¹ Pelene, reyea hinale, meahea waneng Allah neai holona romiyea Israel yohore moijea buleumiboke? Bele waneng bang haubihinebang reai uw Israel na ro Abrahamde orona mena, Benyaminde yohena (namekai Allah raremoi ebulei). ² Na beme fomere, Allah eleuboke holona romiyea, neyea moi ebuleiboi. Israel na be elea uw elea a yea Allahre yendo kayalo Elia yea Allahre ukeunge Allahre homofea einye molaikoke, are bene nekenayembe. ³ Tuhan, neyea yenjo kayayo hoibate, ware hili akau ehare onggou bea felayete anuwau keralewaimi - weyea wamea are hakoyate romiyea holona rembai sele nekale yea ipeleyeare kena kabang kate reare honaitebonde re. ⁴ Peleyeare Allah eliare rake a yea beungehoke, weunge, Elia wembai bang, romiyea 7.000 hele nammang rare ei molaitele reyea hole molowameale peleyo walobo baal yea yoi waneng mbai hambungde eite molonainyelere roko mbai oro hel eitoroiko nekeimiyate. ⁵ Pele waneng mbai rake hee Allah ro miyeare kena buhea earebang mea heyeumi kiyea yea wali ondofolo hila rabo halentate neaite, Yahudi romiyea holo kending eleuboke wakeumi. ⁶ Allah romiyea kena kena buhea eare bang mea heyeumine, pele romiyeare eleuboke wekeumi neai me uw foi mokowatene bang, romiyea neai me uw foinye eleuboke wekeumina, Allah romiyeare kena buhea eare bang mea ehei. ⁷ Pelene a fof yea elale, Yahudi romiye heleng wali himalainyeboke yo yea me beaimele nibiyea beaibate yea ehubayeikoi hului pelene Allah eleuboke wekeumi yo mo hubayeaikoke ehi romiyea Allah yea kena uw eleakeai mokoumiboke. ⁸ Homo feane molaikoke nekeye, Allah yea Roh nei ehuweiboimeai aumibokena ijoko kumbamiboke nawaneng anggeai roroumiko, meke rake hee yeale. ⁹ Nawaneng Yahudi ondofolo kabang Daud yea neai yokei jo re rake a Allahre riyenungehke waneng, eanhini, peleyo neai kenare moloijaimi yoni yoni neai uw neai walanggare eneiyembonde, nawaneng ora halungde enai yembonde balenate, nawaneng nare ehe pukulu inyaimile. ¹⁰ Peleyo weai keleamea wali nibi are iteayeibo, neaite na uw benere kobu emmimokonde, nawaneng na moko ranne ehe yeale hambung eumihayende nakambi weiti keaiboi bang nahibi mo ohonayende. ¹¹ Yahudi romiyea pelemekaijea naleumihike balekatene Allah moi be buleumi boke na hibi mo nekena yende a reyea pelei. Allah na mekai waneng haraungeboke Yahudi romiyea uw mekai nebang mokowate earene, kena hensen enakonde neaite Yahudi romiyea bang holona yo neai wali hole emmimolombonde. ¹² Romiyea bang yore foi yoni-yoni Allah ei aumiboke - peleyea nemeikai yeale Yahudi romiyea bukenaibonde wali ondofolo hila rabo halenate hee, Allahre me einye. ¹³ Rake hee meyea Yahudi romiyea bang yore reyea wamale, Allah rare kaneukekoke mai foi neaite wali ondofolore abu akore yeubokalene mai earene kalia mokalere na bereite eranale. ¹⁴ Pele kalia yea reyea rabo haleale, reai yoho mbainya romiyea, Yahudi yore mokoremibonde kena hensen konayende, nawaneng Allah yea ehi wyore hole. molommibonde. ¹⁵ Allah Yahudi romiyea moi buleumiboke hee, wali ondodfolo nibi mbai mokouboke rake kani kelana Yahudi bang romiyea yeale. Allah yeale foi nekenate Yahudi romiyea wali ondofolore hila rabo halenainyelene, Allah beneng neai holona romiyea yea me beammile hee, romiyea heraibokera beneng walenaiboke waneng mea inyaibonde. ¹⁶ Na bere hele Yahudi eha hena hului feli ke aleibiyate hee, bohi mbai Allahre hili akau hare yeainye, pele hili eha akau weha bohimbai mo Allah neainya bele feu kabang nawanen Allah neai bangga mo (pele waneng mbai Yahudi yobe neai kamehe neai Allah yea neai holona romiyea me beaiboumine, neai orona menare nawaneng me beammile, nawaneng ombai na kambu finya, na akai meansea yoni yoni foi bangga mo. ¹⁷ Zaitun nona akau meansea ehi roraikoke waneng Abrahamde oro mena Yahudi romiyea ehi Allah yea moi buleumiboke, bele akau meansea roraikoke ijene aye hibona Zaitun akau meansea yaraikoke, mekate Zaitun meleme yea raisikene arunanyekoke waneng mea, meyea Yahudi bang romiyea wali ondofolo re hila rabo haleaungene Allah niyea neai holona yo yea me beambe. Bele Zaitun meleme na nona kambu mbaijea akau meansea aruneuboke yo hamang anaye, wali nekeye. ¹⁸ Meyea bele akau meansea