Pasal 4
Afaeu Umekai Hekelo Ra
1
Yesus bukou enene kelewoumi. Romiyae arileweke helem bolem sele, belene Yesus kayi mbai eite yeuketeke anggem nuweuboke. Romiyae helem arilewoye yaba buhaeinye hebaikoke.
2
Yesus ako faeuko helem sele kelewoumi, ahuba arumbo-arumbo yae namekai ako faeuko kelewoumi. Naei ako faeukone rake yae weumi,
3
”Meyae borombo! Ro mbai hekelo, eke hekene ohaka yae heraiboye.
4
Meka yae yeuboke, ohaka heraeiboye he, ehi nibi enene balayeke, aye mekate bele ohaka anayeke.
5
Ehi kani ruka yalene balayeke. Bele ohaka hasale hele ketekate, beleyaere nakani wau-wau bam, melem bam.
6
Hu keteke, ronsan-sam uke naukoke, ohaka reu habaiboke, kala-kala yaeiboke.
7
Ohaka ehi, isa yaele erum yaele nolone balayeke, Erum ohaka reu ketewatere awaimikoke, ani emokoi hangga.
8
Ehi kani foi-melem foi ne balayeke, ketekate kabam baeyeke, ani mokayeke rorele mbai me bee yaele, rorele u name yaele, ehi rorele u mehaembai yaele, ani helem sele farune-farune mokowate.
9
Belera, Yesus weumi, “Hinye anggaei jaele kaye, neyae borombonde."
10
Yesus nembai nekewoye he, romiyae arilewoye yoyaele na mota ohowate yoyaele mekate a faeu arumboye-arumbo ne mekate hinewanyele.
11
Yesus weumi, "Yo hena-yam hena maei nemene nayakala yae mare weubamale, beleyaere romiyae arilewoyere a afeu arumbo-arumbo yae weubaemale.
12
Mekanebam, romiyae helem erenate beleyae eitaeiboi nekenate, ijoko yae erende, eyitaeiboi konate, na wanem anggaei jae boronate, eboroiboi mekai nekenate, mekanebam, na u ebeijae namekai na nebam mokojate onomi eyeyeijae nekenayende."
(Ohaka Hekelo Re Afaew Umekai)
13
Betamo Yesus bele yore weumile, “Mekane meyae eyitaeibomo rakhe afaeu wamale?” Mehaemekai rake a arumbo-arumbo eyitaeiboi kaube?
14
Hekelo ako faeuko yae huweumi.
15
Romiyae, ohaka nibi enene homofae huweijate mekai mbai. Beleyaere anggaei borojate hee, bulo walobo meye ako faeuko huweijaimile nemene bele romiyae boratera na kena eita yaroikiyoye.
16
Namekai, ohaka ehi ruka yaele kanine herayeweke, bele romiyae ako faeuko borajate nakena rei mai saee nekeijate.
17
Bele yaere, na kena ei kambu ekeluweiboi nekejate, u wabei mehi-mehi hubayeikiyoye hee na hila rabo ako faeuko borowoyere elaebam, nahibi ruweye.
18
Ohaka ehi isa yaele erum yaele bele nolone balayeke. Bele romiyae ako faekho re borayeke yo
19
U wabei rake kani kelana, ru kangge arilendere mae-mae namekai u wabei mehi-mehi na kena einye nekainyele meyae bae, ako faeuko borokere meye mokonge bele ani emokoyei nekejeye.
20
Kani foinye balayeke, bele yo ako faeuko borayeke, na kena einye hawayeke, ani mokayeke, rorele u bee mehine bee yaele namekai rorele name yaele, nawanem rorele u mehaembai jaele. "
(I Hehene Afaeu Aruneuboke)
21
Yesus a weumi, ”Nahele bam i kajeu romiyae yum-yumake kelene eraisi hangga? I kajeu naeisele ayakala ne mo kolonate?
22
Hambum mbai numne ohoi hangga, naimekai mbai, hambum yakala hanggonde maei, yakala mo benayende.
23
Bele mekainye, ”Hinye anggaei yaela kaye borombonde, anggaei boronde!”
24
Yesus yae weumi, ”Anggaei foi jae borombe. "Mekaha yae romiyae ehire kolaumile, bele mekai mbai mai une kolonayembe, ehi-ehi mai une betamo baranembe-hayenembe.
25
Makane bam, hinye hambum helem nekenende na, benem yennele, bele yaere hinye hambum bam nekejeye, mekaha yae na mena-u na keluweye enaiyaronde. "
(O Haka Ne Afaeu Aruneuboke)
26
Beta mo Yesus weumi, ”Allahre yo-hena yansena hekelo ohka kanine herayeye mekai ja.
27
Hekelo reniyai ijokune hononde, rene annunde, benem huwae yembonde, bele hekena molowoye ani ha ketenate kabam benate, bele hekelo nataeibam mehaemekai jae anire mokowate.
28
Bele kani nenaei ani mokowaate, kombo mahu, beta mo kui mokonde, belera ani mokojate.
29
Nabe ani eha ani benate na, hekelo ramiyaeli rowonde ani eha maluwembonde.
(Hiyo Haka Ne Afaeu Aruneuboke)
30
Beta mo Yesus yae a weumi, ”Maka afaeu mekai jae eyae Allahre yo-yam hena kolomanggonde bam?” Makha afaeu mekaijae a habemabondemo kolomanggonde bam?
31
Allahre yohena-yansena, hiyo haka kanine herayejande bele mekai, ijoko erande rake kanina-kelana ohaka yae bannele am.
32
Beleyaere, kanine heranyaibonde na, bele hiyohaka kending sele ra keteye o kabam re yembonde, bele ani eha nolone kabam bende akau mokonde, aye bumana koijate bum-bum menate bele alimne hebenate, nale mokonate."
33
Bele afaeu mekaijae Yesus Allahre ako faeuko romiyae ehire huweumiyeke borayeke.
34
Romiyae ehire rake a arumbo-arumbo yae huweumiyeke, bele yaere namota ohowate yore Naei a na yakala yae kelewoumi.
(Yesus Alu Yoyo Ukeunge Kalauboke)
35
Bele ya mo, huwae rai yeuboke, Yesus namota ohowate yo re weumi, ”Mebu eyae bukou refire fomalere.”
36
Bele romiyae helem arilewoye nabe nukaimiboke, namota ohowate yo nahibi Yesus hebeunguke kayira hawaibokate, khayi ehi yaele nembainye bukou refire foubate.
37
Alu yoyo kabam hele raweuboke, na kayi alu habewoye hime-hama beuboye, omboi jae maemae houkoke.
38
Yesus kayi monye yumake raufike ijokune honowoye. Mekate Yesusre yenggainyele a wanyele, ” "Kulu, mekane Weyae maei nou ehei, eyae nebam emabendere?"
39
Beta, Yesus anguke oku neke alu raweyere weunge, ”Hileibo! Bu kalainyebo!” Alu kalaungeboke, bukala-kala hele yeuboke yauboboye.
40
Betamo Yesus weumi, ”Mekane buhae hele hokombokembe?” Maei hika rabo Rare u hele nekaube?
41
Fe hele na u koubate, ehire-ehire hinainyele, ”Hinye maenim Rake Ro? Alu yoyo, bu Nare borokanyele!”.
Waloboyae Angeboke Rore, Yesus Onomi Ikeunge