(Andewapona nena dia mai tereng siri beisika serei pa kene) ¹ De ye dou tane Malaikat sibesika sero diare apa da meke nena meka dambene da tepu. ² Ne Malaikat naga te wari mang wari te sekai do nari dote da meka awe ke.nepere ne Malaikat naga wari mang wari te arai sa detere nena wa te beiyupuku nena mai tereng siri beisika serei pa da kene na, ³ Nemane Malaikat ne naga wari mang wari te apa susunsuku nou yeye pa da kani maupa,nena buru te dua da perembuku mie nipi numburu nena tung o tene damba da sesuku tenou.ne naga wari mang wari ne kwa nada seraibrabra te mendo te na yekoitimipei damane mai siri beisika na maning dana tupu re dina tupu pa na maning eipei noupa na mekoipipei nepere ne te baipa da tambiki ya bete tiki bai kembine ne naga wari mang wari o pepoi waro peko waro dina tupu re Eden kani re dana tupu pa da meke. ⁴ De ye dou tane dai dia dai meta kreu meta dambene tetero seraibrabra ane kai ne yo nena damba tupu te na yeko kaye te wasinai.de ye dou tane wa nuru ne yo seraibra nena tenai te baya pereyai no te titiyai damane yei Yesus nena wa do te seiyiyainie wande Awa mang tetero nena a sena Firman te nou nue da poi tepiyai ne yo seraibra da srainya sa wari mang wari tena seso tipinipei nena do sna sna tena kena dereinipei nemane paitiyane meka ne nena sengking semo keipei ambai;nepere ne yo seraibra ne kwa yereu poi damba Kristus pere andewapona mane akiri ne kate suwe na dambere mai siri beisika sereipa. ⁵ Nederaitie tetero si dua tete damba kainya esua na yiyembipei ane neme da tenonai mai brabra da kenai mai siri beisika serei pa da beisika na te da esua tete nero re yinai yembine. ⁶ Piyambai tere mro mro tere tetero nena pepoi tere da beisika nare esua dua yembuku.tete da bipa na ne kwa na nena damba namipei,nemane Imam seraibra mane Awa mang tetero pere Kristus pere nebeinie da kenai andewapona mane seraibrabra nero ne akiri ne kenai menai mai siri beisika serei pa kenainya. (Sekai te bai pa tikensiki) ⁷ Mai siri beisika pa dua da meke,sekai te ne na tu ere eyure kiya pa dewa da tambiki meke. ⁸ Sekai nedo seraibrabra nena mendo te yekoutumue da aru nipi numburu aprau sereinya da yo kani dambena pa ne nou ne na wado Gog pere Magog pere nenei seraibra te koipirainie nena tereng kisi yepa. ⁹ Ne yo seraibra da yo kani dambe te meye dua da deko wande tetero mro mro seraibra te nena nou te dua da atinayim kriko nebei pa diane yone.nepere sing peu peu sero dambere apa da meke ne yo seraibrabra te sing baya senomupuku. ¹⁰ Sekai ne ye da serai brabra te mendo te yekou tumue,baya sing dekainya damba da kengkainie oru kisi kisi namu damba,ne nou nue srainya sa wari mang wari pere Nabi temberari na pere nena peko tere dambene dai deneng nemena beitie. (Tu pu tena peko tere damba nepere kaye te wasine) ¹¹ De ye dou tane dai dia dai meta kreu meta ne kreu kreu bei ye nedo A-I ane da keu nedo A-I nena bekoure kani pere sero pere dua da karipiki ne kwa na dou teipei da. ¹² De ye dou tane tetero no detere mere newai esu ne da tepai dai dia dai meta kreu meta ne dambene bekounue da tepai,semo kepei si bete yereu semo kepei te baya da biransiki tetero dua soyou tete damba kai kaye te da wasine nyei nyeinie ne nenei kembari poi dambere damane da semo kepei eyupa dua da meraipiki. ¹³ Nau nero ne soyou na tetero nau eyune kainya kiyapa dewa menai,kani mau sere dia numburu da tetero soyou na te kiya pa dewa da menai kaye te wasine nyei nyeinie nenei kembari poi mekeyainya dambere poi damba dua da nai. ¹⁴ Nepere nemane kani mau numburu pere sere dia numburu pere sema te tepeinya do bisereinya mane sing peu peu damba da teyinai krone dekenei tete nipi da bipa na nene;nau nero sing peu peu ouraipiki dua da sekaipiki dekai. ¹⁵ Nemane tetero yei nyei nyeinie nena wado yereu semo kepei pa na mereipipei bainya sune nemei neme kene na ne tetero yei sing peu peu dekainya damba da teiyinai baya dekenaipine.