¹ Pi̧yȩ pä'ötó TÖ̧Ä̧NÄ̧HUA̧MÄ̧: Moab ttö̧ja̧ suronä jȩtti̧nö̧mä̧ huäbodäcuänö jo̧mȩnä̧ ja̧'a̧nä̧, pa̧ja̧cuä̧nö̧ jo̧mȩnä̧'i̧nä̧ ja̧'a̧, ro̧dȩpä̧cuä̧ pädinömä ji̧nö̧mä̧ jȩpö̧ icuocösä, juhua'amä Edomttö̧ ru̧hua̧ ihue'quiyu juiyönätä päi'önä kuhuö icuinö̧ta'anö. ² Moab rȩjȩmä̧ ocuränä ku chicuäcua̧sä̧, Queriot ö̧jo̧demä ä̧ya̧ri̧satä päi'önä. Moabmä juo'ecu kä̧nö̧, huopö kä̧nö̧ ja̧'hua̧ta̧'a̧nö̧ trompeta rä̧mi̧pa̧'a̧nä̧tä̧ 'korujuoächä̧cua̧. ³ Ju̧huȩnȩtä̧ kö̧ röji pähuä i̧sa̧rö̧'i̧nä̧ si'epö chicuäcua̧sä̧ ja̧'hua̧ta̧'a̧nö̧ ruhuotörömä̧ o'catoi'önä̧rö̧ ja̧u̧tä̧cu̧ cuä'ö chi̧cuä̧cua̧sä̧, pä'ötó TÖ̧Ä̧NÄ̧HUA̧MÄ̧. ⁴ Pi̧yȩ pä'ötó TÖ̧Ä̧NÄ̧HUA̧MÄ̧: Judá ttö̧ja̧ suronä jȩtti̧nö̧mä̧ huäbodäcuänö jo̧mȩnä̧ ja̧'a̧nä̧, pa̧ja̧cuä̧nö̧ jo̧mȩnä̧'i̧nä̧ ja̧'a̧, ro̧dȩpä̧cuä̧ pädinömä ji̧nö̧mä̧ jȩpö̧ icuocösä, juhua'amä TÖ̧Ä̧NÄ̧HUA̧TTÖ̧ hueähuä huȩnȩ'i̧nä̧ yattocuinomȩttö̧ ja̧'hua̧ta̧'a̧nö̧ hueinö huȩnȩmä̧ hua'adömä ku̧no̧co̧tö̧ pinätö̧. ⁵ Ttöyaparehuömä jahuätö 'cä̧ttȩcuä̧chö̧nä̧tä̧ jȩi̧nä̧u̧jä̧, cuä̧'o̧tö̧ mi̧nä̧ jahuätö tto'ca'anä tti̧'chi̧nö̧ta̧'a̧nö̧ 'chi ⁶ Pi̧yȩ ja̧'a̧ TÖ̧Ä̧NÄ̧HUA̧ pä'ömä: "Israél ttö̧ja̧ ucutumä huäbodäcuä jo̧mȩnä̧ surojönä jȩpä̧'jä̧ttö̧jä̧, pa̧ja̧cuä̧nö̧ jö̧ttö̧'i̧nä̧, ja'huätörömä ro̧'ȩpö̧jui'ocö chä̧cua̧sä̧, jä̧huä̧tö̧mä̧ suronä'inä jȩpo̧co̧tö̧rö̧ pärätä ja'ate'ö iyä'chätö ja̧'hua̧ta̧'a̧nö̧ ttö̧jä̧pö̧ isäyanätä̧'nä̧ pärohuä'chätö. ⁷ Ja'huätömä usurä'isotörö ttupiyänä 'cuȩ'cuä̧tö̧ rȩjȩ i̧sa̧ppȩnä̧ ttö̧ja̧ tti̧'cuȩcua̧'a̧ jä̧'i̧nö̧'a̧nö̧; Ja'huätömä otonätä̧ ya̧'o̧pä̧rä̧tö̧ huȩttä̧ra̧'a̧nä̧ ko̧cuä̧tö̧rö̧'i̧nä̧. Jä'omä ja̧'hua̧ta̧'a̧nö̧ i̧tti̧cu̧mä̧ isaju yajuterötä ä'ätö ja̧'hua̧nö̧ jȩpö̧ TTÖ surojö jui̧'a̧ chi̧mi̧ surojuo'epätö. ⁸ Ja'huätömä ji̧nä̧ yo̧mȩtȩnä̧ cuä'ipö pȩjä̧tö̧ ku'icu iyähuome kada'ca ttö̧'ca̧trä̧huä̧ti̧yu̧ chi̧yä̧cuä̧ pättinönätä̧, ja̧'hu̧a̧ta̧'a̧nö̧ a̧mo̧nä̧ ttö̧ä̧nä̧hua̧'ca ö̧jo̧dȩ jacuättö'inä ro̧ȩcuä̧nä̧ ko̧cuä̧tö̧ ttahuoyä vino isoya ahuätö. ⁹ Ja̧hua̧ta̧'a̧nö̧ ja̧'a̧nä̧, ttömä̧ juä'ättö tti'ä'catö cie'po chi̧huä̧cua̧'a̧sä̧ amorreos römä, juä'ättömä ttö'otomä cedros dau jo̧mȩnä̧ ji̧nä'a̧; ja̧u̧mä̧ juruhuinö Robles dau jai'nö ja̧'a̧nö̧ jö̧nä̧. Ja̧'hua̧ta̧'a̧nö̧ ja̧'a̧nä̧, ö̧huä̧jui̧ jo'toju huȩjui̧'nä̧ ja̧'hua̧ta̧'a̧nö̧ ihuehuiyä'appiyä rȩjȩmä̧ 'ka̧cui̧'nä̧ siepö chi̧cuä̧cuä̧sä̧. ¹⁰ Ja̧'hua̧'a̧nö̧ ja̧'a̧ttö̧, Egipto rȩjȩttö̧mä̧ ucuturumä i'ca'chinö̧sä̧ ja̧'hua̧nö̧tä̧ oipinösä cuarenta a̧'ȩ jo̧mȩnä̧ amorreos rȩjȩ de'a huiyä ja̧'a̧rä̧'a̧. ¹¹ Cui̧tti̧mo̧tö̧cu̧tö̧ profetatö̧ jo̧nä̧ pojopu 'kuninösä̧, ja̧'hua̧ta̧'a̧nö̧ Nazareos jo̧nä̧ 'ca̧ȩpo̧ ku̧ninösä muä'äyötörö. ¿Ja̧'hua̧'a̧nö̧ Ö̧'ca̧'a̧ ji̧nä̧'a̧ Israel ttö̧ja̧? pi̧yȩmä̧ TÖ̧Ä̧NÄ̧HUA̧TA̧ päi'nö ja̧'a̧. ¹² ja̧'hua̧'a̧nö̧ ja̧'a̧nä̧ Ucutumä Nazareosrömä vinonä 'tajuonätä̧ huȩi̧nä̧ttö̧ja̧ ja̧'hua̧'a̧nö̧ ja̧'a̧nä̧ profetamä jȩpo̧'co̧tö̧ pi̧nä̧tö̧. ¹³ Ä̧ju̧cuä̧tö̧cui̧, u̧huä̧ju̧ ȩpäcä 'poächö yä̧tȩrö̧ ju̧rä̧chi̧'a̧nö̧ ja̧'hua̧ta̧'a̧nö̧ ucuturu'inä jȩcha̧ pe'ö hua̧sä̧ jua̧'a̧nö̧tä̧. ¹⁴ Huo̧jua̧sä̧ pä'önä̧ i̧ji̧pi̧yä̧cuä̧, ju̧ru̧hua̧sä̧ pä'önä̧ ujurumä ppädi̧yä̧cua̧, ja̧'hua̧ta̧'a̧nö̧ ri̧ȩnä̧ ju̧ru̧hua̧sä̧ pä'önä̧ a̧mu̧näma i̧ji̧pi̧yä̧cua̧. ¹⁵ Tipächäcua 'po'obunä 'po'önä, pä'i̧cunä jopudä̧ 'chö̧ttä̧dä̧cua̧, cahuayunä huä̧tö̧dä̧ hua'ö tticuäcuottö. ¹⁶ Ja̧'hua̧nö̧ ja̧'a̧nä̧ su̧ro̧da̧u̧ juruhuätömä titti pächäcuottö tti̧'ca̧tä̧hua̧ta̧ jui'ö juo̧nö̧ mo̧ro̧mä̧, pa̧'a̧nö̧ pä'inö TÖ̧Ä̧NÄHUA̧.