(Babel apa buruteke) ¹ De ye dou tane Malaikat si beisika sero diare apa meke nena wake tupu detere nena wa kiya da yo kani dambete poi kiya erembuku. ² Ne ye ate arma tere seiyunue,''apa dua buruteke!apa dewa dusupuku,Babel dia yo detere!nepene ne nou nue da aru Roh roh peko seraibra ye pa kauraipikikai meye na mane aru Roh peko sure na wande awe seraibrabra nepe ne yene da kai peko tere yembe ekri nero ne da kai. ³ Seraibrabra meye na mane Anggur bu te nepene anaine na wambo te braine nepete merainie kaimie keneng te derainie wande andewapo andewapo da yo kani dambena kaimie keneng kembari te nembere nepene ne nounue da mekai nepe ne da kai nepere nemane sasyaisi nai tetero da yo kani dambene kainya wate nou pa dua da mekaipiki nena wa ne merembuku nate da atekome nemena da wambo te birainie merainie.'' ⁴ De ye ate beta sero diane,''baya dua ende dedei umat seraibra,nepere baipa dua di ende we nena peko tere mekou na nero ne warende we ne peko dambere wei po pere donde. ⁵ Da pepoi peko tere ne damba damba sero pa dua da saweke wande nepere nemane Awa mang tetero neye mendote mekou nue nena peko tere mekainya pa. ⁶ Damane nena dia te yo te baya dingkerupunue nemane ne ye meke you namane,nena damba kurupunue da biserei ne damba damba nena kembari mekeyou na mane wande bu teu ne ye da tepiyou nena meka dambene da biserei ne damba damba da burumbune kene. ⁷ Nemane ne dia ne yo ne mire nena damba wa kesa kesa te wapiyang piyang te wande ne ye do korute da kene,nena pepoi te dou tiyounue nemena sa nimi dambene bubu kra ne da kiyou.nemane neye nenei kena ne ate da seiyunue,de ye diane betra yare dambene weng ratu mane da ka,depe da ye mire soiy ambai bie de ye do koru tena keipei.' ⁸ Nemane sate nate da mire nena damba peko waro ya beisika da mene nemane siso biro kiyambine,do koru te da kene,munune kene na mire ne mire nete sing damba enaiyintine dekene nemane Tuhan mang tetero Awa mang tetero ne ye kaye te wasine ne mire nena damba mekombine.'' ⁹ Nemane andewapo andewapo da yo kani dambena kaimie keneng kembari te mekeyai ne mire nena wa ne pepoi te da dou tiyainie wande di mite da dimai kena mereipei da derainie dou da tai sing yupu orunena pa ne mire te sing damba dua da entiki deku, ¹⁰ Ne yo seraibra bai tere ne esu ne da tepai endikite da dekai ne mire nena damba peko tere waro dewa da meke na,wande ne yo seraibra ate seiyainie,peko tere bie!peko tere wena damba,wei dia yo detere,Babel dia yo wake na ena wa kepo apa dua ke damane soning beisika serei kaye te wasiyou wena damba da yeko te da sarupuku meke!'' ¹¹ Nepere nemane sasyaisi nai tetero da yo kani dambene kainya dimi teda dimai damena mendo werai,we ye da kiye dete da ateyeme,damane mekoupuke tetero ne kwa na sasyaisi tena oripei nai smo smo mena ne kwa na mekoipei dera tena oripei keroipei, ¹² Sasyaisi nai sa tereng dopre emas,perak,dou smo na sa mutiara,mayong lenan busu tere,mayong ungu,mayong sutra,mayong nimi kirmizi,sasyaisi o bete perlo pepoi tere,gading sasyaisi,o dera kasopere na tembaga,besi,marmer pualam, ¹³ O ere pepoi tere,o ere o kepei,perlonai sasyaisi,mur,kemenyan,Anggur,meraibu,tipa base,gandum,seka aprau na lembu sapi,domba,kuda,betra,kereta,oto touna nemane tetero yei nena wanuru. ¹⁴ Ne ye ate seiyainie,meye na mane dua da karuaipiki ona dopre na we ye kena te kiye na,wande sasyaisi piyambainya pepoi pepoi we na re dua karuaipiki ne kwa na dou na tembipei.'' ¹⁵ Ne yo seraibra sasyasi nai tetero nenei wa te nou pa dua da mekaipi kiyai ne mire kna re nedia re ne yore esu ne bai tere ne da tepai endiki te dekai damena peko tere da mire kna pa dewa da meke wande dimi te da dimai kena mereipei. ¹⁶ Ne yo seraibra ate da seiyainie,''apa dua da buruteke!apa da buruteke,dia yo detere wena mayong lenan busutere,mayong ungu mayong kirmizi nimi emas ne te da sewambiki dou na sa pepoi Mutiara pere soning beisika serei sasyaisi meye na mane tereng dopre teme dua da ouraipiki! ¹⁷ O derengke iduru mekodawai nou nero ne nena kembari yei pere wande tetero meye dero ne yereu kembari te wureinya nau dambere dou te da tai, ¹⁸ Damane ate seiyainie,dou te taru sing yupu da buna pa arune ne mire ne dia ne yo sing dua deku.mo dia moyo da mire pere ne ye nemambei?'' ¹⁹ Ne yo seraibra tipa te tenai damba kerai ate seiyainie dimi te dimai kena mereipei derainie.apa dua buruteke!apa dua da buruteke dia yo detere ne mire nepe ne da kiyou tetero meye o derengke dambere wariyai nau dambene meye da dia pa da yo detere pa da mire pa wariyai,damane nepreinya ambai waripei nena sasyaisi poi poi ambai soning beisika serei teme dua da ouraipiki. ²⁰ Sero dia na yo kena karite da derainie,Babel yo detere apa dua buruteke,we tetero seraibrabra mro mro dambere,dero na seraibra yauna Rasul rasul pere Nabi nabi pere eiyei Awa mang tetero ne ye ose dopre nate nemire nena damba we tante sa te nate. (Babel ne ye nekwa na esuwa na yembipei) ²¹ Nepere nemane Malaikat si beisika nena wake dopre na oru detere te eruteke nau eyu pa apa da kengkene,ate seiyunue,''Babel dia yo detere apa arma tere dua da kena kainie ne kwa na dou teipei. ²² Kecapi kurung dimi semo kurung suru meka kurung seruling nemane toni kurung trompet sangkakala da mire nena wa nerona derenipei,nemane oru sua sua burune yembune na kurung baipa da danu nane kwa na ambai wande meke smo na sasyaisi te mekainya tetero ne kwa na mekoipei ambai tere. ²³ Sing serengka kiya de kipei do yei nena akurung betoipei mire yei nena akurung betoipei da dia ne da yone da mire nena wa tou na dopere mire perena waripei sasyaisi nou tetero dere dere da yo kani dambene kainya bero te da mekai seraibrabra te metere mendo te yekoitaimie. ²⁴ Nemane ne dia ne yo ne da mire kna wa.tou nue da tetero wa sa Nabi nabi kna wa sa tetero mro mro seraibrabra nena wasa nemane wa sa tetero meye na mane da yo kani dambene baya note titiyainya nena wa sa.''