¹ Neye peu sine-sine ate elre telrenanepelre Malaikat kena peune elre kelrena Denalrena bise ambainya tong kulrung walrewena mane eumena beke ambai. ² nepelre Neye karunia A Walri te elre telrena neplre metelrena A kalro nekeiyena nalre pukona pelre Nena euna meterna telre pelrena nekendena meko dasu lrena disutena nende Nena euna bise ambai nena melre ambaimo. ³ Meterna Nena Medekona sate osoi detelrote yatetemelre anenaiye, nepelre Nena pelre yu upai nekewe. ⁴ Bise kenate titau ponde nepelre kena sekoi-sekoi, eine nekewe detelro sitna yembetena nikipainya, wei delretena elri painya nepelre kaso pelrena kilri painya. ⁵ Wena yeko nulre-nalre tena kilripainya, wei eutena motena dwoei painya, wei delretena elri painya meterna selrai beitena dini painya, detelro sikno pekotna mete bei painya, meterna. ⁶ A walri kalro te mena kena kalri koipai, nelnate A walri yene nembeiye kena kalrite komalre. ⁷ Ne bise eine meternate we tapembe, meterna sate telre pelrete elren belrene kalrote kembe, kenate titau bombe meterna sete weye elri timbe. ⁸ Ne bise nekewena tupelre kitipainya, ne kalro tena Ate elre yowe, nenate baite tenem bombe, ne peu, nepe pa neketembonde, ne mendo kalro nepe nenalre bonde. ⁹ Netnate, walro site nime yombekonate nepe sani yamme. ¹⁰ Nemna, yatena yuwupukona mendena, nepelre posimena dite nenalrem bonde. ¹¹ Ne yeining-ning slreina, ne yening-ning kena A mane elre yawe, Nena mendo yeinin-ning mendote mekoyowe, nepelre mete beyowena yaining-ning mete beyowe detelro selreite meyowena yeinining kena kena yeko ane eu kulru puko. ¹² Netnake menayana doute base-base naane slromine poi ye tembe, diya selrei kena wei bete bei-beite tembe. Mena yana, Ne posi mote dime yumbuko, wambe kambitena na We meterna mane we nime yumbon de be, De meterna we nepe nime yatupuko. ¹³ Netnate menanyana da amainin none neme nekenaiye, ne nekewena telre pelre, nepelre none nembombe, neplre bise doa kalro nanim nekaiyena delre telre neke wena bise.