¹ Paskah yaa meuseuboke bere Ouw ragi bang yaa bee neai khowaje, imam - imam yunjung bere Taurat yunjung bere a damungwaje Yesus te ikernaibonte, sinimbu wake yea mo tonaibonde. ² Tanyebang, eraije, "Yaa khabang khomare sinonye emokhoijea, domyea aku anau be tanaiminde bere" ³ Yesus poke Betania ne, Simon Kusta te khowere re imea ne, amang neai meja ne Dumboke mo, miyea embai meke nea mene guci merea pualam duka yea mokhoibokhaije, ne einye minyak pordokeai narwastu na mokhoibokhaje, nea bu yoro- yoro angkhai nea doi buma na tere. Neang guci khayeukoke mo Yesus nea yundang dea direunge. ⁴ Neande be, neangkena domyea nejokho etewaije ikere khowaije a neaise - neaise erwaije, "Taise neande minyak pordokeai meke neantongtong meke direre? ⁵ Tanyebang, nii minyak doise 300 dinar yea seubouge angkhai kharo ne nekhaije yo te waseumikhouge." Angkai neang miyea te a khowainye. ⁶ Yesus yea weumi, "Neneaijea mokhou. Taise neate khaunge? Neyea mee u poy be meke Deate mokhoute. ⁷ Tanyebang, khoukharo ne nekeyaije domyea maibere mo nekeyauge, makere see mai kena te khompe see, upoi wapoi mokhongmimpe. Neandebe, meeyea Deaibere nembase enekei. ⁸ Nenda miyea neai etamung neasinoi kaye be meke mokhore. Neyea meke Dea euga be meke bu bete meke khoute neanemang emontaijea. ⁹ Deyea neatetere be mate wamare, makerne Allah re Akho peuko nenda bu khani ne enayerende, nenda miyea nea mee u meke mokhore neaima enayerende neai iseai see. ¹⁰ Neangkhaijea, Yudas Iskariot, nea u na tomona do embai, Imam - imam yunjung neaise eke mo Yesus re yung neate yengminte. ¹¹ Neangkhaije neande yo neang a botokhaije bea, nea kena deimai tere khowaije angkhai Yudas doise yenainyente a wakhainyere. Neangkene, Yudas nibi a beawere Yesus te yengminte. ¹² Yaa embainyei, ouw ragi bang yaa, neande ya paskah neai domba te tonaje yaa, nea u na tomona yo Yesus te sinanye, "makere yowa ne Weai kena khoyea Weai Paskah neai etamang emare mokhomanentande te? ¹³ Neangkene, Nea u na tomona yo te wekeumi, weumi, Demee kota te, do embai kendi bu bere keauboke mere mai bere tuwayengkompe. Nea moijea takhongekhompe, ¹⁴ makere yowa te enengsinde, neang imea domyea te wengempe, “Guru yea erere: Makeryowa ne Paskah neai etamang Dea u na tomona yo bere angmakhonte?" ¹⁵ Neangkhaijea, dokhoi khabang embai imea buma deusina kernembompe ne taisai nembase aronyetakhaije. Neang yowa ne eai etamang angmakhonde. ¹⁶ Neangkhaijea, Nea u na tomona yo ewaije ekhaije kota ne. Neangkene, Yesus a te wekeumi manendea yeuboke, angkhaijea Paskah neai etamang ekhaije mokhonyetakhaije. ¹⁷ Be baseuboke mo, Yesus nea u na tomona yo bere mekhaije. ¹⁸ Angkhai dungkhokhaije etamang ne anaije mo Yesus yea weumi, "Deyea mate a neatetere be wamare, mai noro na do embai, Deai bere amang nembase anende kiyea, Deate pekho te mokhontebonte." ¹⁹ Nea u na tomona yo nea kena pekho beibokhaije mo nea u te - u te singwaije, "Neande deyea bang?" ²⁰ Yesus yea nea u na tomona yo te weumi, "Neangkiyea mai norona, nea ouw Deai khorei einye yawensinde khaye niyea. ²¹ Tanyebang, Domyea paa nendakhaije ende, Neai a tomongpea na mongkhokhaije maneng, neandebe neang do keraise mokhongebonde newari pekho tuwangende, neang domyea poibea etonoije. ²² Etamang ne dungkhokhaije anaije mo, Yesus neang ouw douke, a