¹ Kaimpa, Yesus lengko teangku-Keke makele pa nafeng keweleng ko bate feng , pa toto tete pate haee. ² Ke tekelefe ko pifeng Tatake tetete pa tetupipi. ³ Ke lengte te, ''Jaungra lengma e ehahaka arina, hana,hang ongna, taimbena, ana ing-angra rori hingtung. ⁴ Ere panera ekengre, elee ing-angko ehana jenghing. ⁵ Peana teba e terere ongte, kota ing ewe litete pa tu mehepapa wa tang e meme peana jahope pete tea.'' ⁶ Kaimpa tebafa rasul teja pa tepajo e bame-bame pa Injil pitete e pa teba-teba ne e tete pate ne hae e. Keeng tape Herodes Yesus kea ⁷ Herodes, kebari jeng ing-ang,kele late jaing lewang pa ke engtape peapa teba faung tenie keing Yohanis Pakeleng patehe ete kelefute keka teba bing ete, ⁸ ana ing-angra tekaung tenipate keing Elia ketuju, pa tekaung tera nie keing kebaung keka teba nabi po teme felangro toto tea telefute. ⁹ Herodes lengte, ''Niwe Yohanis rube keke nilu. Ba me pimami-Ke nilelate pifeng anaing?'' Peanya, Herodes kepungle tafawo keti Yesus lakelele. Jajong wete Teba mambire rerefa Napang ¹⁰ Poing rasul faing temupute tewe hoho tete Yesus ja lelepa janotere pa Ke lengko tewate tefa tete kota ing bati Betsaida. ¹¹ Ana ing-angra teba nawo teri jaing pa tera telaKea.Peanya,teba nawowe tere, Yesus pikelete tea Tata jengke pateka keleko tera nehae. ¹² Poing bang ingte rapang, Yesus teangku keke tetuKe, ''Elengko teba-teba ing tete teba bame-bame pa jengta wea ko jeng ung elee e jeng ing pongfaroropa.'' ¹³ Kaimpa, Yesus lengte tea, ''Ea ja eleleng te tang-tang.'' Teangku-teangku Keke, ''Tenite hang ong nenewe napang pa me hingtung, ana newe nene jajong jata neteko teba nawo wea.'' ¹⁴ Kefu teba lengfa nawo mambire rerefa napang. Yesus lengte teangku-teangku-Keke, ''Elengko tetajung lung-lung tete te aha tete teba lung wakote mambire rerefa napang.'' ¹⁵ Pea te tela ana Yesus lengkotu pa teniko teba nawo ing tetajung. ¹⁶ Pa, Yesus hang ong napang ing kele pa hingtung ingra,kelena ho ete petang, ma kele,keje-keje, pa keleleng te teangku fakeke ung teretupa tere nini teba nawo. ¹⁷ Pa teba nawo jajong tetangko hulang. Kaimpa, hang ong jong-jong ing teluko na hampa pitafa. Petrus lu Yesus ing Tata ¹⁸ Bang ungpa, poing Yesus keti lupompong kelei kewofa,teangku-teangku Kekepa Kepa telupa, Ke kengte tea,''Niweka Niba eba nawo e lu?'' ¹⁹ Te nite, ''Yohanis keba palengpa tehe ete, tekaung teni Elia, pa tekaung tera teni Mewe mera meba aling mema nabi-nabi po toto elefule.'' ²⁰ Kaimpa, Yesus lengte tea, ''Wa,pung e e, niwe Ba?" Petrus lengte, '' Me ing Kristus mema Tatape.'' ²¹ Ana ing-angra, Yesus lengte tea pi nafeng kele pa kelengte tea ko baungra hoho eleleka jawea. Yesus Keleng Ke wawle ²² Kaimpa Yesus lengte, ''Neba Ko feng kewe kapa fifile pa teba-teba huhu,imam-imam rube,pa teba-teba ropu fojang, keteja pa bang hengtong kelefute.'' ²³ Yesus lengte tebapa ing-ang, ''Ana eba tuho me punglepa mepa Ni, me ne meme mealo popo, pa bang-bangfa salib mepe mukoko, pa mepapa Ni. ²⁴ Pea, baungka me enako lengtung efeng kewe,ana lengtung meme kelengti. Ana ing-angra, baung ba lengtung meme lengti kole Ni me hefeng mpepe pe. ²⁵ Ka efengna meba tuho fitong tupa mepepe, pa mewung pa lengtung memewo kera lengti ²⁶ Kewete ba merowo kengpa te Ni pa piti Nine, Ba kowe kera rowopa keng kepate ba kepungle po ketetele Ke kala lelepa Keke pa lelepa Reke Keke,wala teba fangpa teing tuwo. ²⁷ Ni bamuangwo leng ele e, teba nawo narang-rang tela epa erule wea ewung kale emuko Jeng Tete Tatake efofole.'' Yesus tena Musa pa Elia ²⁸ Wakotu bang nahingpang Yesus jakenalung Keleng i, Ke kefaka Petrus, Yohanis, pa Yakobus te ete pe lupompong tetete te. ²⁹ Poing Yesus lupompong kelei. tangha-Keke pepu pa te ro Keke tutu jabebewa. ³⁰ Kaimpa, teba hingtung ne teang Kepate pitete. Teba hingtung ing teing Musa pa Elia, ³¹ Ne tena keang tera ne efengwo pa