¹ Laka dakoh, Yesus nyansana ka ayo' sok dakarah ge murid-murid-A', ² Ayo' ahli Taurat ge ayo' sok Farisimunyung ka samo' pankeng Musa. ³ Kat karna dakoh, sagale hal, dakarah da ayo' muji ka imu' umas ta lah ge memperhatilah. Ao' tapi, usah umsa a' parabuatan-parabuatan a' karna ayo' a' muji a', tapi kati umas a'. ⁴ Ayo' a' ninggo beban-beban da bahat ge' mana a' ka samo' kae' sok laitn. Ao' tapi, ayo' adup a' kati ituh nginsit a' nige taringgo' ayo' a'. ⁵ Ayo' a' umas a' samaan parabuatan ayo' a' sapaya gatn ayo' sok mile. Ayo' a' mampalabar tari-tari sembahyang a' ge mangkahyo rinde-rinde ujung jubah ayo' a'. ⁶ Ayo' a' suke tampat ta hormat sadatn perjamuan, tampat pantunjung ka tura ka sadatn sinagoge-sinagoge. ⁷ salam penghormatan ka tampat-tampat umum, ge gatn magaatn Rabi kat ayo' sok. ⁸ Ao tapi, usah gatn magaatn rabi karna hanya nyungan Gurumu', ge imu samaan nya age. ⁹ Iya gaatn magaatn asi saja sabage samma' mu' ka dunia diah karna nyungan sadi samma'mu', ai' dakoh Ini' da ka surga. ¹⁰ Iya uga imu' gatn magaatn pamimpin karna nyungan sadi Pamimpinmu', dakoh ta Kristus. ¹¹ Namun, da paling ahyo ka antra imu' arus ta ini' jadi palayanmu'. ¹² Asi da ngangkanyamo' adup a' ao' a' gatn randah a' adup a' ao' gatn ngannyamo a'. ¹³ Celakalah imu' ahli-ahli Taurat ge Ayo' sok Farisi, ayo' sok munafik! Imu' ngabut pintu Kerajaan Surga ka tura sok karna imu' sadi kati ngamaruh a' ge uga kati mengizinkan ayo' a' da sadang maruh yak ngamaruh a'. ¹⁴ Celakalah imu', he ahli-ahli Taurat ge ayo' sok Farisi, ayo' sok munafik! imu' melahap ramin ayo' janda ge yak pura-pura imu' umas doa-doa da angho'. Karna dakoh, imu' ao' narima hukuman da labih bahat. ¹⁵ Celakalah imu' he ahli-ahli Taurat ge ayo' sok Farisi, ayo' sok munafik! imu' menjelajahi lautan ka sadatn ge ka dayu yak minsakng ayo' sok maruh ka sadatn agamamu'. Ge, ketika ni' laka jadi salah satu a', imu' gatn jadi a' anak neraka, dua kali lipat daripada imu' sadi. ¹⁶ Calakalah imu', hei ayo' pamimpin buta, da nyansana, 'Asi da ba sumpah demi Bait Jabata, hal dakoh kati ani arti a'. Ao' tapi, asi da ba sumpah dakoh.' ¹⁷ Imu' da baga ge da buta! ume da paling ahyo, barawatn ato Bait Jabata da mengudus a' barawatn dakoh? ¹⁸ Ge, 'Asi da ba sumpah demi papante, sumpah dakoh kati ani arti a'. Ao' tapi, asi da ba sumpah demi parsambah ka sammo' papante dakoh, ini' ta tinggo kat sumpah a' dakoh.' ¹⁹ He imu' ayo' sok buta! ume da paling ahyo, parsambahan ato papante da ngudus a' parsambahan dakoh? ²⁰ Karna dakoh, asi da ba sumpah demi papante, ba sumpah demi papante ge samaan da ani ka samo a'. ²¹ Ge, asi da ba sumpah demi Bait Jabata, ba sumpah demi bait Jabata ge demi Ini' da madi ka sadatn a'. ²² Ge, asi da ba sumpah demi surga, ba sumpah demi