¹ Tunawea poing teba mambirerefa napang tetepalue pa tewowo langlang tete, Yesus pikele tote teangku, ''Eengmo-mo ragi teba-teba Farisi, tepufeng ² Ana lelepa tepomo ing pebeteju pa lelepa weng motu peuang fata. ³ Peing, ja epile ele ilofu lopang letela ete ilofu fefe pa ewe epong ele jang i petetupa nie paa hokong-hokong. Efue Aifa ⁴ Ni lengpate tea,he bato-bato-Nine, teing efufu ka nero meme tejangko pepangpangtu,peapa kafate wanatote jaleungra hangbang tetekate. ⁵ Peanya, Ni lengwefa me meengkoko ba kemefu meme; mefumeme Kea, poing tejako kewa, ke wawuwupa newekele kelopate rapa. Ea, Kea nefunene. ⁶ Peka tang pipit napang ing eare jata ele taimbe ha hingtungfa? keungra, tang aling ung Ai hoke kepengpeng kale. ⁷ Keungra, taa nawo pepe motu rube meme pera kekaki. Me fufuka, me nememe peetekotu wa tang pipit nawo.'' Neeng tata Epane Yesus nealoro ⁸ Ni lengte ewe eba tuho elakole Ni eruleto teba hing, era Keba Ko kera lakole keruleto teba fangpa- teba fangpa Aike. ⁹ Anaing-angra, ebatuho Ke ealolu teba hinghote era Ke kealo lolo teba fangpa-teba fangpa Aike, ¹⁰ Pa, baung jaungka Keba Ko kepi memami meing kekofafale, Peapa baung pitifeng- feng mepejang Roh Kudus/ Feng Tu me kekofafale. ¹¹ Kaimpa tewe me teke tujana sinagoge pa tebafa rube pa janolamotu, hu meengka tunane me ne meme mepepe pe na jahaung mepi mepepe pe, ¹² Peing po Roh Kudus/ Feng Tu jakenalung me jaing jamepengpeng pe.'' Aha kelai ana Keba Japa ¹³ Kebaung keka teba nawo ing keleng te Yesus, mepengko jonenine jamotuing kekole ko ninera kewelengleng.'' ¹⁴ Anaing-angra, Yesus lengteke, ''Joke, ba Ni kekeeti hakim/ teba piriete nihemule ewe? ¹⁵ Kaimpa, Yesus lengte tea, ''Eheng e eheng e pa ehape mumu wa japaha lewangwangtu te ete neba mumute pewekoka japaha meme nawo mepeimotu.'' ¹⁶ Pea, Yesus hoho kele ana ahakela te tea,''Hangtu ung kebaing keke kejalelepa lehe janara nawo tafa tewue. ¹⁷ Pea,kebaing hukeeng pungkeke, 'jahaung nilele jeng nine ung koka ko leha jana niwuung nilei momoing-ang? 18Pa,ke lengte,'Kawe pe jano nilele. niwe papalang nine nitapepe pa tetewo niweete haha. Keing-ang, ni lelepafu gandum pa lelepa nine. ¹⁹ Peanya, ni lenghe lengtung nine, 'He lengtung nine, mewe jameme nawo kamepe peng felangro-felangro; memu jomumu, jajong, pamumupe, pa memu huhufa fa.' ²⁰ Ana, Ai lengte kebaing, 'He, meba topo! Rangpang wea, lengtung meme keke ke kane meme. Pea jaing ba jake lelepa me pepeng motu?' ²¹ Wanaing-angte jaha lewangwang keba ja lelengmotu tu pa taimbe pemotu ne kekewo,peapa meja lelepaka me mumu Ai ho.'' Meeng-engka ²² Yesus lengte teangku-teangku-Keke, ''Peanya Nira lengte ewe, pe ewe eng-engka po ewemule, jaeang-angle. keung meeng-engka ne meme,pakeung me hehepe. ²³ Peapa,memepe peing efengwo tewe jajong afia pa ne meme pe efengwo pate wero ing afia ²⁴ Mekapengfu tang au. Tewe jatewaka tewuka jeng na langna peraka, peapa Ai jalengpa tetang ete. Ewe ing keleko efeng tafa pate tang teing jaungraka. ²⁵ Baungka epanewe hupalang rowopa me fangha aling kewelala po felangro memumupe. ²⁶ Ana ewe jano-jano hapawe eleka, jatuko ewe hupalang tehe jano-jano hing. ²⁷ Mekapeng huhufa hepang, tunane tewe heete. hepang-hepang ing jano nafengra tereka, peanya Ni lengtete me, pea Salomo keetime lelepa kekepa roung jutafa kefaka wa hepang- hepang ing. ²⁸ Ana Ai jaing ro kelengtehe lehe, ung-angwe eetu pa fe ing tejang hete rato, Ke nera ro keleng neheka tewa anajaing. He, newe ke pungtuka ²⁹ Pea,ewe ja e ang- angle peejujuka na jaehung-hungle, pa pung meme rereka. ³⁰ Pea, bapa-bapa meti fitong jaing tejuete peanya Ainene kelu