¹ Aka neai beake neai, Allah ei haweumene, reyea moi huramale mai uw wali yeale hili eha akau eha yoloyolo waneng Allahre kinyennebo Allahre yea eleuboke wekeunge holona uw mekai waneng mea mekembe pele wwali waneng nekaube yea meyea nahele Allahre ei molaunge. ² Rake kani kelana wali nebang nibire ehakoijea, peleyeare Allahre weannehimbe mai uw bene nekenayembe nemere mokonembombe pele mekai jeare meyea iteayembombe maka me uw mokonnehere Allah kena koye. Nawaneng Allahre foi yoni yoni belere nakena foite mokonnele nanemene belere wali ijene yea nekembe nibi belere meyea iteayembombe. ³ Rare Allah kena buhea eare bang mea heukene, reyea wamale mai uw bene eisameikoi kayeroyea uw benene enekeyeijea, peleyeare wali ondofolo neai a eleyeare hila rabo haleaubene, Allah meli mekai ikembeyea mai uwre hulu kolonnele. ⁴ Eai uw na mbaite hikeakate yo heleng, pele yo kalia neneai meneai. ⁵ Pele mekai mbai, eyea romiyea heleng horo yea Yesus neai eleyere hila rabo haleandene uw mbainye yeandeboke, nawaneng eyea pele uw ne barandekoke yo mbainye nekemale. (Wali Maei ) ⁶ Eare uw ne Allahre Roh eare bang mea ikeume nameli mekai yarandekoke, Allah weung are huwemmile meli mekai ikeumi romiyea yea, Allah weunge are hila rabo halate hului jea huwenate. ⁷ Romiyea hakommile neai meli mekai weumi, romiyea pele huluijea mokonamile, romiyea a uw iteai wateaite kelemmile meli mekai ukeumi pele huluinye mokonaimile iteainyeimile. ⁸ Kena uw hara roromile meli mekai ikeumi romiyea yea pele hului jea mokonaimile neai hambung ei wahe mei wahe waheumi meli mekai ikeumi romiyea kena feare feare yea wahenaimiyende, belere enate ehi yore yawenaimile meli mekai ikeumi romiyea yea pele kalia kena meamea yea mokonate ehi yore yanekoi yahe yea ei hawenaimile meli mekai ikeumi romiyea yea kena uw reimaijea mokonate. (Allahre Kaliya Mokomale maei Utaei) ⁹ Romiyeare kena buhea uw buhea mai kenare na meamea yea hemmile uw mekai nebangda wemembe, uw mekai foitemo me bobo ikilembombe. ¹⁰ Ako nake mbainya aka beake wanneng mea maite neaite kena buhea uw buhea hembe nawaneng mere mokayembe holo waneng ei hawemmile. ¹¹ Mai paka rangna haibayeambe kalia yoni behuwea eheneai jea Allahre roh wembe a hului Tuhande kaliare mokombere. ¹² Mai kena reimaijea nekembe, haubihine bang, rabo elea haleambe Allah nuleungeboke ahuluinye mokombe. Nebang hubanayembena kena yea herawemembe, no bang hebang bea Allahre ebeli bonnele. ¹³ Yesus neai eleuboke wekeumi romiyea wali hambung de kalo molaimiboke yo neai wali hambung yoni yoni nahului sului emmimokombe mai imeare menate romiyea kena remai nime haba yei ei hawe mmile. ¹⁴ Mare weitaisi konayembe romiyea re olomo orormmi mea Allahre ebeli bonnele pele romiyeare foi yoni yoni yemmile. ¹⁵ Ehiyo kena reimai enaikonde, mambele mbainye engsawembombe rei mai kombe, nawaneng rime enaitimendena mambele mbainye endimembe. ¹⁶ Mambele mbainye foijea nekembe mai uw yea eihamekoi hambung de eleijea peleyeare be ijoko haba emekai yelea yea romiyea yeale ohombe mai uw re iteai haba emekai yelea yea eyelei jea. ¹⁷ Uw mekai nebang bea mokonayembe romiyea meyea uw mekai nebang bae ebaeijae. Romiyea nanemene naijere ereimi elatene me uw mo mokomembe. ¹⁸ Nahinggi na, mai wali waneng na yane beai romiyea nanemene kena foi uw mokommile. ¹⁹ Aka neai beake neai, uw mekai nebang mokayeuboketere, wenea jea ebeyei jea hele, neai foi sele Allahre homo fea einyea Tuhan mea elewoye are rake waneng molaikoke, reyea na uw mekai nebang eremibende. ²⁰ Mai yokei jo moni konde, nare hamang bea yeungele anengggonde, buki kondena bu yeungele anensinde, pele me uw eungemokoubonde, wayokeijo nayun ranne iseng bea hanyeungekokanea fee eungemokonde. ²¹ romiyea ehi ware uw mekai nebang mokoiboketeyea meleneisaite neaite mehau bea eweaisi jea peleyeare uw mekai foi jea beaungehondene neai uw mekai nebangde meleungehande.