tahta Jabata, ge demi Ini' da munyung ka sammo' a'. ²³ Calakalah imu, he ahli-ahli Taurat ge ayo' sok Farisi, Ayo' sok munafik! imu' mangkatn' parsepuluhanmu' umpat selasih, adas manis, ge jinta, tapi ngalaka nyapile hal-hal da labih bahatn umpatn Hukum Taurat, kohlah ka adilan, pamase, ge iman. Hal-hal diahlah da saharus a' laka imu' umas tanpa nyapile hal-hal da laitn. ²⁴ Imu' pamimpin-pamimpin buta, da ma nyaring pantujok ge nalatn nyungan unta!. ²⁵ Calakalah imu', he ahli-ahli Taurat ge ayo' sok Farisi, ayo' sok munafik! Sabab, imu' marasih bagian satto' galas ge pingatn mu', tapi bagian sadatn a' panhu rampasan ge keserakahan. ²⁶ Imu' ayo' sok Farisi da buta! Marasih a' uru bagian sadatn galas ge pingatn, maka bagian satto' a' uga bisa jadi bersih. ²⁷ Calakalah imu' ahli-ahli Taurat ge ayo' sok Farisi, ayo' sok munafik! Sabab, imu' samu nige' sibur da gatn ngecat ranak, wa bagian satto' a' gatn mile ulah lamus, tapi bagian sadatn a' panhu nige' turakng-turakng sok kabis ge samaan nabis ta. ²⁸ Lahdakoh uge nige' imu', wa bagian satto' imu' tile taman bagi talino. Ao' tapi, wa bagian sadatn' imu' panhu kemunafikan ge kajahatan. ²⁹ Calakalah imu', ahli-ahli Taurat ge ayo' sok Farisi, ayo' sok munafik! Sabab, imu' umas sibur-sibur ayo' nabi ge ngangkalamus tande-tande ayo' sok saleh, ³⁰ ge nyansana, 'Jika kai laka idup wa masa samma moyang kai, kai kati ao' nangkap bagian nige' ayo' a' sadatn dayya ayo' nabi.' ³¹ Nige' lahdakohlah, imu' ba saksi tahadap adupmu' sadi bahwa imu' anilah kangod-kangod ayo' a' da ngamis ayo' nabi. ³² Jadi, nyukup ta lah ukuran ayo' samma moyangmu'. ³³ Imu' nipa-nipa, katurunan nipa-nipa beludak, langkina imu' ao' ngarapas a' adup umpatn neraka? ³⁴ Karna dakoh, mile mih, Iko' ngutus nabi-nabi, ayo' sok bijak, ge ahli-ahli Taurat wa imu'. nyamani umpatn ayo' a' ao' imu' ngamis ge nyalib a', nyamani ao' mangkung a' ka sinagoge-sinagogemu', ge imu' aniaya umpatn' kota ka kota. ³⁵ supaya samaan dayya ayo' sok benar da gatn nuntokng a' ka tana paitn ao' utukng ka imu', mule umpatn' dayya Habel, sok da benar dakoh, sampe ka dayya Zakharia, kangod Berekhya, da imu' ngamis ka antara Bait Jabata ge papante. ³⁶ Sesungguh a', iko' muji a' ka imu' bahwa samaan hal-hal diah ao' utukng samo generasi diah." Hukuman bagi Yerusalem ³⁷ "Oh Yerusalem, Yerusalem, da ngamis ayo' nabi ge mono nige' batu ayo' a' da gatn ngutus ka a'. Betapa saring a' Iko' ngate ngumpul a' kangod-kangodmu' samahu, samu nige indo' siap ngumpul a' anak-anak a' ka saroh arad a', tapi imu' kati tuh. ³⁸ Mile mih, raminmu gatn ngagatn ta bagimu' ge jadi sunyi. ³⁹ Sabab, Iko' muji a' ka imu' bahwa mule mati', imu' kati ao' mile Iko' agi sampe imu' nyansana, 'Gatn berkatilah Ni' da utukng sadatn gaatn Tuhan.'"