(Yesus Waleuboke) ¹ Sabat ya nekaikoke baeufoke hee yae, Maria Magdalena yae, Maria, Yakobus nenake yae Salome yae minyak foro kembomo roi jae yaraikoke, Yesus na no re hobenainyekondere eubate. ² Na rene kaeukaeu, ya we-we moloweke, bele ya ikai, bele miyae riya bule rande alainyekoke meubate. ³ Bele miyae riya naete-naete elate, "Hinye yae bele ruka kabam bule mau ke erunaiboke olennekondebam?" ⁴ Bele yaere na ijoko bumare erate bae nabe ruka kabam bule mau ke ebunainyeboke olaeinyekoke. ⁵ Bule ete arulaiboke, ijoko erate bae, hokolo fa mbai malo keleumom wili halamam hireukoke meube refine nuweuboke, bele ro erainyelene bumara ohaikoke. ⁶ Bele ro, miyae riya mekatere a weumi, "Buhae ohokoijae, Reyae rataei Yesus Nazaret yona ro ohaline habaeukoke yae meyae baeimiyaungele. Neyae oloo, herekera aunguke!" Erembo, rake na ure nekainyele anuwau niyae! ⁷ Rake hee embe, namota ohowate yo yaele, Petrusre a wemmile, Yesus are ukembe wanem bae. Neyae Galilea kanine bere holo yae ende, belene mambele embe hubayenggombe. " ⁸ Rake miyae riya na u onyeu isinewatene, bule rannda hakaikoke eubate, fe waku koubatene ehire a ewei hangga hebaelayeke. Bele hokolo fa a faeu weuboumi, nemene Petrusre namekai namota ohowate yore weubaimile. Bele ramo Yesus Nenaeijae ro eleukoke, ukeumi ralira waita, Allah Naei ako faeuko hena bona romiyaere kelenaimiyende. (Yesus Namota Ohowate Yore Na U Yakalaumiboke) ⁹ Bele ikai mbai na rene kaeukaeu hele, Yesus waleu boke ya, nabeme hele Maria Magdalenare u yakalaunge boke, na u bulura ra Yesus walobo mehine bee hukeumihike aibaleke kaye. ¹⁰ Betamo eke namota ohowate yo ibo-inse koubatene meke Na u yakalaumiboke. ¹¹ Anggaei borowate, Yesus waleuboke namekai Maria Magdalena yae ijoko erekeunge huwaimikoke yaere, namota ohowate yo nehale eleikoi. ¹² Betamo namota ohowate ro bee yo ehire eubote, Yesus na u mehi mekai jae yakalaumiboke. ¹³ Hokolo bee bukeiboke Yerusalem yore mekete, namota ohowate ehi yore huwaimile horo, ehi yae nehale eleikoi nekewate. (Yesus Namota Ohawate Yore Huweumi) ¹⁴ Yesus na u Nenaeijae namota ohowate yore yakalaumiboke, na riyane nuwaikoke hamam ne anewate yae, Yesus meke ahum nekeumi, na kena elae nekewatene. Romiyae Yesus waleuboke a elewatere eboroimo koubatene. ¹⁵ Belera Yesus a weumi, "Eme, rake kani kabam kela kabamre, Raei a foi faeu foi romiyaere huwemmiyembe. ¹⁶ Hinye Rare hila rabo halendelena, bu konainyebonde, Allah na wali hole molonnebonde. Hinye Rare hila bam rabo bam ennekendena, Allah yae nare ehe bukulu ennehayende. ¹⁷ Hila yaele rabo yaele yo ha eme mokonate rake niyae : Walobore Ra, afaeu eme elenate. ¹⁸ Na meyae rami kelungate, bu nebam u re mokonaimile horo nasom anenate, romiyae bulone felane konate horo, me na u ranne kolomile, onomi yaronate. (Yesus Yo Bumare Euboye) ¹⁹ Yesus bele a weumikoke baeufoke mo, raneukike yo buma yam buma Naekore imae obere euboye, Naekore meube refine eunguweuboke. ²⁰ Namota ohowate yo ekate Naei akofaeuko mbelene-mbelene huwaimiyeke, Tuhan Yesus nambele hakoumiyeke namekai ha eme mokoyeke, bele rannda romiyae na hila rabo elae hubawainyele.