¹ Tu̧ru̧hua̧ Diosmä Moisésrö ja̧u̧nu̧ pä'äjinänö päina'a jina̧'a̧do: Jitä ya'ute ro̧ȩcuä̧ huȩdä̧cua̧sä̧ Egipto rȩjȩ ru̧hua̧rö̧'inä̧, Egipto rȩjȩ ttö̧ja̧rö̧'inä̧. Ja̧u̧nu̧ o'ca'a räcuhuopätucua'anä, ja̧'a̧tä̧ to̧ä̧cua̧. Räcuhuopächätucuomenä, yorö'iso ucuturu ya'opö icuä̧cua̧ pottömä. ² Ja̧'hua̧nö̧ ja̧'a̧ttö̧ ttö̧ja̧ ttä̧ju̧cua̧ pä'ö ji'ähui Israel ttö̧ja̧ u̧mä̧tö̧ o'ca toi'önä̧rö̧, Israel ttö̧ja̧ nä̧tö̧ o'ca toi'önä̧rö̧ Egipto rȩjȩ ttö̧ja̧ tö'cö ka̧cuä̧tö̧ttö̧ koro juäi jättepa pä'ö, pärätättö adicuä'inä, orottö adicuä'inä. ³ Ja̧'hua̧nö̧ ja̧'a̧ Tu̧ru̧hua̧ Dios jȩpinö̧do, Egipto rȩjȩ ttö̧ja̧ adiunä jȩtta̧ pä'ö Israel ttö̧ja̧rö̧. Ja̧'hua̧ta̧nö̧ Egipto rȩjȩ ru̧hua̧ ippeye ruhuotö'inä, o'ca toi'önä Egipto rȩjȩ ttö̧ja̧'inä̧ Moisésrötä juiyo ucuotinätödo. ⁴ Ja̧'hua̧nö̧ ja̧'a̧ttö̧ Moisésmä Egipto rȩjȩ ru̧hua̧rö̧ pä'inödo: Pa̧'a̧nö̧ pä'äji Tu̧ru̧hua̧ Diosmä: Yodo kä'co Egipto rȩjȩnä̧ 'cuä̧do̧pä̧cua̧sä̧. ⁵ O'ca toi'önä tti̧tti̧mö̧ u̧mä̧tö̧ ä̧cuo̧mȩnä̧ uhuäpächinätömä, Egipto rȩjȩ ru̧hua̧ ideäcänä pö̧ itti̧'inä̧, umöhuäyaju trigo ta'äju kitti̧'inä̧, ttä̧jimö̧ pä̧cä̧yö̧ tti̧tti̧mö̧'inä̧ 'corupätti'äcuotö. ⁶ Ja̧'hua̧ta̧nö̧ o'ca toi'önä ttajuähuäcuotö pä'äji ttajuähuina'attö'inä abonänö, yodoji ttajuähuäcuättö'inä abonänö rö̧ȩnä̧. ⁷ Ja̧'hua̧nö̧ ja̧'a̧nä̧ Israel ttö̧ja̧ ttä̧jimö̧ttö̧mä̧ ya̧tȩ'inä̧ ajuähuocö jä̧cua̧. Ja̧'hua̧ta̧nö̧ ähuiri ya̧tȩ'inä̧ ajuähuocö jä̧cua̧, ttö̧ja̧'inä̧, ttä̧jimö̧'inä̧ 'corupätti'oca'attö. Israel ttö̧ja̧ Tu̧ru̧hua̧ Diosmä Egipto rȩjȩ ttö̧ja̧ttö̧'inä̧, imicu̧nä̧ jȩpö̧ Israel ttö̧ja̧rö̧mä̧ pä'ö, cu̧huo̧juä̧cua̧jä̧, pä'äji Tu̧ru̧hua̧ Diosmä pä'ö ji'ähuinödo Moisésmä. ⁸ Moisés juhua'a yabocu Egipto rȩjȩ ru̧hua̧rö̧ ucuocuinödo: Ja̧'hua̧ta̧nö̧ cuippeyä ruhuotö o'ca toi'önä ttörö ichö, ttö chä'ca jo̧mȩttö̧ rȩjȩcu̧ ja̧rȩyu̧nu̧ jȩpö̧, pa̧'a̧nö̧ pättäcuotö ttörö: Rä'opächätucui, ucu'inä, cumöhuäyotö'inä. Ja̧'hua̧nö̧ pättö o'ca'a rä̧do̧pä̧cua̧sä̧― pä'inödo Moisésmä. Ja̧'hua̧nö̧ ja̧'a̧ Moisésmä Egipto rȩjȩ ru̧hua̧ ä'ca jo̧mȩttö̧ juiyo ra̧huä̧rö̧nö̧ rä'opinödo. ⁹ Tu̧ru̧hua̧ Diosmä Moisésrö ja̧u̧nu̧ pä'äjinänö päina'a jina̧'a̧do: Egipto rȩjȩ ru̧hua̧mä̧ yorö'iso ucuru esetocö jä̧cua̧. Ja̧'hua̧nö̧ ja̧'a̧ttö̧ ttö ttö̧ja̧ ttieru juäi rö̧ȩnä̧ jȩchä̧cua̧sä̧ Egipto rȩjȩnä̧ päina'a jina̧'a̧do Tu̧ru̧hua̧ Diosmä. ¹⁰ Moisés'inä, Aarón'inä o'ca juiyö piy̧ ȩ ttö̧ja̧ ttieru juäi Egipto rȩjȩ ru̧hua̧ ä'ca jo̧mȩttö̧ jȩtta̧'a̧nä̧'inä̧, Israel ttö̧ja̧rö̧mä̧, iŗ ȩjä̧ttö̧ rättopa pä'ö ja̧'a̧tä̧ topocö pinödo, Tu̧ru̧hua̧ Diosmä Egipto rȩjȩ ru̧hua̧rö̧ juiyö öarodönä jȩina̧'a̧ttö̧.