¹ Beleramo Farisi ro miyae yaele Tauratre itayaeiboke yo yaele Yerusalem yore mekate Yesusre hubayenaikondere. ² Bele yo Yesus namota ohowate yo ijoko erewaimile, hamam re anenate hee name bu ekuyeikoi anewate. ³ Farisi romiyae, Yahudi romiyae yaele, na yobe-yobe kelewaimile, hamam emaeneijae name bu kuyenaikonde hamam anenate. ⁴ Yahudi romiyae anuwau kabam ra menate namekai riya kabamre menatena, hamamre anenatere na me bu kunyaikonde, betamo hamam anenate. Na yobe-yobe maei u maekai me bobo hele kilaiboke mokayeke, rake niyae, kolaei, bu yaijai anuwau, olo mebe tembagara mokaiboke kiyae. ⁵ Farisi romiyae, Tauratre itayaeiboke yo Yesus hinainyele, "Mekane Wa mota ohaube yo, yobe-yobe maei u mekai-wa mekai, na wanem a elewatere ehakoiboi nekate, na me bu ekuyeijae feu anate?" ⁶ Yesus weumi, "Yesaya aei yendo kayaaro mai u nebam mekai nehale yae ayem kolowoye, elewoye, "Rake yoho-yonggo na eugwa bonei randamo Rare buma kolatele, bele yaere na kena u bae ahau buhaunga hele. ⁷ Rare nasom hele yae ei molaitele, na utaei-wataei bae ro maei miyae maei eha henayae roukate kelaeimile. ⁸ Allah re ako faeukore meyae moiteyae hayaeukoke, ro maei-miyae maei eha henayae meyae kilauboke elae beimiyaube. " ⁹ Yesus na hibi a aruneuboke weumi, " Mai yobe-yobe maei eha henare hakoijaube mokoijaube, bele yaere Allah ukembe are, moinye hayejaube. ¹⁰ Musa yae a eleukoke, "Mai ako-nakere enera-faita yannemiyembe, namekai hinye yae naekore-nenakere a nebam wemmilena, bele kiyae honaibonde hele. ¹¹ Beleyaere meyae romiyaere kelaummile nenakere nakore wemmile, Anare ataeite, mai wali re hakorebobe hambum roukele Allah re hili eha akau ehayae mekai ereniyendere.' ¹² Bele mokaibokere meyae romiyae ikai eyeisele nakore nenakere foite mokonaimilere. ¹³ Bele eha hena mokaibene Allahre ako faeuko mokaungele habuhi bam baete. Rake wanem me u nebam helem meyae mokaibe. " ¹⁴ Beleramo romiyae ahaunga hebate yo nanememne Yesus kanewoumi na bokore mekaite a weumi, "Raeinya a wamale borondebonbe, namekai nou henggombe. ¹⁵ Hambum ehi mekai mota ete ate yae romiyae maei u mekai nebam nikire emokoiboi hangga, beleyaere kena eita, u benera, eugwa beneita baleimiyate bele hambum yae nebamre nikire mokaimile. ¹⁶ Meyae anggaeite boraube romiyae bele are nou hembe!" ¹⁷ Beleramo Yesus romiyae helem nukeumiboke, namota ohowate yo yaele imae mbainye arulaiboke, belene na moita ohowate yo a arumbo-arumbo aruneubomi eyitaeiboi mo nekate ne Nare hinanyehike. ¹⁸ Yesus yae weumi, "Meyae namam itaeyeiboi mo. Meyae itiam hele, hambum yoni-yoni romiyae maei ugwa moita ete ate naei u mekai nebamre niire emokoiboi hangga. ¹⁹ Mekanebam, eugwara ate kaye kena eite ei bambae, yehale eite wate kaye, bele neyae anuwau nebamne, kendo kenyahu beijate bele anuwaunge eyokande." ( Hamam, Naneme Eli Hohore Enekei jae) ²⁰ Benem Yesus weumi, "Ro maei miyae maei kena ura balenayende hambum neyae naei u mekai nebamre nikire olenggonde. ²¹ Mekanebam, kena eita baleimiyate rake niyae: u bene nebam, yoko kaimae, yokore, romiyae hoisoi, romiyae yaele miyae ro yaele mbainye hononetere, ²² romiyae ehi maei hambum kena hae-hae kojate, nebam benate maei mokojate, karebai-akrebai, kena hensem, a hufuuke huweijate, ukai namekai kobu-kobu. ²³ Bele nebam nemene romiyae maei kena ei u eita yakalate, romiyae maei u mekai nebamre mokaimile. (Siro-Fenisiana Miyae Na Hila Rabo) ²⁴ Bele anuwauka Yesus kulum uke Tirus yaele Sidon yaele bele kanire euboye. Yesus imae mbainye aruleufike, bele yaere romiyae ijoko erekainyele. ²⁵ Bele yona miyae mbai, na maengge walobo yae aungeboke, Yesus meke anggaei borokene, hasalemo meke Yesus bene oro hele roroukoke. ²⁶ Bele miyae Yunani na, Siro-Fenesiane honggate. Bele miyae Yesusre riyewounge, walobo na maengge ura wennele enduwendere. ²⁷ Belera, Yesus bele miyaere weunge, "Fafa bereyae hamam anenaikonde wande inyaibonde. Namekai bam hele, fafa maei hamam bambae yokure hayemamilere. ²⁸ Bele miyae Yesusre weunge, "Nehale Tuhan, beleyaere hamamre anate anuwau kelena yoku hebate, hamam mori-mori balatemo yoku yae anate." ²⁹ Yesus bele miyaere weunge, "Bele a mekai warene, mana weyae eye, walobo wa maengge na u bulura meukuke." ³⁰ Bele miyae beufoke na imaere eke, ijoko ereye bae na maengge ijoku honoi ranne ijokune honoye, walobo na u bulura eukuke. (Ro Mbai Anggaei Kokum Onomi Ikeunge) ³¹ Yesus Tirus yone nekaikokemo, Sidon yo bu kelara moi hayewate Galilea bukoba kelaeunga yo Dekapolis kanina. ³² Belene, ro mbai anggaei kokum, romiyae yawainyehoke Yesus bokore mekate riyainyele, Yesus bele ro na uranne me rannehinde onomi rewendere. ³³ Yesus bele ro yaweungehoke romiyae helem hebate anuwauka elaere ekete. Yesus na me bele ro na anggaei bulure nekeunge eke, belera eugwaki houboke bele ro re faeunge karaungehike. ³⁴ Yesus Nabe yaku bumare beufoke. no yoboubokemo eleye, "Ninae Raweibo!". ³⁵ Na belehe, bele ro na anggaei raweuboke, na faeunga eha nenaei kulauboke, onomi rouke, anggaei foi borowoye, a nason mekai elewoye borowate. ³⁶ Yesus ijoko eraiboke yore ahum kolowoumi, rake ro onomi ikeunge romiyae ehire ehuweyeijae. Bele yaere romiyae ahire-ahire huwaimiyeke. ³⁷ Borowate yo fa yae boubate, elate, "Yesus nemene fomene foi sele mokowoye. Anggaei kokum yo anggaei borate, namekai a mum nekewate yo a elate borande. "