¹ Bang tete Hang ong Ragi Ka teniete Paska petetu. ² Imam-imam rube pa teba-teba ropo fojang lengma noha tejuko Yesus, anara tewe tefemo teba nawo. Pengkhianatan Yudas ³ Kaimpa, kebate kengtihe ne Yudas ke teniete Iskariot. Keing keba aling ung ke teangku tebafa hampa. ⁴ Pea,memaleng ma Yudas meme pi ewa imam-imam rube pa teba Ai Paake tewetu rete tunane ke Yesus keleng-leng tewe. ⁵ Pa tewe pungtuwo pa pitete ko taimbe tereninike. ⁶ Pea Yudas pungle pa long kejuko Yesus kekeleng-leng tewe poing teba nawo teweka. Jajong Paskah ⁷ Kaimpa, Hang ong Ragi Ka, bang ing jako domba tupate fuete Paskh. ⁸ Po bang ing, Yesus lengko Petrus pa Yohanis, Ke leng, ''Eha pa jajongka etupiko Paskah ne nana.'' ⁹ Tewe nite Yesus, ''Kewene Mepungle ung janetupi-pi.'' ¹⁰ Yesus lengte tewe, ''Poing ewe kengre kota, ewe laelela keba kebaleng-kebaleng ke kendi kekeka- ka; elata koko kenya ko ke kengkeng paa keke, ¹¹ pa elengtete keba paa ba ing, 'Koru kengte mewe; Kewene jang jeng Niwe jajong Paskah nena lupa teangku-teangku-Nine.' ¹² Poing, kewe kenolung ewe jang bapale panaho lelepa motu. Metupi fata jajong nenana kefua.'' ¹³ Pea, Petrus tena Yohanis teja pa tetefi lelepa jaing pelewang fata ana Yesus lengkotu patewera jajongpaja tetupiko Paskah. Tetajung Paskah ¹⁴ Wakotu bang pepe, Yesus pa tebafa rasul tetajung tepajo tangri jajong tetang-tangte. ¹⁵ Kaimpa, Yesus kelengte tewe, ''Niwe pungle jajong Paskah epa nelupa nana, fengte Niwe weweka. ¹⁶ Niwe lengtete ewe, Niwe jajong ing nikang-kang kale wakotu jawe hetepa Jeng Tete Aike.'' ¹⁷ Pea, Yesus ja anggur telikomu ing kewe pa kewapate, kaimpa keleng, '' jawe mepe pa mekope ebafawe. ¹⁸ Peing, Niwe lengtete ewe ung-angwe Niwe anggur nihung-hung kale wakotu Jeng Tete Aike tetetu.'' ¹⁹ Kaimpa, Yesus hang ong kewe pa kewa ete, Kewe hang ong ing keje pa keleleng te tewe pa keleng, ''Hang ongwe peing ne-Nine niwelengte ewe; pe elee ana Ni e eng e.'' ²⁰ Peanara, jajongra e ang, Yesus ja anggur kewe pa keleng, ''Jawe kejanglu koteme ing peing ana Ho-ho ropo nati mele nei hi-Nine. ²¹ Anaing-angra, ekaleng, no keba Ni ke ke leng-leng kewe ana kelupa mete tangri wea. ²² Pea Keba Ko ke kakale peing nowea pe kelukotu, peing fengwo meba Ke mebepeng!'' ²³ Teangku-teangku-Keke tejeng e kealing-ung kengte kehing ung newe ba jaing kelele-le. Mepeko ana Meba Jano pemepe ²⁴ Rasul tewowo pipotela ba keing tefiti kebapale. ²⁵ Anaing-angra, Yesus lengte tewe, ''Bari-bari bapaing te Tata tefijangka jeng ing tewe tupa bapa tete, pa teba-teba te jeng ing te bari-bari ing teniete 'Teba Bapaing ewkotu.' ²⁶ Peanya, ewe noing eleleka. Peing, pewa bapale ete