(Toni kurung mekasu na) ¹ Damane Malaikat mekasu na toni kurung te mapu,de ye dou tane meya beisika serore apa erumbuku dayo kani damba,nena meka pa ikainie tepu na tung kani mau numburu. ² Neye kani mau numburu te tusuku,sing yupu mane buna pa nepukuyu sing sengkai detere dambere,soning pere sero pere a kepe kepe mane damena sing yupu ne. ³ Nepere ne sing yupu buru re orlomai dero dero da kani damba mai da yo damba wande ne seraibra te wake po te ikaimie wape depa mane da yo dambene. ⁴ Neyo seraibra te wikaimie sepo sepo da yo dambena peka mekoipeinya,sa meraburu wande o dopre tepainya pa,damane we ye ende na ne yo seraibra te wape mende Awa mang tetero nena tupu nena yeko nena paitya na ambai keipeinya tetero kwa. ⁵ Ne yo seraibra wape depa tetero yei tena no tena titipei,nemei bei ye wa kesa kesa te mekonaimie oko mekasu bei serei;tetero yei nena wa te wape depa kamenda a ne naimie. ⁶ Nemena serei tetero yei tete nipi te wurenai dou teipei kenaipinie.ne yo seraibra tete nero pa kena te kenai nemane tete ne na nero na keipei ambai tere ⁷ Tobese orlomai seraibra nenei wa te Kuda seraibra mane orunaipinie pera damba na te dero dero yepone ne na tenai dambena wenta emas,ne na be tetero mane, ⁸ Ne na mua mire kna nua mane wande nena eti Singa kna eti mane. ⁹ Nemane nena nambo zirah mayong besi,neto kurung nemane kereta dero dero ne yepone Kuda seraibrabra nete are oto yeponai pera damba na te dua di warkai yeu. ¹⁰ Nena deme tupu wapedepa mane serai dopre da tetero yei te mekonaimie wa serai te aye nepenai oko mekasu beiserei. ¹¹ Andewapona ne na a kirine ne yo seraibra te atekome mekai ne na wa do Malaikat kani mau numburu Ibrani peu na''Abadon'',nena wado nemane deraitie Yunani peu na wa do''Apolion''. ¹² Pepoi peko besika na dua da yambikite dua di yeu,nemane pepoi peko biserei neme da kei nete tikamane e damba da mene. (Toni kurung mekasu su na beisika) ¹³ Nemane Malaikat mekasu suna beisika toni kurung te da mapu,de ye ate beta sa yemo aprau bei dia Altar emas Awa mang tetero nena waye ne bekounue, ¹⁴ Ate seiyunue Malaikat mekasu suna beisika ne na wapa baya amupunue ne Malaikat aprau beinya te sate yerarupune Efrat marwai detere ne.'' ¹⁵ Ne Malaikat aprau beinya deraiti te dua tepai nenei soning te ya te oko te mai te tekainimai tetero yei te note titinai nena tereng payem naming serei pa. ¹⁶ Pera yo nena tereng Kuda dambere na siri doa beisika dena bentekei ne betoupuka. ¹⁷ Nemane deye dou tepuka Kuda dero dero ne wande ne yo seraibrabra ne dambene;mayong zirah besi sai nimi tere,nisi nisi mane,yang ko bu basi;Kuda nena tenai Singa kna tenai mane wande nena emburu sing peu peu yupu arunue yangko bubase namu ayi tepe nene orubimbiring namu. ¹⁸ Pepoi peko naming serei bepa kiyaipiki tetero yei te payem naming serei pa no te dua da titaipiki no dua sopuku,sing namu dambere sing yupa wande kani ai namu neyo seraibrabra nena emburu re. ¹⁹ Nemane Kuda nena wake tupu emburu pere demepere nena deme wari wa mane,wande nena tenai dua keu na pepoi peko nena tenai pere deme pere da tetero yei te peko mekaimie. ²⁰ Nemane da tetero yei pepoi nou nue da werai yereu te kai,nemane deraitie pepoi waro pa na mipei nena kembari te mekai meka semo na sa,aru roh roh peko tena tawinipei eipei wande do sna sna patung emas,perak,tembaga,oru na nemane ona,nena dou ambainya sa dou teipei,bentekei betoipeinya wande oto te na waripei, ²¹ Ne yo seraibra nenei wa tena pepoi damba na mipei wa te apa na disingkroipei song berote songkerai te mekai tetero yei te no te titai,bero te mekai,kaimie te mekai wande sa bisi te sasyaisi tetero kna te yekai ourai.