¹ Yesus nyansana agi' ka ayoa' sadatn parumpamaan-parumpamaan, waat-Na, ² "Karajaan Surga bisa gatn ngumpama ulah nyungan raja da umas pesta bainyha' ya' anak are'a. ³ Ge' ini' ngadu ayo panyagu'a ya' maba' ayo sok da laka gatn ngundang ka pesta dakoh, tapi ayoa' kati' ituh utukng. ⁴ Lalu, raja ngadu agi' ayo panyangu da laitn, waatna, 'Mujiatalah ka ayo sok da ngagatn ngundang. Ile', iko laka nyiap pangkumanko'. Lembu-lembu are ge' tarnak-tarnak da gatn ngamanu' samaana nga siap ta. Utuknglah ka paruman bainyha' diah.' ⁵ Tapi , ayoa' kati' padulia' ge' boho, da nyungan ka uma'a, da laitn ka usaha'a, ⁶ ge' da laitn'a nangkap ayo panyangu raja dakoh, nyiksa'a ge' ngamis'a. ⁷ Maka, sang raja baji', ge' ngutus tantara-tantara'a, mambinasa pangamis-pangamis dakoh, ge' nyahung kota ayoa'. ⁸ Lakadakoh, ini' nyansana ka ayo panyangua, 'Gawe bainyha' nga siap, tapi ayo sok da gatn ngundang dakoh kati' layak. ⁹ Ya' karna dakoh, anu mih ka gala'-gala' da ayho ge' ngundang mih nyamani karah sok da kaatn imu' amput ka gawe bainyhak diah. ¹⁰ Maka, panyangu-panyangu dakoh anu ka gala'-gala' ge' ngumpur samaan sok da ayo amput, da bait ge' da jahe'. Ge', tampat bainyha' dakoh panhu ge' ayo tamu.