¹ Lakadakoh, ayo sok Farisi ge' Saduki utukng ya' mancobai Yesus. Ayoa' mahi sak Yesus nyuak ka ayoa' nyabuah tande umpatn surga. ² Tapi ao'a, Yesus naham, "Waktu ngana ngarum, imu' muji', 'cuaca calikng karna rangit taransak.' ³ Ge', ka ngakkap ano, 'Ano diah ao' ani nyaru kuat karna rangit taransak ge' patakng.' Imuk pane mambeda rupa rangit tapi kati'mampu mambeda tande-tande zaman. ⁴ Nyiteng katurunan da jahe' ge' penzina diah nuntut nyabuah tande. tapi nyiteng tande pun kati' ao' gatn mangkatn kaini', kacuali tande Nabi Yunus. "Lalu, Ini' ngagatn ayoa' ge' anu. Panjelasan manganai Bunyu Sok Farisi ge' Saduki ⁵ Jangkah murid-murid utukng ka sambarang tamu', ayoa' karimut minsakng roti. ⁶ Ge' Yesus nyansana wa' ayoa', " Mamprati ta ge' waspada ta tarhadap bunyu ayo sok Farisi ge' ayo Saduki." ⁷ Ge' ayoa' mule nyarita hal diah ka antara ayoa' sadi' ge' nyansana, "diah karna ite' kati' minsakng roti." ⁸ Tapi ao'a, Yesus pane hal diah ge' nyansana, "He, sok da kurang iman, jailah imu' nyarita ka antaramu' sadi' manganai kati' ani roti? ⁹ Jailah imu' masih katinga ngarati ge' uga kati' ingat ao' rima rori ya' rima ribu sok, ge' nyamani karah kabaa damu' ngubu' ka karanjang? ¹⁰ Ato, ijo roti ya' ampat ribu sok, ge' nyamani karah kabaa damu' ngubu' ka karanjang? ¹¹ Langkinatalah imu' kati' ngarati bahwa Iko' kati' sadang nyansana kaimu' manganai roti? Tapi ao'a, waspada ta tarhadap bunyu' ayo sok Farisi ge' sok Saduki." ¹² Lakadakoh, ayoa' ngarati bahwa Ini' kati' muji' ya' waspada tarhadap bunyu' roti, tapi tarhadap ajaran ayo sok Farisi ge' ayo Saduki. Yesus anitalah Mesias ¹³ Jangkah Yesus sampe ka daerah Kaisarea Filipi, Ini' mansikatn ayo murin-A, "Manurut saratn sok, asilah Anak Talino?" ¹⁴ Ayoa' naham, "Mani ungan magaatn Yohanes Pambaptis, da laitn magaatn Elia, ge' da laitn agi' magaatn Yeremia, ato salah satu umpatn ayo sok nabi." ¹⁵ Lalu, Yesus mansikatn ka ayoa, "Tapi ao'a, manurutmu', asilah Iko' diah?" ¹⁶ Simon Petrus naham, "Imu' anitalah Mesias, Anak Jabata da idup!" ¹⁷ Yesus nyansana ka ini', " Gatn berkat ta mu' Simon anak Yunus. sabab inya dagin ge' daya' da muji' diah kaimu', tapi Samak-Ko da ka surga. ¹⁸ Ge', iko' uga muji' kaimu' bahwa imu' anilah Petrus. Ge' ka tummukng batu diah, Iko' ao' mantagutn jemaat-Ko' ge' gerbang-gerbang Hades kati' ao' nguasa'a. ¹⁹ Iko' ao' mangkatnmu' kunci-kunci Karajaan Surga. Ge', jai pun da mu' ningo' ka bumi ao' tatingo' ka surga. Ge, jaipun da mu' ngarapas ka bumi ao' tarapas ga ka surga." ²⁰ Lalu, Yesus mamparingat murid-murid supaya kati' muji' ka asi-asi bahwa Ini' talah Mesias. Yesus mangkatn pane manganai Pangkabis-A ²¹ Mule dakoh ta, Yesus ngamule nujo' ka ayo murid-A bahwa Ini' harus anu ka Yerusalem ge' manderita karah hal umpatn ama-ama, imam-imam, atopun ahli -ahli Taurat, lalu gatn ngamis ge' gatn ngangkidup pas ano da kataru'a. ²² Lakadakoh, Petrus narik Yesus ka samping, nagor-A, ge' nyansana, "Tuhan kiraa Jabata ngajauh hal dakoh umpatn imu! Hal diah kati' ao' suah tajadi wa' Imu'." ²³ Tapi ao'a, Yesus babalik ge' nyansana ka Petrus, "Bohomih umpatn hadapan-Ko, he Balis! Imutalah batu sandungan ka-Iko sabab imu' kati' nganatap pikiranmu' ka hal-hal da umpatn Jabata, tapi ka hal-hal da umpatn talino." ²⁴ Lakadakoh Yesus nyansana ka ayo murid-A, "Sak ani da ituh nganang Iko', ini' harus ngayum adup'a, maha salib'a ge' nganang Iko'. ²⁵ Karna asi da ngate nyalamat nyawa'a ao' kahilangan nyawa'a. t Tatapi asi da kahilangan nyawa'a karna Iko, ini' ao' kaatna agi'. ²⁶ Jailah untonga sak sook aba' kaatn nyamanman isi dunia diah, tapi ni' kahilangan nyawaa'? Ato, jailah da bisa sook mangkatn sabage ganti nyawaa? ²⁷ Sabab, Anak Talino ao' utukng sadatn kamuliaan Sama-A samahu ge' ayo Malaikat-A ge' lakadakoh ao' mambalas satiap sok sasuei ge' parbuatan'a. ²⁸ Iko' muji' da sabanara kaimu', ani mani ungan sok da agutn kadiah da kati' ao' misa pangkabis sampe ayoa mile' Anak Talino utukng sadatn Karajaan-A."