7 ¹ Udi hie Tatueh Ungkup ngantuh, "Inun sa tuu kairu?" ² Hi Stefanus basurah, "Ma kawan matuehan upu,eyau ni awat sanrengei leh eyau ku. Alatalla panante Tuhan haut suah batampai ma itak kakah takam, Hi Abraham, rahatan hanye hang Mesopotamia, kapihuan hanye muneng hang Haran, ³ nelang hanye kaeyau ma hi Abraham, "Baidar leh hanyu hingka paunengan nu taati pada tanan leh here pulaksanai nu, humpan hanyu muneng munun hang tane isa haut na waraku ma hanyu. ⁴ Udi iru, Abraham nanan tumpuk natat ulun Kasdim balalu muneng hang Haran. Dami ambah ni matei, Alatalla panante Tuhan nunyu hanye tulak hingka uneng ni, ma unengan hanye taati muneng. ⁵ Kude, Alatalla panante Tuhan puang ngami pi hanye tane warisan sunah erang jeke tane, kude janyi ni sagar ngami ma hi Abraham umak hanye andri anak tukui utus ni ,nelangen Abraham huan uweng ba iya. ⁶ Kude Alatalla Panante Tuhan, kaeyau kalina kawan katurunan ni jari pihawian hang tane sa ulun asing andri here jari walah andri na kahanangan salawah epat jatuh taun. ⁷ "Kude, Aku neu malijara bangsa isa jari walah here," eyau Alatalla, "Udi iru here tulak hingka yaru balalu here sambayang nawat hurumat Aku hang unengan ina." ⁸ Balalu Alatalla ngami ma Abraham janyi supit, hi Abraham jari ambah Ishak andri ngampi supit ni dami hanye baumur walu andrau, andri Ishak jari ambah Yakub, andri Yakub, kaduawalas itak kakah. ⁹ Daya bahiri ma hi Yusuf, itak kakah takam ngami hanye ma Mesir. Kude, Alatalla nyandrukui hi Yusuf, ¹⁰ balalu ngawat hanye hingka panan kasusahen ni, balalu ngami kaharati andri kabijaksanaan hang hadapan Firaun, Raja Mesir, isa ngulah hanye jari pimpinan Mesir andri katuluh istana ni. ¹¹ Udi yiru, hawi juju lau hang katuluh Mesir andri hang Kanaan, hang wuang kakeke'en balalu itak kakah puang kaiyuh panguta. ¹² Salenga hi Yakub karengei naan gandum hang Mesir, hanye nunyu itak kakah ma yaru. ¹³ Hang pihawian isa karueh, hi Yusuf ngulah kawan pulaksanai ni, pada kaluarga Yusuf jari karasa ma hi Firaun. ¹⁴ Udi iru, hi Yusuf ngami pesen andri ngenei hi Yakub, ammahni, andri katuluh pulaksanai ni, katuluh ni pitumpulu dime kaulun. ¹⁵ Balalu, Yakub minau ma Mesir balalu hanye matei hang yaru, hanye andri itak kakah takam. ¹⁶ Hingka yaru, here mihadit ma Sikhem balalu na pasar hang siat sa haut widi Abraham makai duit teka iya Hemordi Sikhem. ¹⁷ Rite janyi wau, isa haut na janyi daya Alatalla Panante Tuhan ma hi Abraham, pada here ngurai ngarane magin rama hang Mesir, ¹⁸ hampe naan Raja sa lain mihemung erang katumpukan Mesir, isa puang kataru andri hi Yusuf. ¹⁹ Raja iru ngakal takam nelang ngahanangen itak kakah palus maksa here ngumpe kawan gena here humpan galis rupuh. ²⁰ Hi Musa na kayaan hanye manuwu hang paninungan Alatalla. Hi Musa muneng baya ammah ni sa lawah telu wulan. ²¹ Udi hanye haut na umpe, putri Firaun ngalap andri nante ngamau nyalah iya ni ju'ai. ²² Musa na uru ajar hang wuang ajaran ulun Mesir andri Hanye panai paner nelang andri ulah gawi. ²³ Dami hi Musa baumur epat pulu taun, hang wuang kunu'an ni ganta kawan pulaksanai ni, hanye iru keturunan Israel. ²⁴ Tawuk kadinung erang kaulun teka penah here napaulah puang patut daya ulun Mesir, hi Musa hawi ngalun nelang munu ulun Mesir. ²⁵ Hi Musa ngira kawan pulaksanai ni maharati neu Alatalla ngami here keselamatan ni itah hanye, kude here puang kataru. ²⁶ Hang handrian andrau, hi Musa ngapung ulun sa rahatan babur, balalu hanye ngalahelang, eyau ni, "Ada naun babur, ang neh naun ipulaksanai, daya inun ipahanangan?" ²⁷ Kude, ulun sa ngahanangan pulaksanai ni iru nyanawit Musa teka here, "Hie ngangkat hanyu jari tatueh kami ? ²⁸ Inun hanyu kai munu aku jalah hanyu munu ulun Mesir ru hingka riwe?" ²⁹ Nyanrengei papaneran ulun iru, hi Musa mihulu teka tumpuk ma tane Midian. Hang yaru, hanye jari ammah ma karueh anak upu ni. ³⁰ Dami haut sukup epat pulu taun, erang kaulun malekat nantarang ma hi Musa hang wuang jumpun gunung Sinai, hang wuang lela apui hang wuang jumpun haket. ³¹ Tawuk Musa ninung hanye, hanye ngawauh andri paninungan iru. Tawuk hanye