¹ Pas waktu no dakoh, murid-murid utukng ka Yesus ge' mansikat'n, "Asi ta da paling aihyo ka sadat'n Karajaan Saruga?" ² Lalu, Yesus maba sook kangot inek ka-Ini', ge' mana' kangot inek dakoh wak tauda-uda ayo'a, ³ ge' nyansana, "Iko' muji' da subanar'a ka imu', kacuali imu' batobat ge' jadi ulah ayo-kangot, imu' kati aok maruh ka sadat'n Karajaan Saruga. ⁴ Asi da ngarendah adup'a ulah kangot diah diu'ta da paling aihyo ka sadat'n Karajaan Saruga. ⁵ Ge', asi da narima kangot inek ulah da nyungan diah ka sadat'n gaat'n-Ko', ini' narima Iko'." Paringatan tentang Panyabab Duse ⁶ "Tapi aok'a, asi da manyasat salah satu umpat'n ayo-kangot inek da pacaya ka-Iko' diah, labih bait bagi'a sa nyabuah batu kilangan gat'n ngantukng ka jangok'a ge' gat'n nanggulup'm ka laut da paling sadat'n. ⁷ Calakalah dunia barang panyasat-panyasat da ani wak sadat'n'a! Sa', panyasatan memang arus tajadi, tapi calakalah sok da majaka'a. ⁸ Sa' barekng ato kajamu' umasmu' baduse, nyantak ge' matat'n ta dakoh. Labih bait bagimu' maruh ka sadat'n idup nige barekng da pugot ato pincang daripada umpu dua barekng ge' dua kaja, tapi gat'n matat'n ka sadat'n api kekal.