pitete e ing neba wung nete wea. Yesus lelepafu kelete papatu Yerusalem fua. ³² Wakotu bang ing-ang, Petrus pa teba hele keke tewe lufape tafa, kaimpa tewe bamuang-bamuang tangha a, tekarengte Yesus fefeke pa teba hingtung Kepa telupa tere. ³³ Po Musa pa Elia Yesus teri fafate, Petrus lungte, ''Koru, efengwo ne tene wea. Newe fate hengtong nere nunute aling ung-Meme, aling ung Musa, pa aling ung Elia.''Peapa, Pterus hu kewete paka ja ungka pi kelei. ³⁴ Poing Petrus jaing keleng i, atu petu tewe pepe kaimpa Petrus, Yohanis, pa Yakobus tefe poing tekengte me atu ³⁵ Kaimpa, le telate pina wa atu ing-ang, Kawe Ko Nine, Kea ke Nike, le elae Kea.'' ³⁶ Pina ing wakote witeru, Yesus tefi kewofa. Tewe tejape fengwo pa baungra bang-bangte hoho teteka jaing tefo. Kebaung Ko Baleng Bate Feng muing Kekofa ³⁷ Wakotu febang, poing tera pe hetu,teba fa nanate tete te Yesus, ³⁸ Kebaungka teba fananate kehiwa, '' Koru, ni waele Me, ko nineka mefu kewe ko nine nale aling. ³⁹ Me kafu, bate heti mule pa keuile-uile. Bate ing-angra ke kelete-kelete kaimpa lang uwe fefe, bate ing keakeleta pa ke keke fufu kale. ⁴⁰ Nira niwa kote teangku-teangku-Meme jaing ejofafa, pa te jano tereka.'' ⁴¹ Yesus pile, ''He, ebamo piefeng eluka pa ehi puele! bangha joung Ni laea pa niheng e ea? Ko memeing mapewe.'' ⁴² Po koing kekana Yesus tuti tebate feng ke teke hitija hangtu pa ne tete jaketu-tete jaketu Peanya, Yesus hengkeku bate teba letakuile, ko baleng ing keleko hae keelengna reketi. Yesus Pi Kelei Kewawale ⁴³ Teba nawo te eng e tehe Tata efengke, peanya te engtape-engtape lelepa Yesus jalei, Ke lengte teangku-teangku Keke, ⁴⁴ Le elae e pitiwe huhufae: Ba Kowe teke nititi teba no ongte.'' ⁴⁵ Peanya teangku keke faing te hutewete paka ja kepilei, pa ja wengkotu pera terika hutewete paka. Peapa, tera tefe tejengtete Yesus piti ung-ang kelai. Lopana ing ke Ba ⁴⁶ Poing, ataleka teangku-teangku Yesuske tewefi baing ba meruru to te tekaung. ⁴⁷ Peing, Yesus hupa tete kelu, pa Ke keangku hapa ung keke pa kelengko keru Ke laelo. ⁴⁸ Pa Ke lungte teangku-teangku, ''Mebaung ba meko hapawe mebela bati Nine, me Ni mebe. pa, baungra me Ni mebe mera Ke mekekele Kea Niwe kelengtu. Peanya,keung enahiele wa eba fawe, kea topato.'' Kang ing Aha aling ⁴⁹ Yohanis lungte Ke pa pi kele, '' Koru, newe kebaung nefu bati Me mepa bate feng ing kekaju pa ne ena nenitaruru peanya ke ne bafawe kekengtika.'' ⁵⁰ Ana ing-angra, Yesus lungte tea, ''Keing eleleka baungra e pi keka kikikale, kera e kelala kale.'' Yesus Tekeri Samaria ⁵¹ Poing bangte watu ko Yesus tekena hoetitile, pung keleko nafeng keti Yerusalem. ⁵² Ke lengko teba narang-rang ung Ke lefe tejato. Peanya, teba-teba ing teja pa tetekeng bametu ung jeng ing Samaria ung jalelepa tutupiko momo Kea. ⁵³ Ana inng-angra, teba-teba temete jeng ing Yesus tekeke ongte Ketiti kota Yerusalem. ⁵⁴ Po teangku-teangku Yesuske, Yakobus pa Yohanes, jaing tefo, te nite, ''Tata, jaungka Me pungle newe tengko ra kapetang hetutu pa te raeko etutu ? ⁵⁵ Ana ing-angra, Tesus kepuna kueti pa tehekelu. ⁵⁶ Kaimpa, Yesus pa teangku-teangku-Keke tete bame hing. Jafeng ung tewe Teba tele Yesus ⁵⁷ Poing tewe leng tejae, kebaung lengte Yesus, '' Niwe lala Me kewenera Me memepe.'' ⁵⁸ Ysus kera lungteke, ''Nakewe kelong kotu keiile pa tang-tang tera jing ete ho teera po motu. Ana ing-angra Ba Ko jeng keke kepeti iile peka.'' ⁵⁹ Yesus lungte keba hing ung, ''Mepapa Ni'' Peapa, keba ing lungte, ''Tata,meka peng ung nire ai ninewe ine teteto.'' ⁶⁰ Peanya, Yesus lungte ke, ''Mehangfate ba wa kerawo ba wa tete ikelele, pea ewe ere pa Tata pifeng Teteke ewaha.'' ⁶¹ Pa,kebaung kera lung, ''Niwera nilala Me, Tata, mekapeng ung nire teba pai nine te niwawto.'' ⁶² Yesus lungte kea, mebaung ne metupika hangtu metakukupe, ana mepuna fangme, me Jeng Tete Tatake mekeng memepe.''