nyanrite umak nanti'i, hawi lengan Tuhan, ³² "Aku na Alatalla panante Tuhan nu, Allah Abraham, andri Allah Ishak, andri Allah Yakub." Hi Musa neter pahe'ei andri puang he'ei naniki ni. ³³ Udi iru, Tuhan kaeyau ma hanye, "uwah tarumpah hingka pe'e nu daya unengan hang awe hanyu mindri hnye iru tane maeh. ³⁴ Aku ta tu'u haut ninung hanang atei here hang Mesir andri haut ngandrei umeh here. Andri, Aku haut minau umak nyalamat here. Ayu taati, Aku kai ngutus hanyu ma Mesir. ³⁵ Musa, isa haut puang na tarime nelang nunti, "Hie sa ngangkat hanyu jari panguasa andri Hakim ma kami?" Hanye sa ulun na huyu daya Alatalla numpan tau jari, tatueh atawa pangarawah, itah tangan malekat isa nantarang tengan ma hanye hang jumpun haket. ³⁶ Ulun ina haut ngenei here tulak, nelang ngadaakan mujizat andri siri- siri ajaib hang tane Mesir, andri hang Laut Merah, andri hang jumpun haket salawah epat pulu taun. ³⁷ Hi Musa kaeyau ma bangsa Israel," Alatalla kai ngenat ma naun erang ka ulun nabi jalah aku hingka pulaksanai nu. ³⁸ Hi Musa ina sa jari tetei hang wuang ungkup hang penah jumpun haket teka malekat sa kaeyau ma hanye hang gunung Sinai andri itak kakah takam andri hanye na lengau Alatalla sa welum umak na tahampe ma naun. ³⁹ Kude itak kakah takam puang nyanrengei ni, malahan here puang hakun hang wuang atei here hamen mulek ma tane Mesir. ⁴⁰ Ma hi Harun here kaeyau," Ulah ma kami papire allah umak takia hang hadapan kami, daya hi Musa haut nganyak kami tulak hingka tane Mesir, kami puang karasa inun sabab ni. ⁴¹ Hantek iru, here ngulah isa sampatung iya babiri, balalu ngami parapah ma sampatung iru, nelang arai mihewu andri ulah gawi here. ⁴² Udi hiye, Alatalla tulak nelang nagai here nyambah allah, jalah naan haut na surat daya kawan nabi, "Inu sa hanyu ngenei ma hadapanku situa samalisan nu daya epat pulu taun lawah ni naun hang jumpun, naan kawan ulun Israel? ⁴³ Puang suah naun nyujung punuk Mulok andri situa dewanu, Refan, sampatung isa ulah naun ummak na samah, andri Aku sagar ngenei andri ngumpe naun hampe subarang Babel yaru." Am.5:25-27 ⁴⁴ Itak kakah takam naan hang jumpun kala na parentah Alatalla ma hi Musa umak jari suntu sa haut na dinung ni. ⁴⁵ Dami udi narime punuk iru, here ngenei ni masuk ma Yosua, tawuk here barabut tane andri ulun, ulun lain, sa haut na ugah teka hadapan itak kakah takam hampe zaman Dawit. ⁴⁶ Dawit kaiyuh pangamian hang hadapan Alatalla andri laku unengan umak Alatalla Yakub. ⁴⁷ Kude,Salomo sa ngamuan erang kawua lewu umak Hanye. ⁴⁸ Kude, Isa Bakuasa puang muneng hang wuang lewu sa ulahan tangan murunsia, jalah isa na eyau nabi, ⁴⁹ Langit iru takhta-Ku andri tane paindian-Ku.Lewu inunsa kai na ampuan nu umak-Ku?' Allah kaeyau,'inun sa unengan-Ku? ⁵⁰ Ang neh tangan-Ku isa ngulah katuluh ina? ⁵¹ He, naun sa ulun- ulun mape ulu, andri atei andri silu isa puang na supit, hanyu gaha puang nyanrengei eyau Rohul Barasis, jalah sa na gawi itak kakah nu! ⁵² Nabi -nabi awe isa puang na kahanangen daya itak kakahnu? Here nyanrupuh kawan ulun isa iwara pihawian isa lalan witu, sa taati haut ngampi jari hanye murun akal andri pamunu. ⁵³ Hanyu, sa haut narime Hukum Taurat jalah isa haut na tahampe daya here malaket, kude hanyu puang maliharani!" ⁵⁴ Hantek here nyandrengei wangun ina, here ma hanang atei nadap hi Stefanus. ⁵⁵ Kude, Stefanus isa na salumu Ruhul Kudus mihangut ma amau langit bulu ninung kuasa Alatalla Panante Tuhan andri Yesus mindri hang tuhi kawan Alatalla Panante Tuhan. ⁵⁶ Stefanus kaeyau,"Sanrengei! Aku ninung langit pauka andri iya murunsia mindri hang tuhi kawan Alatalla Panante Tuhan. ⁵⁷ Kude,here nantiak andri lengan mehet , andri mempen silu here, balalu ipakat nyarang Stefanus. ⁵⁸ Balalu, here nyarujut hanye ma lawit baya numuk here andri watu. Udi iru, ulu sa kadinung nguwah jubah here hang kapit pe'e erang kaulun muda bangaran Saulus. ⁵⁹ Andri, here nyiksa Stefanus nelang kaeyau, "Tuhan Yesus,tarimeleh ruhku." ⁶⁰ Nelang isuntup, hanye kaeyau andri lengan mehet," Tuhan, ada nangung dusa ina ma here!" Andri, udi ngantuh, hanye matei.