¹ Yesus yae weumi, "Rake a nehale yae mare wamale, mai nolona ro ehi yo, ehereiboi nekenate Allahre yo-waku erenaibonde. Yesus Bersama Musa dan Elia ² Ya mehine mbai yeubokemo, Petrus yae, Yakobus yae, Yohanes yae, Yesus yaweumiboke homunggaere ikate. ³ Yesus Na u mehi hele yeuboke, Na malo wili halamam bouboye, Ro mbai jaerake kani kelana nekande bele keleumom mekai emokoiboi hangga. ⁴ Hokolo name bene, Elia re, Musa re yakalaiboke, Yesus Naei ane elate. ⁵ Belera Petrus yae Yesus re wenge "kulu, foi sele rake anuwaunge mekanekande. Mem, eyae fale name hemakom, mbai Waei, mbai Musare namekai mbai Eliare. ⁶ Petrus mekayae elenggonde, fe faeuboyene. bele a mekai nasom bae eleukoke. ⁷ Wau keleumom meke hileumikoke, bele wau nolora anggaei borowate a meke weumi, "Rake Raei kelu Neyae, Naere mo anggaei boronnele!". ⁸ Hokolo name na ijoko rikere-rakere erewote bae Musare Eliare nundeuboke, Yesus nembaimo erewainyele hebewoye. ⁹ Homunggae ra akayoke hee, Yesus ahum raumihike na ijoko erekate romiyae ehire ehuweijaemo nekenate, Naei walembonde ya enaisuwende. ¹⁰ Ahum raumihike romiyaere ehuweyei nekayeke. Hokolo name na mo-mo inyekate hee isinate, mehae mekaite Yesus nuluyo-mahe yora annunde walembonde eleukoke. ¹¹ Yesus re hinanyele, "Mekane Tauratre itayaeiboke yo yea elate, Elia bere holo yae mende?" ¹² Yesus yae weumi, "Nahele Elia bere holo mende, nemene fomene mokonehande. Mehae mekai jae moloukoke, Allahre hina fa-hoifa menderelennkonde, a wewe yae, auka-kaka yae konatele. ¹³ Beleyae Reyae mare wamale, Elia nehale meke, homone molaikoke wanem name u meke mokowoye. " (Bulo Walobo Etuwei Hului Aei Elae Wakeyae) ¹⁴ Yesus hokolo name nembainye nokainyele homunggaera namota ohowate ehi bokore oubate mo, ijoko erewaimile romiyae helem sele arilewoye, na mota ohowate yo yaele, Tauratre itayaeiboke yo yaele ane kilewate. ¹⁵ Belena hebate yo na ijoko wekate Yesus yae eranyele, nahibi Yesus na ure hebaelate. ¹⁶ Yesus hineumi, mekayae meyae Tauratre itayaeiboke yo yaele kilaube? ¹⁷ Bele nolora ro mbaijae Yesusre weunge, "Kulu, rakelu yae yaweungehokale mekende, bulo walobo yae mokoungeboke anggaei kokum yeuboke. ¹⁸ Bulo walobo meye keluweye hee, kaeibiyoye ane woyoye, na eugwara olokee yae mo itilewoye, na iteha roroikiyoye, na u kabam elaekaei halaekaei yeibiyoye." ¹⁹ Yesus bele riyaere weumi, "Meyae rake heena nekaube romiyae hila bam rabo bam yo! Mekane Rare hila rabo ehalei sele, namekai kena nebam hele hubanale, mambele nembainyemo nekeimiyande yaere bele yaere Rare eyitaeiboi mo nekeimiyaube? Bele fa rakere yaweneho meu!". ²⁰ Bele fa Yesus bokore yawainyehoke ekate, nabe bulo walobo Yesus re erekeungene, bele fare na u mokoungeboke nei-nyei kouboye, ane ruke eyole-meyole olewoye, na eugwara olokee mo balaimeke. ²¹ Yesus rake fa naekore hineunge, "Mbele heeyae rake u mokoungeboke koumeke? Naekoyae weunge, "Na kendingra mokoungeboke koumeke. ²² Rake koye u mekai mo bam, roko mbemba bulo walobo i ranne reweye kaisiyeunge, roko ehi rom bune kaeibiyoye woyoye, honaibondere mokainyeke. Belene meyae riyayete, Weyae ha eme mokoibo, kena buhae heimoko namekai maere rikeimobo." ²³ Yesus yae weunge, "Mekae aerene eleukokae, "Nahinggi mokoubondena'? Romiyae yae Rare hila rabo halaenatelena, nemene-fomene nahinggi mo!. ²⁴ Rake fa naeko hele rimeye a rimayeunge, "Reyae rabo halewale!" Riketebo, hila rabo elae roukele. ²⁵ Yesus ijoko ereye romiyae hele arilewoye, bele bulo walobore oku nekeunge, wenuge,, "Weyae amum-anggaeibam bulo walobo kiyae, Reyae wawale, rake fare u bulura