momboke mo neang ouw pete re mo waseumi angkhai a weumi, "Nenda Deai euga, dowei!" ²³ Angkhai, khorei douke, a momboke. Nea u na tomona yo te yekeumi, neyea neang khorei einya bu yea mo angwaje. ²⁴ Neangkhaijea Yesus yea weumi, "Nenda Deai oke, a te ereikhokaje oke, domyea tereng te direuboke. ²⁵ Deyea mate atere be wamare, Deyea bu anggur no na ansiy mo neketeponde, ponde anggur eme Allah re yo waku einye Antesinde." ²⁶ Bea embai khoikhokhaije mo, Zaitun wiri te yewaije. ²⁷ Neangkhaijea, Yesus yea weumi, "Meeyea nembase Deate nukentebompe, tomong pea na mongkhokhaije maneng, 'Deyea nea domba khaya ro te kurung utenende, nea domba nembase see - see wase benaije.' (Zakharia 13 : 7) ²⁸ Neande be, tete noroyea Antununde mo, Galilea te bete potere." ²⁹ Neande be, Petrus yea Weunge, "nenda yo Weate nukenayeukoge, deyea neang neketere." ³⁰ Angkhai Yesus yea weunge, "Deyea weate waware, mana diniyai, ojo dokho bee neai nemang ekhoikhoi mo weyea Deate a dokho name weseaibang dea weimire. ³¹ Neande be, Petrus neai a erea Weunge, "nenda ma Wei bere tetabonde, deyea Weate deseaibang ereikoi!" Neang domyea nembase neanta a yea mo erwaije. ³² Neagkhaijea, pokhaije yowa embainye, neang yowa nea do Getsemani, Yesus yea nea u na tomona yo te weumi, "dunengkho nenda ne, Deyea a yetemorombong." ³³ Neangkhaijea, Petrus, Yakobus, Yohanes neai Yesus yea yaweumiboke ewaije, neangbe Neuga pee neaisere tuwaweunge. ³⁴ Neangkhaije weumi, "Dea kena oro kenapekho tere tuwanare, Deuga teteterne manendea tuwanare. Nenda ne nekeng, khaya ute-ute tebempe." ³⁵ Angkhai, atau te ibi nakereusike mo, ototereng khani ne iseukoke mo a diywere, ³⁶ "Aba, Aye, nenda etamung nembase Weai eugate neasinoi mo. Nenda khorei Deaijea Dowei. Neandebe, Deai kena te khare maneng bang dea, Weai kena te khoyea manengdea." ³⁷ Neangkhaijea, nea u na tomona do name re te neandebe eteweumi kene tongwaije ne Petrus te weunge, "Simon, we tanye kene tonoyea? Meeyea khaya tu embai sinoi neasinoibang etebei sangkei? ³⁸ Khaya tebempe a morompe, meeyea nenda ututuwaiboijea meeyea ebarei. Boye bea takhoiboi kiyea rong da, neande be mereng ereabang." ³⁹ Beneng Ewere, Eke neang a embai beneng mongwere. ⁴⁰ Beneng meke bea, neaima eteweumi kene tongwaije, neijoko etekhoi tuwawanye ne, ne onewaije injeama yea Wenainyente. ⁴¹ Neangkhaijea, Yesus beneng dokho name neai meke mo weumi, "mee kene nemang tonauge? Ninea ya, nea tu meke, Domyea paa niki khombu domyea te Yenanyente. ⁴² Angnu, mana meng emarte. Majoko eteng, Deate yengminde domyea meke nobenyeboke." ⁴³ Neangkhaijea mo, Yesus a ne neanemang erere mo, Yudas, nea u na tomona yo norona do embai, domyea tereng bere mewaije, nea mene damyeari, o posi-posi, imam-imam yunjung, Taurat yunjung angkhai Yahudi na do tutuwa bere yea wakhaimire ewaije. ⁴⁴ Neang domyea mee te u te mokhombonde te kiya neande yo te nou yekeumi, weumi, "De etere yoise singtenesinde kiya, Neang Domyea neeyea. Ikerembompe mo khaya poijea eijea yawengetompe empe." ⁴⁵ Angkahi Yudas meke mo Yesus re bukhote nesbi ewere, eke mo weunge, "Rabi!" angkhai yoi sineungeboke. ⁴⁶ Neangkhaijea, neang domyea Yesus te ikereibokhaije ⁴⁷ Neandebe, neang noro na do embai anyuke, ne dame yomboke mo imam besar ne abuakho nengkeai neisake. ⁴⁸ Angkhai Yesus yea weumi, "meeyea