jaing nepungtu. ³¹ Punawetu, Ai Jeng Teteke nejuung, lelepawe kelepa lefefe newe.'' Mu elefata Janghenglo Surgape ³² ''Efufuka, he ebafa hapa, Ainene pungle Jeng Tete kewelengleng epane. ³³ Ja meme ing mepe pengfata pa ke keka mepepeng. Ha taimbe meme fengfeng ketu, peing ana janghenglong meme motu surga lente te katu, teba jatara teta kikikate. ³⁴ Pea, jeng meme jahenglong mepeimitu, keingra pung meme ile.'' Bapo ke Hupalang Efeng Jano Kelele le ³⁵ ''Mamipame ongpu meme amepe tata pa ra-rameme efamomo. ³⁶ Mepe ana teba-teba tejeng keba rube kemu teba upong ung tewe tekokofa ke tilongwe betejuju, poing keba rube kemetu pa tilong no kefi ile. ³⁷ Makeleta bapo-bapo, keba rube ketuekefi etupi tata, po ketutule. Niwe lengte ewe, bamuangwo, keongpu keke akelele le ko jakelengleng pa tetajung telupa jatetangtang Ke tetele patewe jakena lunglung tea. ³⁸ Ana keba rube kete rahou na ung-angwe pa tekefi janoing tete ete, ewe ma kele. ³⁹ Peapa elutata, anara keba paa ba kelu rangku narangrang teba jata te ete te tete te paa keke, ke hemumule longra kewelengleng kale paa keke tetapepe. ⁴⁰ Peate newera ne netupipa nemumu Keba Ko ketetele kunera ruka.'' ⁴¹ Kaimpa, Petrus kengte Ke, ''Tata, ja Me hoho mepe aha mepemepe mepekotu nefa na teba nawi wea? ⁴² Tata leng, ''Ba jano rube jano kele huhufa pa jakelepate wotuetu ke keke ko te kefeile bapofa hing, tejateni tetangtang po rangkupa? ⁴³ Ma mepe tata bapoing, ana keba rube ketu, ke kefi janoing keleile. ⁴⁴ Niwe lungtete ewe, pe bamuangwo keba rube ke kekiko ke kekeko jakeke nawoing kefoi. ⁴⁵ Anaing-angra, ana bapoing keleng hupalang keke,'Keba rube kekokofa tetekale,' pa tewe keka paji bapo baleng pa bapo ume,kaimpa jajong pa patejung ko tanghatu, ⁴⁶ kaimpa keba rube ketu bangpepera terika pa bapoing keraluka, keba rube bapoing kekati kewa pa ke kekela tebateba jaefeng teteka telupa. ⁴⁷ Keba bapoung kelu keba rube pungkeke, peapa kejaketupika ana keba rube pungkeke kemo kewewele. ⁴⁸ Ana bapo keluka ja keba rube kepungkole pa ja-ja atalejano kele kera mo kewewele, ke atalele mokewewele. Tebatuho o ofa ja nawo keleng, tera nawo kewawale. Pa tera kefelang jano tere motu te nawo fata kewawale. Yesus Ketu Kekolele le ⁴⁹ Ni wele ko ra niloheti fitong, pa Nipungle raing eha. ⁵⁰ Anaing-angra,pate hehete pea jano nilele le, pewe ana tejape pae wakotu hetepapa ⁵¹ Ewe hueng Ni lewe pepe niwale efeng niwale fitong? Ka, Ni lengtete ewe, pepe niwa leka ni enikolele le. ⁵² Ung-ang bangwe, eba napang paai aling e nikolele kale. teba hengtong tepa teba hingtung pipo telalate pa teba hingtung tepa teba hengtong tera pipo telalate. ⁵³ Tewe tera kekolele le; Ai kera pipo kelala ko balengbalengkeke, pa ko balengbaleng aikeke pipo kelala. Anni pe pipo pewawa ko ume pepe, pa ko ume pe pipo pewawa anni pepe. Lape ume pe pipo pewawa lape ume pepe.'' Fitongwe Aha Telae ⁵⁴ Pea, Yesus lengte teba nawo, ''Peanaewe kalengte atu metu wahang, ewe elengleng, 'Fuma tajuhete, pa bamuangbamuangwo taju hete. ⁵⁵ Kaimpa ewe ana feng lune fengka lope, ewe lengleng, 'Ung-angwe rang jajale, pa jaing pele wangwangtu. ⁵⁶ Ewe eba jalulangka. Ewe aha elae petang pa fitong, tunane ewe aha elele kale fitong wea.'' ⁵⁷ ''Jatuko ewe ewo pi elulu lu keing bamuang? ⁵⁸ Poing ewe elupa teba mehufeng mepe eha erere teba mete rangpa, me enako lelepa motumeing memofafata ung leng ehaele ke me kekalo katitika teba piriete pa teba piriete me kekelengleng keba apaa wekotu, pa keba apaa wekotu me kelo kengti apaa, ⁵⁹ Ni lengkote ewe, ewe emukenglele kale wa fua hangpong mepe motu jamefu hangpong ing katafa wakotepe.''