(Srainya sa nau eyu re kiya pa da meke) ¹ Deye dou tane srainya sa beisika nau eyu re kiya pa da meke,nena sa yemo mekabiserei damba wenta mekabiserei keraipiki nena tenai nyei nyeinie wado wado te peko tere da meraipiki. ² Damena srainya sa de ye dou tane macan tutul mane,nena seka aprau bei beruang mane,wande nena emburu singa kna emburu mane ne srainya sa naga wake pote srainya sa si kna damba ikinie,dia pere betra pere nena damba wande sasyaisi metere detere. ³ De ye dou tane nena tenai si beisika kekou mane da mereu dua tetembi nena mane mekou,nemane ne kekou poi dua orupuku.da yo dambena seraibrabra tere tere mane ourai ne srainya sa te da tawekainie werai. ⁴ Ne yo seraibra ne srainya sa naga te seso tipainie,wande nena wake pote srainya sa si kna damba ikine,''wande ne yo seraibra ne srainya sa te seso tipainie nepere ate seiyainie,simi ye da srainya sa mane wande simi ye nembere pera te derenei nie?'' ⁵ Nena emburu ne ate nemane temberari seiyunue a peko te da sanumue,wande metere nena dambene da damena kembari te da mekone oko doa biserei 42. ⁶ Ne ye emburu te kura tepu ate poi peko seiyunue Awa mang tetero nena damba,nena wado te peko te da seiyunue,nena yau pare kemah wande ne yo seraibra sero dia ne da kainya pa. ⁷ Ne te senambiki tetero mro mro seraibra te pera sangku nenemsine ne yo seraibra te apa sonem senone nena damba nou te metere da ikainie tou tou meye ne mane,yo dundung yo sepo sirinu kerainu,peu nyei nyeinie wande seraibrabra metere na mane. ⁸ Meye na mane da yo kani dambene kainya ne te seso tipainie,nemane tetero nena wado yereu semo kepei pa na mereipipei da bai sirikra damikra te mekeyainie Domba yei te tewaipiki Anak Domba. ⁹ Tetero nyei nyeinie nena bentekei kenainya da ate betonai: ¹⁰ ''Tetero si newai si kna buru ne kene na,nou nue neme da kene;simbiyang te ayeko te senaisine na te mete ka yemou ne no te tonaiyipine,nemane nete dua da nai asone ne meteka yemou ne.nepere nemane tetero seraibrabra mro mro nenei kena eyu ne nou nue sawe tepenaipinie.'' (Srainya sa dayo kani dambere kiya pa da meke) ¹¹ Deye dou tane srainya sa si bete kiyapuku da yo kani eiyu re kiya da meke;nemane ne srainya sa nena sa yemo biserei Domba yei mane,ne ye ate da seiyunue srainya sa Naga si mane da. ¹² Da srainya sa neye mekou na metere wake tupu srainya sa metere te na beisika na nena bekounue mekou nena dou dambene.damane mekou da yo kani dambena seraibrabra meyena mane da srainya sa beisika na te seso tipainie,nemane nena kekou detere pepoi dua orupuku. ¹³ Ne ye yeko kembari karo te mekou,ne ye sero dambere sing deku nate apa dayo kani damba tetou tetero meye namane dou dou da tainie ¹⁴ Da yo kani dambena seraibra te ne ye wapu mue yeko karo site site kurumu,nena damba ikainie ne kembari te mekone srainya sa beisika na nena dou dambene da yo kani dambena seraibra te ne ye sanumue do sna sna te mekonai nepere nemane srainya sa beisika nate pepoi ate seiyinai nie nena kekou meteka yemou da pereyai nou nue neme yereu te da keu. ¹⁵ Nena damba wake pote ikainie waye mekone da dosna sna nena wanuru srainya sa mane ate nemane seiyinene be arma arma tere da orunaipinie,nepere nemane tetero meyena mane da do sna sna srainya sa te seso tipinipeinya no te da titinai. ¹⁶ Ne ye mekou puku tetero yei neku newai detere meye na mane,nou pa mekou puku,nare nare mane nenei dambene,beiy si kna burune nena meka metere sune beiy paitiya ne, ¹⁷ Damane tetero si newai sasyaisi teipei wande sasyaisi nai smo smo mekoipei,nemane neyo seraibra da yeko waro smo sengking mane wa eyu ne dua kainya nena beinie da kene na da yeko da srainya sa nena wado. ¹⁸ Simi ye nena mendo noupa dua sawenainya,ne ye aye ne te benembine,damane ne sengking semoe da tetero yei nena wa ne dane keu na ne sengking semo mekasu suna beisika da naming serei pa benambine.