nenda dame yea o popo yea Deai ikereiboise mekhaunge yokho te beaije yo maneng dea? ⁴⁹ Ya nebeai tu nebai Deyea maibere Bait Allah einye kerwekhamare, neande be meeyea Deate ikereiboi. Neandebe, nenda etamung nendata maneng dea yembonde tomompea einye mongkhoke manengdea." ⁵⁰ Neangkhaijea, nea u na tomona yoo nembai nukenyebokhaije mo takhawekhaije. ⁵¹ Tokhoro paa embai Yesus te takhonyeboke otowekhaije, kain lenan dea neuga pereuboke. Ikereibokhaje, ⁵² neandebe nemaro nukeuboke angkhai neamerangdea takhaweke. ⁵³ Neangkhaijea, Yesus yawenyetokhaije Imam Besar re be te ewaije. Imam kepala, do tutuwa, angkhai ahli-ahli Taurat adireusikhaje. ⁵⁴ Angkhai, Petrus Yesus te atauge takhonyeboke, eke Imam Besar de imea tounge. Neangkene, pengawal neai norone dumboke ii ne akerwaije. ⁵⁵ Imam yunjung angkhai Mahkamah Agama bere nea nembase a nee erea serea beawaije Yesus te atungnanyebonde mo tonaibonde, neande be pekho etamung Neai euga ne etanei. ⁵⁶ Tanyebang, domyea tereng a sinimbu meyerea mesewaije Neate totowainye, neandebe neang a embaibang, a neainya - neainya erwaije. ⁵⁷ Neankhijea, domyea neang-neang anyukhaije mo a sinimbu mesewaije Yesus te totowainye, wainye, ⁵⁸ Meeyea botowande erere, 'Deyea nenda Bait Allah domyea neai mee mombokhaije neasinoi keratebonde, angkhai ya name mo, ne sii tebetenenunde, neandebe meeyea momboi khayebang." ⁵⁹ Neandebe, nenda a khaye neaima neainya - neainya erwaije. ⁶⁰ Angkhai, Imam Besar neang noro ne tebenyuke mo Yesus te sineunge, "Weyea a embai ewei nii a sinoyayeuge te? ⁶¹ Neandebe Neyea ne mareu mo nekewere. Neangkene Imam Besar yea beneng Yesus te sineunge, "Weyea Mesias, Anak Allah buma te khorainye khaye?" ⁶² Angkhai, Yesus yea weunge, "Deyea neande kiya, meeyea emetempe Anak Manusia Yang Mahakuasa re meuge deusine dunembonde angkhai kungbuma na mangkhorandea nembase menaije." ⁶³ Angkhaijea, Imam Besar ne maro khangkhoke mo Weunge, "Tainye eyea neapekho te mo beande? ⁶⁴ Meeyea a pekho botowauge. Mai a injeama tokhoukokhauge?" Neangkhaijea, neang domyea nembase etee Yakhainyere, teteyea mo erwaije. ⁶⁵ Neang norona domyea suwa eiki yea towainye, nea be yoi perwainye, etasuwea yea sengwaije, angkhai Wainye, "Nubuat mana mokhoibo!" Neang khaya yo yea doukaje mo etasuwea seangwaije. ⁶⁶ Petrus Imam Besar de tounge nemang nekere mo, Imam Besar nea abuakho miyea na khaye meke. ⁶⁷ Angkhai, Petrus te eteweunge neang tounge ii nee akerwere ne bea weunge, "Weyea Yesus Nazaret na do bere nembase otowauge? ⁶⁸ Neandebe, Petrus neseaibang de erwere mo weunge, de deseaibang da weyea tai a be ereyea." Neangkhaijea, do mau khabang be te ewere mo ojo a khoukhoke. ⁶⁹ Neang miyea eiweke Petrus te eteweunge mo neangkena domyea tabaije te weumi, "nenda do nea do sii Neai u na atomona yo rongbea." ⁷⁰ Neandebe, beneng neseaibang dea ereukhoke. Nea tekibang mo neang domyea tengwaje yea Petrus te wainye, "Weyea nea do sii Neai u na atomona yoo, tanyebang weyea Galilea na do." ⁷¹ Neandebe, neyea beneng neseaibang de erwere mo weumi, "Deyea Neang do a te erauge khaye deseaibang da. ⁷² Neangkhaijea, ojo dokho be neai a khokoke mo Petrus Yesus yea wekeunge a ubene beinyekhoke, "Ojo a dokho be neai nemang e khoikoi mo, weyea Deate dokho name oneisekhore." Petrus nesbi dime te yenyeboke dimewere.