¹ Yesus Onomi Ikeunge Oro Nimainyokoke Ro Re Ya mehae-mehae hangga mo, na belehemo Yesus beufoke Kapernaumre eke. A yobowonge elate Neyae imae na nekeye. ² Bele yae, romiyae helem hele arilewoye nawanem bele ije ikai bam yeuboke, ma u ene na bele wanem Neyaa nahibi homofae yolo-yolo na a yae romiyaere kelewoumile. ³ Beleyae, neyae nahibi mo meubate Naei bokore, ro keli kaeiboke na ijokure honoye ramne. ⁴ Romiyae helem arilewoyene, Yesus bokore ei hangga hubawainyele, bele yaere na imae, Yesus hebewoye anuwau yamkelaiboke. Yam kelaikokemo rake ro oro nimanyekoke nokainyele oye. ⁵ Nabele ya mo Yesus erewoye bele ro riya naei robo halei, elea hele, bele ro orora nimainyekokere weunge, "Weyae Raei fa, waei niki kanau ninae kuyeukokawale fanyeu bokawale. ⁶ Beleyae, ahuba na itaijaele yo elaene nuwaikoke nahibi ubene nakena ra haibate elate, ⁷ Mekane bake ro bele a wanem eleye? Neyae a weweyae koubainyele! Hinye na hinggim maei nebam (niki kanau) kuinyengkombe, naei sele Allah nembai? ⁸ Yesus Naei Roh nakena eita nahibi itayeuboke makena einya nekate yae ubenere meyae beaube. Neyae a weumi, "Mekane meyae ma u bene bele wanem nekayembe. ⁹ Mbele kiyae naei foma-foma, waeinyae bele ro orora nimainyekoke kiyae, wa niki kanau kuyeukokawale benem weunge, 'Anyu, wa ijokhu honoi kaeibo aloinyokho.' ¹⁰ Meyae itayembombe, Reyae Allah re ra mekale, one henggo yaele Kiyae bake kanire mekale, romiyae niki kanau yaele kuyeremmile fanyeremmilere mekale. “Yesus bele oro nimainyekoke ro re weunge, ¹¹ Reyae ware wawale, "Ainyu, wa ijoku honoi rewei waei imaere eye." ¹² Oro ra nimaineokoke ro nahibi anguke, naei ijoku honoi rouke, nahibhi moite ekuke, ro miyae helem bere. Neyae naneme fa yae bate Allah re buma kolaiyele, elate, “Meyae rake hambum eme wanem ereiboimo nekandeke!” (Lewi Yesusre Hakoungoboke) ¹³ Yesus benem eke bu haei te, romiyae helem bolem hokoumeke meubate Naei bokore, Yesus ahuba huwoumile. ¹⁴ Bele Neyae fouboye, Naei ijoko Lewi erekeunge, Alfeus na kelu, roi te arilate anuwaunge nekewoye. Beleyae, Yesus weunge, "Rare hakotobo, “Nahibhi, Lewi aunguke Nare hakoungobhoke. ¹⁵ Belera mo, Yesus nuweuboke hamam ne anewate Lewi re imae ne, roi te arilate yo yaele niki kanau yo yale, hamam anewate nembainye Yesus na mota ohowate yo yaele, rikena ro miyaea nekai hele Yesus re hekowainyele. ¹⁶ Na belehe ahuba re itaijaele riya mbai Farisi holombai nae i ijoko erewate Yesus hamam anate niki kanau yaele yo na wanem roi arilate yo, neyae hinaimile Yesus na mota ohowate yore, “Mekane Neyae roite riyaimile yo yaele namekai ro miyae niki kanau yaele yo hamam nembainye anate?” ¹⁷ Belehera Yesus borowoumi, Neyae nare weumi, ”Ro miyae foite nekate yo dokterre ebaei, beleyae ehare bulo re kate yoyae baeumi. Reyae mekale na u himalainyeboke yore bam, beleyae niki kanau yaele yo bokore mekale." (Hamam Emaenei Nekenate Bele Ahubayae Hinate) ¹⁸ Yohanes na mota ohowate yo yaele Farisi romiyae hamam emaenei nekewate. Romiyae mehae-mehae hangga mekate Yesus hinanyele, “Mekane Yohanes na mota ohate yo yaele Farisi ro miyae na mota ohowate yo yaele hamam emaenei nekate, beleyae Wambele ohaube yo hamam anate nekate?" ¹⁹ Beleyae, Yesus yae weumi, "Bele ro na hokholo uyau yaele hamam emaenei nekenate bele ijene, bele ro nambele nembainye nekenate?" Bake ro nambele nembainye nekenaifonde he, bele he neyae ro miyae eme reweye mekai inyekate. ²⁰ Bele yae mensembonde, bele ro na unolo u kaikaita rowende, bele heeya neyae hamam emaenei nekenate. ²¹ Na mekai mbai, malo male kayeukoke hakam re, malo nemeyae neufaeke mo hakham ukae, mekanebam, bele malo neme hakham ukae bele yae malo male kayende, kabam hele bende. ²² Bele wanem mbai romiyae anggur bu bale-bale hokou malene rilembonde. Na bele wanem mbai anggur bu yae bele hokou ninaei kayenggonde na wanem anggur bu yaele bele hokou yaele nabene-bene kanyete nebam sabam benete. Weyae beungehonde, anggur bu nabale-bale hokou nemene aubonde raufinde. (Yesus Naei Sele Tuhan Hambaya Ya Nabumana) ²³ Ya mbai hambaya ya, Yesus gandum heke ele eitte ewoye, nahibi na mota ohowate yo yaele eubate, gandum haka ani namene hokayeke eubate. ²⁴ Farisi ro miyae Nare wainyele, "Ereyae, mekane neyae bele u mekai mokate, hambaya ya ahuwe aralem rasikate honoye moi wokate?" ²⁵ Yesus weumi, "Meyea homofae kowaube, ei itaiyeiboi meea yae Daud moloukoke beleya neyae mokowoye romiyae kalo moloumiboke moni-mai koubatene. ²⁶ Mehae mekai Allah re imaere eruleufike bele he Abyatar elaeiboke imam kabam wanem, bele hili ha-akauha feu anewate naei sele imam yae mo anenate bele feu roukate romiyae nanemene ikaimile anewate?" ²⁷ Benem, Farisi romiyae re Yesus weumi, "Hambaya ya mokaiboke ro miyae maei, namekai romiyae Hambaya maei bam. ²⁸ Belene, Allah Raei Kelu Neyae Tuhan, Hambaya ya nabumana hele.