¹ Yesus a dawenyeboke mo atumbo-atumbo a yea weumi. "Do embai anggur imei mokhouboke. Neang imei ere sireuboke, aburu tareukhoke, khaya tengteng neai menara anyunuke. Angkhai neyea yoo moi se ewere ne bea neang anggur imei domyea te yekeumi mokhowaije. ² Anggur nimeibokhaije ne tokhonaije see mo bea, ne abuakho embai wekeunge ewere neane imei se mokhowaije domyea bukhote neang anggur na dera doweise. ³ Neande be, neang abuakho te ikereibokhaje mo seangwaije, neangkhaije tukenyesikhaje nea mee bangkha yea ewere. ⁴ Neangkene bea, neang do anggur imei do beneng ne abuakho embai wekeunge ewere. Neang abuakho te nea yung de seangwaje pekho mokhowanye. ⁵ Beneng abuakho sii wekeunge ewere be nesbi toibokhaije. Nea abuakho suwa yo te neaima mokhowaimi, suwa yo te me yea seangwaje, suwa yo nesbi towaije. ⁶ Anggur imei do ne domyea embai nekewere, nea keru kena te koweunge kiya. Neangkhaijea nea keru wekeunge ewere, nea ubene yea erere, "dea keru te mee beananyende ya." ⁷ Neande be, neang imei se mokhowaije domyea neaise - neaise erwaije, "nenda neyea imei do nea keru nenda imei se ikerembonde kiya. Tomabonde mo imei eaise yembonde. ⁸ Nesbi neang pa ikereibokhaije, toibokhaije mo imei moinye wookhaje. ⁹ Neang anggur imei do taibe mokhombonde? Mende neang imeise mokhaije domyea tongkonde mo neang imei dowende suwa yo te yengminde? ¹⁰ Nenda a tena embai Atuwa einya meyea ekhoikhoi mo nekeyauge: "Neang duka imea te moraije yo yea wokhaije douke nea tuwa na duka te yeuboke." ¹¹ Nenda neyea Tuhan de mee u, neang mee u nea poi moi tere. (Mazmur 118 : 22 – 23) ¹² Yesus neang a atumboke domyea tereng te Weweumi be neande yo iseyeubokhaje ne Neate ikernaibonte nibi a beawaije be, neande be domyea tereng te pee khowaimi. Neangkene Yesus nukeinyebokhaije mo neyea nesbi ewaije. ¹³ Taurat yunjung Farisi domyea bere Herodian domyea bere te wakhaimire Yesus re te mewaje taa te tainaikhonte, Yesus neai a peuw kenane ikernaibonde mentau be korwaije. ¹⁴ Mekhaije mo Sinanye, "Guru, meyea meseai Weyea domye poi, domyea suwa neai a ereyaije te Weyea ebotoi Nekeyeyea. Weyea domyea neai u mong-mong te Weyea etei, neande be Allah re wari nibi a be Kereyamea. Meyea pajak kaisar te neatere be mokhande? Neatere bang? ¹⁵ Neang pajak dera mokhomaponte, emokhoijea?" Neande be Yesus iseayeuboke neang domyea neai mentau taukaje mekhaje, neangkene Weumi, "Tainye mekhauge ututuwaiboi Deate mokhaute? Doi dinar embai Deate menteyeng, Deaijoko yea etetebong." ¹⁶ Neangkhaije neang doi doukhaije mekhaije Yekhanyere. Yesus yea sineumi, "Nenda sinde re u nuru bere sinde re u no mongkhokhaije? Neande yo yea Wainye, "Kaisar re u nuru bere u no bere mongkhokhaije." ¹⁷ Neangkene Yesus yea weumi, "Kaisar de khaye neai kaisar te yengempe, Allah re khaye neai Allah te yengempe." Neang domyea Yesus re nea ubene taiwaijang. ¹⁸ Saduki domyea, neang tete yea anyui a te erwaije yo Yesus re te mekhaije mo wainye, ¹⁹ "Guru, Musa yea endata mongkoke, akha beake bere do entetende mo nea miyea nukengebonde neande be paa bang, neang do ne akha beakhe yea nea miyea nare dowende nekeneije mo pa tonongende. ²⁰ Imea embainya akha beake nembase mepea embai mesining bee nekewaije. Bee na khaye miyea douke, nekewere mo teteke, neande be paa bang. ²¹ Neangkene bea, neang do teteke neugwake bee neai khaye yea nea miyea nare douke nekeweije. Neande be neang do beneng teteke, neaima pa bang. Beneng neugake name neai kiya yea douke. ²² Neang akha beake nembase teteibokhaije, nembase paa bang mo. Neang miyea nare