etuwe, benem eyeruleijae!" ²⁶ Bulo walobo enduwendere rake fa mokoungeboke na kelae yaele kanewoye, nahibi bulo walobo ekuke. Rake fa oro me bae hayeuboke, romiyae yae elate, "Rake fa hereke!" ²⁷ Bela yaere, Yesus namera kileuboke, yenggeungekoke, rake fa aunguke. ²⁸ Yesus imae ete aruleufikemo namota ohowate yo yae hinanyele, "Mekane meyae bele bulo walobore ehukeisi hangga?" ²⁹ Yesus yae weumi, "Rake bulo walobo kaye etuwei hangga, hambayae ya hele wa nahului enduwende. " (Yesus Herende Maei A Yae Benem Elewoye) ³⁰ Bele anuwauka, Yesus namota ohowate yo yaele Galilea kanira ewate. Naei kena koye romiyae eyitayeijae. ³¹ Niyae namota ohowate yore kelewoumi mo weumi, "Allahre khelu, romiyae mene kinyaiboke honaibonde, namenem ya Neyae annunde. ³² Namota ohowate yo onewate handawate meka a yae eleye, beleyaere fe yae koubate hinenainyehindere. (Ane Kilewate Hinyeyae Kabam Naei Holona) ³³ Kapernaum yone mekhate, bele yona imae mbai ete arulaiboke wa Yesus hineumi, "Nibi nolona mande, meyae meka ahuba yae huweimiyaube?" ³⁴ Bele yaere nanemene abam mo yaeiboke, mekanebam, nibi nolone mate naete-naete eleimiyate, hinye yae naei nolona kabam re, naei beyu-beyebare yeuboke. ³⁵ Yesus nuweuboke, namota ohowate yore kaeneuimikoke wa weumi, "Hinye yae rore ronainyebondere na kena koyena bele kiyae naei ro are yae mokonnele, nemekai romiyae nemene maei yebaei-bubaete yembonde. " ³⁶ Belera Yesus fa kending mbai rokeunge na nolone haungeboke, fa kending hari aungeboke wa weumi, ³⁷ Hinye bake fa kending Raei aerene foijae ei annebondena, bele ro Rare eijae haweuke, namekai hinye yae Rare ei hawendelena, bele ro Rare mo ei hawendelena bam, Allah rakere ukeuke mekale Kiyae yaele, ei haweunge. " (Yesus Ro Einye Bulo Walobo Hukaimile) ³⁸ Belera Yohanes Yesusre weunge, "Kulu, meyae ro mbai ijoko erekannele, Waei Ro yae walobore hukeungehike, bele mekai erewannelene meyae ahum rannehike, mekanebam, bele ro aere ehakoiboi ne." ³⁹ Bele yaere Yesus weumi, "Ahum okoloijae, mekanebam, romiyae hinye maenim Raei royae ha eme mokobonde kiyae, bele ro Rare a nebam ewei hangga. ⁴⁰ Hinye ambele me kena u kena ekinyeinya, bele kiyae aei refinare yeuboke, aere hakoumeboke. ⁴¹ Reyae nahaleyae wamale, hinyeyae ware Raei holona yeubokae ohoyaene bu inyete aneufindena, bele ro na me buhae Allah ennehawende. " (Niki Kanau Oleukokae) ⁴² Hinye maenim rake fafa mokonaimibonde, wabenaimihinde nebam nibine enaibalendena, bele yo nebam hele na waline hubanainyele. Na foi sele bele ro miyae wanem ruka kabam na horo ra hayae bainyaisinde buweinye enaiwoyonde. ⁴³ Wa meyae nebam mokombondena, bele me neufande wowonde, me mbai jae sungare eruleufinde, wame nabene hereye na ine hukeleye. ⁴⁴ Bele anuwau aki-hem eherei boi koijate namekai i bolo-bolo ekebeikoi hangga bejeye. ⁴⁵ Waei oro yae nebam mokombondena, bele oro neufande wowonde, na foi sele oro refi mbai jae surgare ewefinde, oro na bene hereye he i ne esukelende. ⁴⁶ Bele anuwau aki-hem ehereiboi koijate, namekai i bolo-bolo ekebeikoi hangga bejeye. ⁴⁷ Wa ijoko yae nebam mokombondena, bele ijoko kaye keleufinde wowonde, na foi sele ijoko refi mbai jae wali hena esubayeukonde, ijoko na beene eyena, hereye hee, i nolo ne esukelende. ⁴⁸ Bele anuwau, aki-hem ehereiboi koijate namekai, i bolo-bolo ekebeikoi hangga beijeye. ⁴⁹ Romiyae nanemene i walora wali hena enaisubayende. ⁵⁰ Hae na yu foinya, bele hae na foi. Beleyaere na yu u yembondena, mehae mekai jae mokoungebonde yu yaele yembonde? Mai wali einye hae yaele wanem bae wali nekembe, foi ehire-ehire mokommile. "