1
Bang lopana
minggu ing, poing fetang
kupawo, teume-teume ing tete fulu Yesus ja tetupi
rempah-rempah tetu tete.
2
Pa tete tefi wung bapale pe tewepete
wa fulu.
3
Anaing-angra, po
tekengte, tewe teka fika
Tata Yesus ripeke.
4
Kaimpa yewe te engtape-tape jaing, joka-jokapa teba hingtung ro
tehemo jabebewa-jabebewa tena pere tewe
laelo.
5
Teume-teume ing
tewe tefe pa tangha tete
kengtepa, peapa teba hingtung ing tenite,
''Jatu ewe juele keba mele
keka teba-teba bing ete.
6
Yesus kewe keleika, Ke
kelefute. E engkoko janya
Ke lengkotu te ewe po Ke
kemu Galilea.
7
Ke leng Keba Ko tekenititi no teba-teba
nelengte ete, tekelele, pa
kelefute te bang hengtong.''
8
Pea teume-teume ing
te engte piti Yesus kewola.
9
Peanya tewe me pute
teme fulu Yesus, tewe hoho
tete e jalewang ing tete pate tebafa hampa tekaung telake Yesus tekateba hing.
10
Teume-teume tewe hoho tete ing Maria Magdalena, Yohana, Yakobus make Maria, pa
teume narang-rang hing.
11
Anaing-angra, keleng teume-teume ing tehiengte
keing pi ong tafa tebafa rasul pa tewe teriri ongte
teume-teume ing.
12
Anaing-angra, Petrus
kekaleng pa kekatati fulu Yesus.
Ke paheti eng epa pa kekalengte ifu, kefi ro linen
ripe tepo.
wana ingte, Petrus kemela
ke engtape ja lewang ing.
Yesus Ne Keang
te Tebafa-Keke Lengma
Tete Emaus
13
Bang ing-ang, teba hingtung telakete Yesus
teja tete te bame ing bati
Emaus hambang pepe
aha-aha nete te 60 stadia
wa kota Yerusalem.
14
Teba hingtung ing
hoho tete jalelepa lewang.
15
Peanya tewe pi tete e
pa keung pile no ing-ang,
Yesus kewo kete kelatu
leng kepatelupa tejae.
16
Anaing-angra, luto tena kete kepe kaimpa
tenake Ke tefi jangka.
17
Yesus lengte tewe,
''Ja enake pile ele
leng haele?''
Teba hingtung teju pa
tangha tena kete ana
fu tutu.
18
Keba aling ung ka
tewe ing
bati keke Kleopas lengte
Kewe, ''Ja Me kealing-aling
ung meba mapenglo
Yerusalem mewe pukana
ja lewang fua ung-ang
wea.''
19
Yesus lengte,
''Ja ha?''
tewera nite Kea, ''Jatu
Yesus ka Nazaret. Ke ing
keba nabi keba mapa pitipa jano-Keke ketipa ho Ai pa bapa nene.
20
Anaing-angra,
imam-imam rube pa
tebafa rube nene
tea Ke tekeni ko
tejako kewa, pa
tewe Ke tekele.
21
Bamuangwo newe ne engne Kefa bapa Israel
keko fafale. Peanya,
ung-angwe bang hengtong
wa ja lewangnya.
22
Anaing-angra, yeume narang-rang wa netu teteko nelengho. Poing tete tea fulu fetangpa-fetangpawo.
23
Tewe tete
Yesus ripeke tefika.
pea, tewe temepute pa teni
tewe teba fangpa-fangpa,
tene teang tenite te
Ke kelefute.
24
Anaing-angra, teba narang-rang tenewe tete
fulu pa tera tefi anara ja
teume-teume teni.
Anaing-angra, tewera
Yesus ke tefika.''
25
Anaing-angra Yesus
kelengte tewe,
''Oh, kalalafa ewe topo pa
hupalang a afa kojawe
elulule janya tebafa nabi niwe.
26
Anateing kana Kristus
lelepa kewe kapa fi-i pa
ke mukengti-ti i-fu
Ke piteniete.''
