¹ Kaimpa, Yesus hohokele aha kelai kelepate teangku-teangku-Keke keleng i tewe lupompong tewe tete pelengwae pa pung tetewe iheteteka. ² Ke leng kota wea, kebaung teba piriete keing Ai ra kefuka pa teba hing ra kengkepaka. ³ Kota kawe, pebaung peba ro peleng pewa peleng wae pete e keba piluile pa penute , 'Niwe pepeka mepetu ni kepini hahihi.' ⁴ Ana kefote rangku tehe, keba piriete pebaro pipepe kelele ongke. Anaing-angra, kaimpa keba piluile kelengwa pungkeke, 'Peana niwe Ai nifuka pa tebawe nikeng nipaka, ⁵ kaimpa pebaro wea pepeleng-pepelengwae nika peteruetu, niwe pepe niweleng-leng pea ung pewe niwe peteruruka ana petu pewa pepeleng-pepeleng wae kaing.''' ⁶ Pa, Tata lengte , ''Le elae ja keba piluile janya keba piluile leng ile. ⁷ Peana kana Ai pepe kewelengte teba-teba Kewo kekinya pa tewaete Ke fepa pang-pang ete? Jaungka Ke kekaku-kekaku wakotejo ko ewe no kele? ⁸ Niwe lengtete ewe, Kewe ewe kekokofa pepewe keweleng-lengle. Anaing-angra, ana Keba Ko ketetele, peana Kewe pung kekafifi fitong lena.'' Ahakela ana Teba Farisi pa Teba jahenglo Meteete ⁹ Yesus kera pi kelei ahakela ana teba narang-rang ung netete teni te bamuang pa tejung pate teba hing ing teihete. ¹⁰ ''Teba hingtung tete Ai Paake tete lupompong tete te. Kebaung ing keba Farisi pa keung ing kewe teba japa jahenglong mute ete. ¹¹ Keba Farisi ing keru pa lupompong kelei ne kekewo, 'Ea Ai niwe janawo Me pepeng niwe ana teba hingka; an teba jalolo teete, ong teheete, uta teteete, anaing-angra ana teba jahenglo muteete. ¹² Niwe hupa nimu minggu aling la hingtung, ni taimbe niapare nifue wa jano japepe.' ¹³ Anaing-angra, keba jahenglo muleile ketiru ataleka hambang, peapa ke petang kekungte foka. Kepute, ke tangrue keke keloki-loki pa keleng pate, Ea, Ai. niwe pipateka mepe, niwe niba neleng.' ¹⁴ Niwe lengtete me, keba jahenglo muleile kemuna paa keke kehueng ing keing kebamuang keba Farisi lengpate teba ne tere epate teing kehetitile, pa teba ne tete tetepate ihite teing kele etetele.'' Yesus pa Teangku-Teangku ¹⁵ Pa, teba-teba teangku-teangku tete hapa teretute tete Yesus ung teno kewe fefe. Anaing-angra,tebafa teangku keke, tewe pute tewe teba-teba ing tewe terepa pi tete e. ¹⁶ Pea, Yesus kelengko teangku-teangku ing teretute te-Ke pa keleng, ''Eleleka teangku-teangku hapa tetute te-Ni, tewe ehahuhuka Ai Jeng Teteke peing ana teba-teba wea tete. ¹⁷ Niwe pi bamuang nilete ewe, mebaung me Ai Jeng Teteke mepepe kape ana keangku hapa, ke ifu kekengti kale.'' Keba japa pa Ai Jeng Teteke ¹⁸ Kewe kebaung keba rube ke kekengte Yesus, ''Koru meba efeng, jaing ja jano nileko janiwe peepa pipafe e batoto e e?'' ¹⁹ Yesus lengte kewe, jatuko mewe peng Niwe efeng? Kebaung keraka keleng-leng ke efeng peing Ai kewofa. ²⁰ Mewe mepuhoho wea: 'Uta mepepeka, jata mepepeka, hoho ong teba mepepeka, wala ai pa anni meme keng me papa.''' ²¹ Kebaing keleng, Niwe jaing nilafata poing niwe nianglengpa.'' ²² Kaimpa Yesus le kelate kelu, Ke kelengte kebaing, ''Mewe jaung aling ung mepeka. Ja meme ing mepepeng fata tetefatata pa meko pepe teba-teba jaka, ung ja meme ing etu surga; pa elewe,e lala Ni.'' ²³ Kaimpa kebaing ke le kela Yesus leng ing, kewe ana hupalang futu kewe keba japawo. ²⁴ Kaimpa Yesus kekengte keba ing pa kelengte,'' Pewe ana tangle wo tewe teba-teba ko tekeng-keng Ai Jeng Teteke! ²⁵ Peing, ana tangle raka te ana unta kekeng-keng jarum long anaing-angra teba-teba japa tekeng-keng Ai Jeng Teteke.'' Teba la Yesus ewe Ja Batoto Ewe-wele ²⁶ Teba-teba teing le telate pi ing teni, ''Tunaing, ba keing efeng kewewele.'' ²⁷ Yesus lene, ''Ja ing petangle te neba Ai ke tangleka.'' ²⁸ Peing, Petrus lengte, ''Ekaleng, newe ja nene lelepa nereifata pa newela Ke.'' ²⁹ Yesus ke lengte tewe, Niwe leng elewe pe bamuangwo te ewe, kafata mebaung paa ung mebepiti muka, emera, johangme-johangme, teba huhu, teangku-teangku ko Ai Jeng Teteke. ³⁰ Ja ungra mepepe rakape ja feratiti wakotu ung-angwe pa po tetetu, peing memu batoto memepe.'' Keleng hetu Newung nete pa Yesus Kelefute ³¹ Pa, Yesus lengko teangku keke teba hampa Keke telu, ''Le elae, epane nene ne Yerusalem pa janya tebafa nabi tepo temotu tewa Keba Ko peing pete fute papatu. ³² Kewe tenajijite, kewe nolelepa tete te, pa ifangfong tete e. ³³ Pa, Kewe teke tupaja, tewera ketejako Kewawa. Anaing- angra, bang hengtong, Ke ra lefute.'' ³⁴ Kaimpa, teangku fakeke tewe hutewete paka ja aling-ungra wa ja-ja wea. Ja kepilei pewengko te tewe kaimpa tewe hute wetepaka ja keleng i. Yesus Keba Lutofo keleko Hae ³⁵ Poing atalera Yesus kakoti kota Yerikho, kebaung keba lutofo kemu lengfa pa jano wawalei. ³⁶ Poteing keba lutofo kewe kelu teba nawo lee, kewe kengte jaungka lewang. ³⁷ Pa, teba-teba tenite kewe, ''Yesus ka Nazaret kalele le.'' ³⁸ Peapa, keba lutofo kepate, Yesus, Ko Daud niwe ka pipate mepe! ³⁹ Teba-teba jae to tebafapa, keba lutofo ke tete e tenike lang u memu. Anaing-angra, kewe makitafa kehiwai pina letapa, Daud Ko, niwe pipateka mepe.'' ⁴⁰ Kaimpa, Yesus keku pa keleng kebaing ekale Ni. Kaimpa keba lutofo teke tute tu, Ke kengte ke, ⁴¹ ''Jaungka me pungtuung me ja Ni lele.'' ⁴² Yesus lengte ke, ''Me kapeng, pung memewo mekeleko me hae.'' ⁴³ Poing-angra, kewe ja kefo pa kela Yesus Ai kekepa pikeleng. Kaimpa teba nawo jaing tefo, tera Ai piteni.