nekewere mo teteke. ²³ Bure yea ananyunde see bea, neanembase ananyunde, angkhai neang miyea neaisere sinde re miyea te yembonde? Neang akha beake nea mesining bee ne nembase neang miyea bere nekeikokhaije mo. ²⁴ Yesus yea weumi, "Wari nibi neai Tomongpea einye mongkhokhaije be, Allah re erea wake neai meyea iseayeiboinye neangkene oneauge tandauge. ²⁵ Tainyebang, domyea tete noroyea ananyunde, do miyea edowei, miyea neaima do te ei, Surga na Malaikat maneng te yenaibonde. ²⁶ Domyea tete yea anainyunde yo neai a Musa re tomongpea einye mongkhokhaije mee ekhoikhoinye, oo taa neai abubu deusi na, Allah yea Musa te weunge, "Deyea nenda Abraham de Allah, Ishak re Allah, angkhai Yakub re Allah? ²⁷ Neyea tetewaije domyea neai Allah bang, Neyea wari te nekhaije neai Allah. Me'yea nea tere-tere ougeng norona. ²⁸ Taurat yunjung na do embai meke neang a eraeyaije ne botoyore. Yesus neang a sinainye nembase weumikoke ne bea, Yesus te sineunge, "Makere a tuwa khaye neai nea beena tere?" ²⁹ Yesus yea neng do te weunge, "a tuwa nea bena tere: "Israel domyea mana botombo! Eai Tuhan Allah wa Tuhan nembai tambai tere. ³⁰ Neangkene, Tuhan Allah te kenabuse ubuse sei - sei natere yea Sengempe, ma kena eijea Sengempe, ma unuru eijea Sengempe, ma ubene eijea Sengempe, angkai ma erea wake eijea Sengempe. ³¹ A bee neai khaye wa, kenabusea ubusea domyea te sengmimpe weuga te seanea manendea sengmimpe. Neai a bee keng da nenda bu khani rang na. A suwa berebang. ³² Neangkhaijea Taurat yunjung beneng Yesus te wainye, "Weyea neaijen tere, Guru. Weyea a tere bee Ereikokea, Allah Neyea nembai tambai, sii taa aukang. ³³ Neate kenabusea u busea sei-sei ea kena eijea, ea ubene eijea, ea erea wake yea Semanende, angkhaijea domye te kena buse u buse semaminde eai euga te seangende manendea semaminde, neande a peuw khaye neabena tere, persembahan etamung nea moinya moo. ³⁴ Yesus neang do a poi ereukoke ne bea, Yesus yea weunge, "Weyea Allah re yo waku yea atau bang." Neangkhaijea, domyea embai tambai Yesus te beneng esinei, pee yea khowainye. ³⁵ A mong-mong Imea einye Yesus Kerweumi mo Weumi, "injeama Taurat yunjung de eraije Kristus Daud nea keru? ³⁶ Daud neneaijea Roh Kudus eijea a erwere, "Tuhan dea deai Yundangte Weunge: Dea meuge deusine dumbo, neangkhaijea weai kenapekho te khayeuge yo wotoo kere ne Tatemikhonde. (Mazmur 110 : 1) ³⁷ Daud neneaijea Kristus te Tuhan dea doweunge. Nenda ma yea Kristus Daud re keru yea eraije?" Neang domyea tokhowere nea kena deimai khowaje. ³⁸ Yesus a ne Kerweumi mo weumi, "Meuga khaya poi tebempe nii Taurat yunjung te, neande ne maro khokho a yea yobaije, neang domyea yea a te mornaiminte keuburi yea khoyaije, ³⁹ ne angkeng dundung sinagoge einye nea bene khoroikiyaimi, perjamuan dangne aje bumakhabang neai yowa ne dungkhoyaje. ⁴⁰ Neande yo yea miyea nare meangke pa neai imea yatowaije, neang beaise tebeiboyaije a tekikhookho domyea bene moraije. Neande be ne pekho khabang tere enayatonde." ⁴¹ Neangkhaije, Yesus doi kengkeng neai bene Dumboke mo domyea otowaije nea doi kengwaje be Eteweumi. Domyea doi - dera bere yo mekhaije doi kakhabang dea mekhaije kengwaje. ⁴² Miyea nare embai meke mo nea doi logam doi keping bee khoroikoke, ne khabang sen embai. ⁴³ Angkhai Yesus nea u na tomona yo Kheaneumikoke mo weumi, "Deyea mate wamare, nii miyea nare meyerea khabang yekeumi. ⁴⁴ Tanyebang, nda domyea nembase neai kui-kui mea-mea eije yatowaije mekhaije, nii miyea nare nea khoukharo noroyea douke meke, neamena una nembase dukemeke taisike"