27
Pea, Yesus lelepa potumotu Ropo Tuwo bekele leng tu ne Keke,
wakotu Ropo Musa pera
tewe tebafa nabi teing
nalung pawo.
28
Tewe teja kote watupa
bame Emaus, Yesus kelelu
kepeleng kai Ke titifu.
29
Anaing-angra, tewe
Kewe tejaju pa teni, ''Mepepa nelupa netene wea kewe rapangtu pa rangwe u heti tile. Pea,
Yesus kenggti kepa telupa tete e keing.
30
Kaimpa Ke late tewe
telupa teme tangri jajong,
Yesus hang ong kewe pa
ke ma kele. Ke keje-keje
lengpa keleleng te tewe.
31
Poing, luto tete be keju pa Yesus tefijang.
Peate, joka-joka Yesus kelengti wa luto tete.
32
Poing-ang, pitete tewe kealing kelengte
keung, Anara ing pung nene ana ranya e i
Ke pi kelei newe po leng nenane pa Ke
bekele fata Ropo Tu
kelete newe.''
33
Poing-angra,tewe
tejaleng pa teme puna
Yerusalem.
Tewe tete latete teangkufa
hampa pa teba-teba tepa telupa lume tepa-tepa.
34
Teangku-teangku ing
tenite tewe teba hingtung,
''Tata bamuang-bamuang
melefupe pa neka meang
te Simon!''
35
Teba hingtung lake ing tera hoho tete ja lewang tewe leng jae.
Tewe hoho tete tunaneko
tewe Yesus tefijang poing
Ke hang ongwe keje.
Yesus Ne Keang te
teba telake-telake
Ke
36
Peapa teba hingtung ing jalewang ing hoho tete,
Yesus keru langhou-hou
tewe pa kelengte tewe,
''Pepe efeng pewakotu ewe.''
37
Anaing-angra, tewe
telengho pa tefe fata
tewe hieng te
jaufa tefo ete.
38
Anaing-angra, Yesuslengte tewe,
''Jatuko elengho pa efupaele petehe pung e e?
39
Ekalengtu we no-Nine
pa lang-Nine. Kewe bamuang-bamuang Niang.
Ne ewetefi Ni pa eka kaleng, jaufa peing na ka
pa e raka ana ung-ang
Ni-efuele.''
40
Poing Yesus lengte Ke no pa lang-Keke kenalung tewe.
41
Jopa joka tewe hupalang heka tewenaka pa te engpate-te engpate,
Yesus kengte tewe,
Jaungka ewe i etu ja nena
nate.''
42
Pea tewe me riung
tewe nite-Ke
43
Yesus me ing kewe pa
kekang ho tete.
44
Kaimpa, Yesus lengte tewe,
''Kawe piti nine nileng ewe
po epa nelupa. Lelepa po tumotu tehe Ni motu Musa
ropo Tauratke, ropo tebafa
nabi, pa Mazmur
pehe tepa.''
45
Kaimpa Yesus pung tete be kele fata ung tewe
Ropo Tu we teri jang-jang
46
Yesus fang-fangra keleng te tewe, ''Pe po tumotu Kristus kewe kapa
fifile pa kelefute keka teba bing ete bang hengtong.
47
Pa, keng nepapa ne
ne kekofa-fale wa neleng nene pe ete uang-ang
bati-Ke ke petewapa pawo
bapa lelepa, keng teja wa
Yerusalem.
48
Eweing ewe hemule-
hemule wa ja wea.
49
Elu tata, Niwe niwelengte e le Ai ku' ke.
Anaing-angra, ele e kota
Yerusalem ko ewe lelepawe
kelelako papa
ma wa jeng tete.''
Yesus Kemueti Surga
50
Kaimpa, Yesus lengko
tebafa lakete-Ke tejana kota pengte teteju Betania.
Kefu, Ke no kele ete pa
tewe ma kele.
51
Poing Yesus tewe ma kele, Ke heke wa tewe
kemueti surga.
52
Pea, tewe-Ke keng
tepa pa temu puna
Yerusalem te pung tete
pina efeng tafa.
53
Tewe bang-bang
pate temepate te e Ai Paake pa Ai piteni.