ewe pi e ahihi petangleka, pa meba rube me ana teba jao teete. ²⁷ Ba me bapale, ba takungpa jakang ilena ba kapa ja koleile. Anara keba takungpa ja kang ile. Peapa, Niwe ana mule hou-hou e e ni ana ba ja koleile. ²⁸ Ewe ana teba-teba latakete-Ni tepa nelupa jalelepa tepa Ke teteriete- teteriete. ²⁹ Peteing, Ni welengna ete jeng tete, anara Ai Nine kewelengte Ni, ³⁰ Ung ewe ja e eang-ang pa e hung-hung tangri aling ewepa-Ni. Pa, ewe mumujeng ete kotu ko ari elohi-hi bapa hampa Israel.'' Petrus kewe Yesus Kealolu. ³¹ Simon, Simon, le mepate Niwe. Bate kewa ko mewe ketampiliko ana pelasi, ³² Anara Niwe ewe lupompong niwa ung pung e e takukuka. Pa ewe keng epa ne ketapo, johang e-johang e eleko te nafeng-feng.'' ³³ Peanya, Petrus lengte Yesus, ''Tata, niwe ne nitupi tekekeng titi apaa ni wung-wungra ama nelupa!'' ³⁴ Yesus lengte ke, ''Niwe lengtete me, Petrus, ung-ang bangwe ojing baleng na kelele kapa me ni mepapa la hengtong mewe Ni mefupang.'' Metupi-Metupi meme Fengtafa te Witafifitu ³⁵ Kaimpa, Yesus kengte teangkufa ing, ''Poing Niwe e nileleng eha taimbe haka, ha, na langhepo, jaungka ewe lelepawe kafata?'' Tewe nite, ''Ka''. ³⁶ Ke lengte tewe, ''Pea ung-ang, ba me taimbe ha meme, mameme. Pa, ba me anabeka, ba me ro meme jata mepe me pupe anabe jata mepe. ³⁷ Pea, Niwe lengtete ewe jaing pe potumotu Ropo To pewe tuhetepa nei Nine, 'Kewe tejaji teba-teba neleng telupa. Yesaya 53:12 Peing pepotu te Niwe ung-angwe lewang.'' ³⁸ Pea tewe nite, Mekapeng Tata, kewe anabe hingtung motu.'' Pa, Yesus lengte te tewe, ''Kaing pana.'' Yesus Lupompong kelei Taman Getsemani ³⁹ Kaimpa, Yesus ke kengti pa keti Heng Zaitun peing ana Ke kelei; pa teangku-teangku-Keke tera jaju tetela Kea. ⁴⁰ Poing Yesus kekakoti jeng ing, Ke lengte tewe, ''Lupompong ele ung ewe ekengre-reka ja teriete.'' ⁴¹ Kaimpa, Yesus newe kewe kakana pongti tewe hamba pepe wung neropa ietu, kepaheti lambitepa ketakung pa lupompong kele, ⁴² Ai,ana Me pungle, jawe mebebeka Ni Peing ana pung Nine leleka, pung Memefa lele. ⁴³ Wana ingte, peba fangpa pewa surga ne peang-Ke pa ne keke petuko-Ke nafeng. ⁴⁴ Pa, Me mepe mafi-fipe, Me lupompong bamuang-bamuangwo mepepe; papo-Meme ana hinya taju heti hangto. ⁴⁵ Poing Yesus lupompong kelekoka, Ke kana teangku-teangku-Keke pa tekefi tewe teleweng hupalang futu. ⁴⁶ Yesus lengte tewe, ''jatuko ewe luweng. Ehaleng pa lupompong ele ung ewe ekengrereka ifu jeng teteri ete.'' Yesus Tekekete ⁴⁷ Poing Yesus pikelei, tebafa nana; pa ke teniete Yudas, keka tebafa hampa teangku ing-ang, rube tete. Pea, Yudas ketilatu Yesus ko kenupa-Kewe. ⁴⁸ Anaing-angra, Yesus lengte ke ''Yudas, jatuko mewe Keba Ko mebepeng-pengpe nupa mepe.'' ⁴⁹ Kaimpa teangku-teangku tejaleng tepajo-Ke jaleha lewang-wangtu, tenite Tata, newe tewe anabepa tene jiji?'' ⁵⁰ Kaimpa, keba aling ung tebafa teangku ing keung jano reete Imam agung le keke nopalo kelu. ⁵¹ Anaing-angra Yesus lengte, ''Kaing, pa.'' Pea, Yesus no kela le keba jano leile pa keleko hae. ⁵² Kaimpa, Yesus lengte imam-imam keba ruba Ai Paake, pa tebahu-hu tete-Ke teke-kete, ''Jatuko ewe ehafatale anabe pa pentungan ele keba jata leile ekekele? ⁵³ Poing Niwe epanelupa Ai Paake bang-bangfa, ewe Ni ekeka. Peanya, ung-angwe bang pepetu ewe pa kebate ma lopangke.'' Petrus Yesus Kepa ⁵⁴ Poteing Ke tekepa, teba-teba ing teketuja pa Yesus teketute paa imam bapale. Anaimg-angra, Petrus kelako tewe pongfa. ⁵⁵ Pa poing teba-teba ing ra tete hou-hou paa tata pa tetajung lupa-lupa, Petrus kera takung heti telup teme. ⁵⁶ Peanya, pebaung jao tuetu peume Petrus pefo kemu watu rapaing pefute weko tangha Petrus penu, ''Kebawe kerala telupa Ke pate.'' ⁵⁷ Anaing-angra, Petrus kepa, kelengte, ''He meume, ni we Ke nifulangka.'' ⁵⁸ Ka jo kaimpa, kebaungra kebahing kekefu pa keleng, ''Meraing mekengme kopeba alingwa tewe.'' Peanya Petrus lengte ''kawo,niweka kebaka tebafa aling raka.'' ⁵⁹ Rangku wako tehe rangku aling kaimpa, kebahing-ung kera lengwa hupalang keke bamuang, ''Bamuang kebawe kera telupa-Ke, pea kewe kera keba Galilea.'' ⁶⁰ Anaing-angra, Petrus lengte, ''Niwe luka ja epi leele.''Poing-angra, Petrus pi keleile ojing baleng na kele. ⁶¹ Pea, kepuna Yesus ti pa kekengna Petrus. pa, Petrus ke engkote piti Yesus lai, peanya Ke leng ile kote ke, ''Ung-angfa ojing baleng ung-ang ewa nara kelele kapa me Niwe mepapa pe la hengtong.'' ⁶² Kaimpa Petrus kekana pengti pa fu kele Teba jeng tewekotu Yesus Teketupa jano lelepa tete ⁶³ Teba-teba Yesus tepe e tenajie pa te-Ke teketupa jae. ⁶⁴ Tewe luto-Keke tepo pa tenie,'' Pitiung kamepa! Ba-Me kekaile?'' ⁶⁵ Tewera ja nawo teni pate jakeleinya te-Ke pungtuka tekang ung tera-Ke tenajie Yesus ti Ho Yahudi Rube ⁶⁶ Fefe pepenya, teba-teba Yahudi Rube, imam-imam rube, tepa teba-teba ropo fojang tetelu pa Yesus teketuja tete Mahkama Agama tete. ⁶⁷ Tewe teni, Ana Me weing Mesias, meka pengtu newe.'' Pea Yesus lengte tewe, ''Ana Niwe leng-leng ewe huewete papakatu ja Ni pile ele. ⁶⁸ Pa-Ni piung heng-heng ewera leng-leng kale ⁶⁹ Anaing-angra, ung-angwe Keba Ko kemule Ai nopaloke Etekotu ma kele.'' ⁷⁰ Tewe nalungpa tenipate, ''No ewa, mewe ba Me Ai Oke? Yesus lengte tewe, Ea leng Niwe Kea.'' ⁷¹ Kaimpa tewe tenite, jaha ungra newe-we kete. Epanewe kara fata wa lang u-Ke kewo.''