WALRI YEI PEKOTE BAITE SUKUMBUKO NEPELRE MENDAINA DETELROTE POYE MEKOMBUKO ¹ Nepe, ei bulrate sekaipeko, Walri Yei nenei yo budisunasute yowe. ² Nepelre, teyowe, mendaina detelro ku awlra bulrane tenoyowenate. Doukainyelre yaye nemenakaye nena telrepelrete temupuko, Walri Yei mendaina detelrote saneyounu, "Wei [wena] kenate dusungkonde, delrei Yei, wena psko nepete baite sukuwupukalre." ³ Nemenakaye, mendona-mendona detelro si nenei kenabulrune elriyaye, "Da detelro apekote elrewe !" ⁴ Nemaneye, Walri Yei nena mendote nepe nimeyumupuko, Ne saneyoumu, "Beyamanepote mendo pekote wei kea bulrune mekauwe? ⁵ Beyamane apoite santeweponde, 'Wena pekote baite sukuwukalre,' mbai, 'Esuemime nepelre oto te ewe' ? ⁶ Netenate, we nimeyenembombena da yo bulrana Walri Yei kena delre re detelro kena pekote baite sukunemlre." Nepelrenaye, Walri Yei mendaina detelrote saneyoumu, “E'su e'mime wei ku awlrate e'lretune, nepelre dite ewe !" ⁷ Nemenakaye, ne e'suemike nepelre diteyouwe. ⁸ Nepelre, detelro dopelre nena kembalri mekopukonate tiyainye, kembengte bitiyaye, nepelre Mang Walrite kapiyainye. Nena kembalri delre detelro kena nelrone mekoupikonatena. (MATIUS PAJAK KOPLRIYONUNA WALRI YEI TE TAKUNULRE) ⁹ Nemenakaye Walri Yei nepelre dite yowe, Ne teyowe Matius pelre simimbukona detelro, pajak kopriyonuna nowne nekeyowe. Nemenakaye, Walri Yei nete saneyoumu, “De te tawutulre.” Nepelre, Matius e'suemukunakaye Walri Yei te takunulre. ¹⁰ Ne suselrei Walri Yei nekeyowe sate ne miye'ne aneyowe, teyowe, pajak plre kopiranyena detelro nepelre peko pelre mekayena detelro miyaye, nepene nikiyaye sate Walri Yei pelre Nenei ototouna pelre sate nembeiye aniyaye. ¹¹ Nemenakaye, Farisi detelro kembalri mekoyowenate tiyanye, Nena ototounate smiyanye, beyamenapotenate wena kilri-kilri pelre kilrimuna detelro, "Nepelre detelro peko pelre mekayena detelro, pajak plre kopilranyena detelro pelre sate nembeiye aniyaye?" ¹² Nemenakaye, Walri Wai ne ate betopuko, nete saneyoumu, "Sa mekoipanya detelro tabib tena duweipa, samekaimena detelro ye tabib tena duweiye. ¹³ Netenate, embe nepelre poye olronembombe, 'De poite mekombenate kenate danalre, doitena ambai,' netenate demiyalrena detelro poitena simipai, Depe detelro peko kote miyalre. ADELRE ANIPAINYA KALROTE SIMIYOUMU ¹⁴ Nemenakaye, Yohanis kena ototouna Walri Yei kote miyayenakaye simiyanye, “Beyamenapote dembelre Farisi detelro pelre puasate nikiyande, nepelre Wena ototouna puasa tena nikipai?” ¹⁵ Nemenakaye, Walri Yei nete saniyoumu, "Baynyang do nembelre nembe'ye nekayena, baynyang te taukanelre miyayena yo kena sete tuwayanye? Nepelrena, neya dounenelre mendena bainyang dote nenalre baite dounainelre, nepelrenakaye ne puasate nekenaye." ¹⁶ Detelro mayon sumu baite besaipekona, mayon nemene tike'ipai, nemane mekonaiponde, mayon nemene tikeinaimbondena, mayon sumute baite besembonde, nepelre besaipekona nou delre dumbonde. ¹⁷ Nepelre, detelromanipana anggur yansina tengke ye'itena dilripainya. Nemane mekonaipondena, anggur tangke tiye'naiponde, anggur tangke pelre pe'ko dunaiponde. Nepelre, ne anggur manimpana pelre semate bebenamane nekenaye." WALRI YEI DEYEMBUKO