hua̧mä̧ hue'inö isoppa pä̧i̧cu̧nä̧ ichönä ja̧u̧nö̧ yodo 'cuäoi'önä dubora o'ca'acu ichö ja̧'hua̧ta̧'a̧nö̧ ba'ecuächö rȩjȩ jo̧ä̧jä̧tä̧ päi'ina̧'a̧. Ja̧'hua̧nö̧ pä'i'ö ajiyamä todärenä päi'önä 'cä̧ȩcuä̧chi̧na̧'a̧. ²² Israel ttö̧ja̧mä̧ 'cuä'opinä̧tö̧ dubora tuhuora 'cä̧tȩnä̧ rȩjȩ jo̧ä̧jä̧nä̧. Ajiyamä räbä jö̧nä̧tä̧ päi'ina̧'a̧ jahuätö ttu̧huo̧jua̧'a̧cu̧'i̧nä̧ jahuätö ttö'ohuecu ja̧'a̧nä̧'i̧nä̧. ²³ Egipto ttö̧ja̧mä̧ ru'i'inä̧tö̧ .'Chi̧nä̧tö̧ tto'ca'anä dubora kä'co päte'ö jubö päi'önä, o'catoi'önä Faraon ä̧ji̧mö̧ ca̧ba̧yu̧tu̧ caruquiyä do'ätö'inä, ja̧hua̧ta̧'a̧nö̧,ja̧hua̧ta̧'a̧nö̧ ca̧ba̧yu̧tu̧nä̧ huä̧tö̧'i̧nä̧. ²⁴ Ja̧'hua̧nö̧ ja̧'a̧ttö̧ horamä ( a la 02 - 06 am.) mo̧ro̧jä'canä Egipto ttö̧ja̧ su̧ro̧da̧u̧ru̧ isoppa ocuräcu rȩttö̧ kä̧mä̧dö̧ jueönä kö̧nä̧ ttoepa'a topinö Tu̧ru̧hua̧mä̧. ja̧'hua̧nö̧ kä̧mä̧da̧'a̧ topö ye'ö ttö̧'ä̧hui̧nä̧tö̧ Egitpto ttö̧ja̧mä̧. ²⁵ Caruquiyä i̧jȩpö̧'quiyu'inä kärächi'iyönätä 'chu'ädö ku̧ni̧na̧'a̧ ja̧'hua̧ta̧'a̧nö̧ ca̧ba̧yu̧tu̧'i̧nä̧ jȩttö̧ juiyönä̧tä̧ päi'inä̧u̧ . Ja̧'hua̧nö̧ pä̧i̧'ä̧u̧ Egipto ttö̧ja̧mä̧ pä'inä̧tö̧,"hue'itö rätopächa Israel ttö̧ja̧ttö̧, TTu̧ru̧hua̧mä̧ rohuähuö ujuturumä jahuätörö ppä'ädö." ²⁶ Tu̧ru̧hua̧mä̧ pä'inö Moisesrö," cu̧mö̧ cä'epi dubora tuhuoracu pä'äjita'anö ajiya mö̧ȩcuö̧cha̧ Egipto ttö̧ja̧rö̧'i̧nä̧, caruquiyä'inä, ja̧hua̧ta̧'a̧nö̧ ttö̧ja̧ ca̧ba̧yu̧tu̧nä̧ huä̧tö̧'i̧nä̧." ²⁷ Moisesmä u̧mö̧ cä'epinö dubora tuhuora huä̧mȩnä̧, ja̧'hua̧ta̧'a̧nö̧ pä'äji jä̧ji̧ ta̧'a̧nö̧ yoräteunä päi'a'atä topinä̧tö̧ mo̧ro̧ päia'amä. Egipto ttö̧ja̧mä̧ kärächi'ö tö'ipächinätö ja̧'hua̧nö̧ ja̧'a̧nä̧ Tu̧ru̧hua̧mä̧ ȩpi̧nö̧ kä'co päte'ö. ²⁸ Ajiyamä a̧ttä̧di̧'i̧na̧'a̧ Faraon öäre Caruquiyä'inä,ttö̧ja̧ Ca̧ba̧yu̧tu̧nä̧ huä̧tö̧rö̧'i̧nä̧, ja̧'hua̧ta̧'a̧nö̧ o'catoi'önä u̧mö̧huäyotö su̧ro̧da̧u̧ Caruquiyänä 'chä̧tö̧rö̧'i̧nä̧ .Ya̧tȩ'i̧nä̧ a̧'cua̧rö̧mä̧ ki̧'o̧cö̧ pi̧nö̧. ²⁹ Ja̧'hua̧nö̧ ja̧'a̧nä̧, Israel ttö̧ja̧mä̧ 'cuä'opinä̧tö̧ Dubora 'cä̧tȩnä̧ rȩjȩ jo̧ä̧jä̧nä̧. Ttu̧huo̧jua̧'a̧cu̧'i̧nä̧ ja̧'hua̧ta̧'a̧nö̧ ttö'ohue ja̧'a̧cu̧'i̧nä̧ ajiyamä räbä jö̧nä̧tä̧ ji̧na̧'a̧ jahuätörömä. ³⁰ Ja̧'hua̧nö̧tä̧ jȩpö̧ ppä'ädinö Tu̧ru̧hua̧mä̧ Israel ttö̧ja̧rö̧mä̧ ja̧u̧nö̧ mo̧ro̧ Egipto ttö̧ja̧ ttu̧mö̧ttö̧ ttö̧ji̧pö̧nä̧, Israel ttö̧ja̧mä̧ topinä̧tö̧ Egipto ttö̧ja̧ ttö'co jähuämä Dubora jäyoto rö̧ja̧'a̧tä̧. ³¹ Israel ttö̧ja̧ Tu̧ru̧hua̧ Egipto ttö̧ja̧rö̧ ujuruhuäji tottomȩnä̧, ttö̧ja̧mä̧ ye'inätö Tu̧ru̧hua̧rö̧mä̧, ja'huätömä ucuotö jȩpi̧nä̧tö̧ Tu̧ru̧hua̧rö̧'i̧nä̧ ja̧'hua̧ta̧'a̧nö̧ u̧mu̧huä̧ya̧ Moisesrö'inä.