¹ Pelene eyea wali ondofolo neai a eleyere hila rabo haleanne yea Allah eare wali himalainyeboke romiyea yea me beaumene, Allah pele foi nekande. ² Yesus wali ondofolo neai a eleyere hila rabo haleanne walora, Allah eare kena buhea aere bang mea heume, wali hubanne. Nawaneng kena uw reimai jea roweumehike haubihine bang rabo elea haleande benaya honoi fiyo yene Allah yea na nene weawea eare kelemmle. ³ Pele earene mo bang, peleyeare nebang hubaimeyaime re kena reimai jea haweijeume, haubinine bang pele nebang hubamanende yea, kena - heweumende, wali ondofolo weume a huluinye mokomale neaite iteayemale. ⁴ Kena uw heraweunde yea wali ondofolo weume a hului mokande wali mekai hareande yea wali mekai hareande yea, Allah kena foite mokomanele uw mekaite iteaimale. Allah kenafoite mokonne uw mekai waneng nekande yea eai rabo elea haleande. ⁵ Allah are nulengekoke huluinye mokondere, rabo elea halemalene mehi hako efoloi, haubihi nebang Allah neai roh aumeboke walora aere kena buhea eumireumi yea heumire eai kena uwne hubannele. ⁶ Nawaneng eai wali aloibote, Allah merauke rangehike ya na ijene a uboke Allah are ei ehawei romiyea earene Yesus wali ondofolo meufereke. ⁷ Yabi yabi hele romiyea wali himalainyeboke yo aerene herende neaite ehe konde. Na hului roko mbemba hele romiyea uw mekai foi mokoye kiyeare earene ro miyea mbai be rabulembonde herende. ⁸ Peleyeare Allah eare kena buhea hemmele neaite rake nibi yea keleumiboke eyea uw mekai nebang yea mamman eaumeboke hurewande hee, Yesus wali ondofolo ukeunge eai earene meufereke. ⁹ Wali ondofolo na rokiy roha rileuboke yea nibi mbai mokouboke Allah yea wali himalainyeboke romiyea yea me beaume neaite iteayeandebokene emekai yeale rabo elea haleande, Allah romiyeare ehe pukulu yemmikonde yane eare wali ondofolore walora hole molommebonde. ¹⁰ Haubihine bang, bere eyea nammam Allah neai yokeijo nekewande hee Allah neai hina fa hoifa, Yesus, hereke walora, Allah bele foi nekemande nibi mokoubokene, emekai bele Yesus waleuboke, benen wali nekeye walora eai wali hole molamende. ¹¹ pelemo bang, Allah eai neaite foi mokoubokene, kena uw reimai rowemele eai Tuhan, wali ondofolo Allah bele neai foi nekemande nibi mbai mokouboke kiyea Allah eai neaite mokouboke nanemene yakalawoume. (Herere Adam me Einya, Walire Kristus Me Einya) ¹² Uw mekai wamekai nebang, rombai adam meke walora rake kani kelare meweufike, nawaneng uw mekai mokonatene Allah waheukoke romiyea nemene uw mekai mokonatene Allah yeale wahenaikonde, nawaneng here yea eaumi fonde. ¹³ Taurat walora wali heere folakoke nammang eyei jea, rake kani kelana romiyea uw mekai wa mekai nebang mokaimeke, peleyeare Allah pele hena romiyeare me onoyoi, haubihinebang wali heere folaikoke nammang eyei nawaneng asasi kaikoke neai ekeleiboi hulu. ¹⁴ Allah uw mekai nebang mokawate romiyea me onoyoi horoyeare, adam nekewoye heera meke Musa nekewoye heene romiyea uw mekai nebang mokowatene Allah yeale waheakikoke nawaneng heraiboke, meahea waneng waneng mbai Yesus meke heera romiyea ehi neai walire haraungeboke. ¹⁵ Peleyeare Allah eare bang bea romiyea nibi neme ikeumi wali himalainyeboke romiyea me beammile neai pele adam bea uw mekai nebang mokoubokene romiyea Allah yeale waheinaikonde nanwaneng herenate neai pele neneai waneng haubihine bang ro mbai adam mo uw mekai nebang mokauboke earene, romiyea heleng Allah yeale wahaeikoke nawaneng herewate. Peleyeare emeikai yeale Allah romiyea heleng re kena buhea eare bang mea heibomi, nawaneng pele romiyea heleng neaite ro mbai Yesus wali ondofolo eare bang mea wali himalainyeboke yo yea me beammile nibi neme mokouboke. ¹⁶ Nawaneng Allah eare bang mea romiyea ukeumi wali himalainyeboke yo yea me beaumi nibi neme neai yeale adam bea uw mekai nebang mokouboke ne romiyea herenate neai pele neneai waneng ba - haubihine bang adam de me uw nebang mbai earene Allah yea romiyea neai walire hului koloumi me noyeumi peleyeare romiyea heleng uw mekai nebang mokowatera, wali ondofolo eare bang mea wali ijene yo yea me beammile nibi mokouboke pele nibi walora Allah romiyea re wali himalainyeboke yo re me beamimile. ¹⁷ Meahea waneng horo adam ro mba keng uw mekai nebang mokauboke, walora nemene Allah yeale waheaikoke nawaneng hereijate, emeikai jale Yesus wali ondofolo mbai keng wakora romiyea wali hena bona enainyehubande. ¹⁸ Pelene adam de uw mekai nebang mokouboke yea romiyea nanemene heleme nommiyonde waneng mbai wali hena bona uw mekai hubainanyende neaite Yesus wali ondofolo me uw na ijene hele mokouboke yea Allah yea romiyea wali himalainyeboke yo yea beammilere. ¹⁹ Allah ukeunge are adam ehakoiboi, romiyea nanemene mokoumiboke uw mekai nebang beale yore yeaiboke pelehului mbai Yesus wali ondofolo Allah ukeunge are hakowoungene, romiyea mokoumiboke Allah ro be ro roinye wali himalainyeboke romiyea yea beammile. ²⁰ Romiyea uw mekai nebang yeale mokonate yealene, Allah yea Tauratre walora wali heere folaikoke a ukeumi. Nabere romiyea nanemene uw mekai nebang mokowatene Allah yeale waheaikoke herewate waneng mbai. ²¹ Rake hee Allah romiyea kena buhea eare bang mea heijeumi earenena hului wali ondofolo neai a eleyere hila rabo haleainye walora wali himalainyeboke yoeame beamile nawaneng wali hena bona uw mekai enainyehubande neate pele uw mekai nebang emeikai yeale mokate romiyea, Allah nahului kena buhea eare bang mea heumi.