roraikoke anuwaunge arunayenggombene, uw meangge okoi jea hele, uw meanggeu kombena, bene foi jea nekenayembe meyea akau meansea yea pele kambure hamang enarei, peleyeare kambu yea akau meanseare hamang narenge. ¹⁹ Mai uw benera rake waneng elaubemeai, rare nahului arunenaitebonde neaite pele akau meansea roraikoube. ²⁰ Pele nahele, pele akau meansea roraikoke waneng romiyea wali ondofolore hila rabo ehaleinye, Allah yea moi buleumiboke, peleyeare meyea wali ondofolo hila rabo haleaungene meyea Allahre holona yo yea nekaube pelene embei alkoite ekoijea, buhea yea hokonembe. ²¹ Haubhine bang pele no helena akau meansea waneng Yahudi romiyeare Allah moi buleumibokena, mare pele waneng mbai wali ondodfolore hila rabo ehaleinya moi bulenembombe. ²² Pelene weren! Allah na kena foi uw foi jeale nawaneng kena elea uw elea yeale romiyeare mokojeumi. Yahudi romiyea nare moi buluainyeboke yore, Allah na kena elea uw elea yeale mokowoumi - peleyeare meyea Yahudi bang romiyeare Allah nakena foi uw foi mokombene heleng foi waungele wali mekai nekembena nare nahibi kena foi uw foi mokonemembe myea mehi nekembena, Allah mare moi bulenembombe. ²³ Namekai Yahudi romiyea wali ondofolore hila rabe enaisalendena, pele Zaitun no ruleukoke mbainye beneng aru nemmikonde waneng Allah neai holona romiyea yea me beammile, Allah nahinggi beneng arunemmikonde. ²⁴ Uw bene nekenayembe meyea Yahudi romiyea bang yo aye hibona Zaitu no waneng peleyeare mai uw mekai neneai waneng nahului meleme yea raisi Zaitun none arunayembokembe peleyeare meyea maiteai Yahudi romiyea Zaitun melemena akau meansea yea rulaikoke hanyeaikoke yowaneng, Allah nasong mekai jea bemmihonde pele yo Zaitun meleme ne arunemmikonde. ²⁵ Akai neai beake neai, Allah mare mo buhea hembe hubaungelene, embei aikoi okoijea neaite, reai kena kale waneng bea nunne heraweuboke are iteayearembombere, Yahudi romiyea holo mbai yun keang keang konaimende mende Allah merauke raungeike Yahudi bang romiyea nare hakonainyeboknde yo nahului yembonde yane. ²⁶ Rake nibi yeare Yahudi romiyea nanemene nawali hole emmimolembonde na a rakewaneng mea haisike, romiyea wali hole moloiboi ondofolo Yahudi yo kabang, Sion neai romiyea nolora mende neyea mokommibonde Yahudi yobe, Yakubre orona mena yo beneng Allah kena koye huluinye nekenate. ²⁷ Mai earene Yahudi romiyea wali ondofolo afoi feau foi ehakoiboinye Allah neai yokeijo yea romiyea wali me beammi, peleyeare Yahudi neai yobe neai kamehe neaite a heteungkoke earene Allah kenare koukoke huluinye Yahudi romiyeare elengbokembe. Allah pele holona re nahibi kena buhea hemmiyende. ²⁸ Mai earene Yahudi romiyea wali ondofolore na a foi feau foi ehakoiboinye Allah neai yokeijo me beaumi, peleyeare Yahudi neai yobe neai kamehe neaitea heteungekoke earene Allah kenare Yahudi neai yobe neai kamehe neaitea heteungekoke earene Allah kenare koukoke huluinye Yahudi romiyeare elembokembe. ²⁹ Allahyea Yahudi romiyea foi neai a heteungekoke neaite, nawaneng nare neai holona romiyea eleuboke wekeumi neaite, Allah eleukoke a huluinye mokongkonde hele. ³⁰ Allah weumi a huluinye ehakoi earene rake hee Allah nabere a weibombe a huluinye ehakoi yore, yanekoi yare ei hawembe waneng mbai Allah nare mokommibonde. ³¹ Allah mare yanekoi yare yea ei hawembe waneng mbai Allah nare mokommibonde neaite, rake hee meyea bere nekewaube wali waneng Yahudi romiyea Allah weumi a huluinye ehakoi. ³² Allah a hului yanekoi yare yea romiyea nanemene ei hawemmile neaite Allah weaumihike romiyea nanemene neai weumi a huluinye ehakoi wali yea nekate. ( Pujian bagi Allah) ³³ Rekena uw roweisi yaele. Haubihine bang Tuhan neai iteai haba na bumana hele, na a hokoukoke yoni yonire romiyea ei iteaiboi hulu neai me uw mokoyere mbai sambai ehameikoi hului. ³⁴ Mbai sambai jea Tuhande uw bene wa benena nekainye wei iteaiboi namekai roko mbai wa uw iteai nare ewei. ³⁵ Mbai sambai Allahre hambung eyei, beneng Allah yea bennehondere elea molojeunge. ³⁶ Haubihine bang rake hambung nemmene Allah yea mokoukoke neai elea ye nekate nare bumane keanainyele neaite nekate nembai mo huba bang heai bang, hili hebenainyele! Amin.