NEPELRE PIYE MEKOMBUKO ¹⁸ Walri Yei nekalrote nete saneyoumu, tenembe, detelro mbei ibadah miyene belrengkate nekewena meyowe, nepelre Nete yengkengte dusunkuko, nepelre saneyounu, “Dena yei milre manimba tetepuko. Netenate, mewe wena mete Nena eubulrane kelrouponde nepelre ne deyembonde." ¹⁹ Nemenakaye, Walri Yei saseke ne detelro te taukunulre, nepelre Nena ototouna lati. ²⁰ Nepelre, tiyaye, milre be'iska mai mebe sunabepelre nikite mekoyouwena Walri Yei kena e'utoute metosulre youwe, nepelre Nena mayon tute meye kelrouku, ²¹ neplre ne milre nenei eute sayounu, “De Nena mayon tumote kelroutelrena, de nepe poi duteponde.” ²² Nemnakaye, Walri Yei bulrunsuku ne milre te teyounu, nekaye saneyounu, "Wena kenate ane dusungkonde, dena Yei, wewi telrepelre, wete poiye mekowupuko." Ne suselrei lrati, ne milre poiye dupuko. ²³ Nemenakaye, Walri Yei, walri ongko mie' belrengka kena mie' teyowe seruling pelre mapiyayena nepelre detelro-detelro tenoyouwena pelre nena palrimena pelre beyowe, ²⁴ Ne nedetelro saneyoumu, "Ne yei milre titipai, neme'ye kute tenowe." Nepelre, ne Walri Yei deye diyanyeng. ²⁵ Nepelre, detelro doplre'te se'kemupuko diyasute miyaye, Walri Yei esute yowe, nepelre, neyei kena mete kelroukku, neplrenakaye ne yei milre nepe saseke. ²⁶ Ne a dusupuko yote-yote walriyowe. WALRI YEI DETELRO BESELREI DOU BISE NATE DEYEPUKO ²⁷ Neplrenakaye Walri Yei nepelre dite yowe, ne detelro doubis'ena beselrei Nete taukeinyelre alra mopelre se'kimiyoye, ''Daud Yei, detena kena bis'e dipeng." ²⁸ Ne pe ne miyete esute yowe, dow bise'na detlro beserei nekote miyoye, nakaye nete simiyopu, "De damena kembalri te mekalrena we trepelretena elrauwe?" Ne, Nete saniyanye, "Ya, Mang Walri wai !" ²⁹ Neplrenakaye, Walri Yei, nena dow bulrane mete kelroupuko, nete saniyonu, "Byamena tu kilrindena [mekondena] nena wena tlreplre telre b'ulra mone nekaye." ³⁰ Nemenakaye, nena dow nepe kiya te tiyoye. Walri Yei nete asete tayomu, “Doute poye tembe, da kembalri mekopukalrena detelro sibete pelrena tena nime'yipainya." ³¹ Nemenakaye, ne diyate yaye nepelre Walri Yei kena ate e'mukuna yote saniyayme. WALRI YEI ATUNA DETELROTE DE YEMBUKO ³² Ne dobe nepe diyate miyoye, tiyoye, detelro atuna detelro alru peko-peko kelrokunulrunate Walri Yei kote miyaye. ³³ Nepe alru peko-peko sekembuko, ne detelro atuna nepe ate elreyowe. Detelro doplre kembe'te bitiyaye, "Nakaye elriyaye Israel na da kembalri bete pelrena itipai nikiyande." ³⁴ Nepelre, Farisi detetro saneyumu, "Alru peko-peko kena delre polre ne alru peko-peko baite se'keyoumu." EUTE DUNAYENA DOPELRE, KEMBALRITE MEKONAYENA KEKAU BETE ³⁵ Nepelre, Walri Yei yolre-yolre walre yowe, Nena Walri ongko miyene sinagoge-sinagoge nete kilriyomu nepelre asena Walri saneyomu Injil Kerajaan, e'metelre sa nate de'yeyomu. ³⁶ Ketika Walri Yei ne detelro doplrete teyomuna, Nena rasa kasihan kepada mereka karena domba gembala ambainya mane. ³⁷ Nepelre Ne nenei ototoute saneyomu Nena murid-murid, “Telrepelretelre, eute dunayena, dopelre nena kembalrite mekonayena kekaubete.” ³⁸ Netenate, Walri waite diyinembe, Ne nenei eu pelrena detelro, kembalri detelro mekombonde menaye."