Yesus Pilatus re bene ¹ Na rene kaeu-kaeu hele Imam-Imam falem a mokainyehake yoyo-kote yo, Tauratre itayaeiboke yo namekai Sanhedrin riya nemene Yesusre ha kilainyekoke yawainyehoke Pilatus bere eubate. ² Pilatus yae Yesusre hineunge, "Weyae Yahudi maei Ondofolo kabam?" Yesus yae weunge, "Na hele, wenaeijae eleukokae. " ³ Betamo Imam falem-falem Yesusre eheere hayenainyelere a mehi-mehi yae hinainyele. ⁴ Pilatus benem Yesusre hineunge, "Weyae wo re koukondere ahiyae eleyae?" Boroyae, waei a helem sele ware arunayete. ⁵ Bele a elate mbai sambai Yesus okokoi mone, Pilatus fa yae bouboye. (Yesusre Barabasre) ⁶ Paskah roko yae-roko yae kayekene kawana isebate yo, ro mbai riyesiyate hangga Pilatus hayeukiyeunge. ⁷ Ro mbai naro Barabas, kawa einye hebeweke, ro howekene kilaiboke hebeweke. ⁸ Romiyae helem Pilatusre riyewainyele, yayana mokoijate mekai nare mokommibondere. ⁹ Pilatus ehe koumikoke romiyaere weumi, "Mai kena kaube mai Yahudi maei Ondofolore hatenggondere? ¹⁰ Pilatus itayaeuboke, imam falem-falem kenahensem kobate aerene Yesus kilaiboke. ¹¹ Beleyaere imam-imam falem romiyae helemre moi hurewaimile Barabas yae Pilatus hayennekondere. ¹² Pilatus yae benem weumi, "Mai kena re kaube mekaha yae Yahudi maei Ondofolore mokorombondere? ¹³ Nanemene abulaube kaenate, "Ohaline habenggo!" ¹⁴ Pilatus yae hineumi, "Mekane? Meka nebam yae Yesus mokoubokene?" Kela nahibi mo kaenate, "Ohaline habenggo." ¹⁵ Romiyae helem kena foite mokommibonderene Pilatus Barabas yae hayengekoke, Yesusre cambuk yae habaeikoke ikeumi ohaline habaeikoke. (Yesus Aukaka Yae Koubainyele Haube Habewate) ¹⁶ Felayo Yesusre yawainyehoke, obere eubate felayo nemene arilaimiheke. ¹⁷ Ondofolo maei malo mekaijae hirainyekoke, fonom isa yaele haikokate mo Yesus re hirainyekoke. ¹⁸ Ro melaeyainyele wainyele, "Wa u yaele, Yahudi maei Ondofolo!" ¹⁹ Na falem ra roko yae-roko yae bohe yae habewainyele, kihesele yae houbainyele, oro heleyae maitoroke be isinanyele, buma kolainyele. Yesus Ohaline Habei Ko Ke ²⁰ Yesusre aukaka kainyele, na malo ukaeinyekoke, yawainyehoke, na malo yae hirainyekoke eubate ohaline habenai kondere. ²¹ Simon Kirene na, Alexander Rufure neakho, yo mbai ta me whele ukai nye ohali khau go ke. ²² Betamo Yesus yawainyehoke Golgota re eubate naei ro hele "Tengkorak Anuwau" ²³ Anggur bu mur yaele alaeinyeboke ikainyele annensinde na una buhae kouboye habanaibonde maei, bele yeare Neyae erewei aneisi ²⁴ Belera mo ohaline habaeikoke, felayo na malo re wahenaikondere, hinyerene ruwende, me bu koubate hinye yae na malo hubayenggonde. ²⁵ Hu joko mehine keli yeuboke mo Yesus ohaline habaeikoke ²⁶ Homo molaikoke, Yesus re arunai nyele, "Rake Yahudi Yo Maei Ondofolo." ²⁷ Yesus ohaline habeikoke, ro bee yaele, mbai meube refine mbai meli refine. ²⁸ Nehale meijeuboke homofae ne eleye mekai, "Romiyae nebam nolone yae Nare me enaeibaembombe. " ²⁹ Romiyae bele ijene ohowate yo, Yesus re aukaka helem koubainyele wainyele, "Weyae Allahre ei moloi-moloi imae kabam hele kiyae, kelaubonde na ya name mo aungunundere eleukokae kiyae niyae! ³⁰ Bele a mekai elewekae bambae wa u hole moloinyebo! Bele ohali randa oyakoibo!" ³¹ Imam-imam falem, yoyo-koteyo, Tauratre itayaeiboke yo nemene Yesusre aukaka kainyele elate, "Romiyae re mo hole moloumiyeke, waei u yaele nou heiko! ³² Wa ure Mesias Israel maei Ondofolo yae elewekae bambae mana ohalira eyakoibo eyae ijoko eremabonde nahele elemakonde namekai hila rabo halemande." Meline meubene habaeikoke yokoyo bee namekai Yesusre aukaka kaubonyele. (Yesus Hereke) ³³ Hu joko me bee orohine bee yaele, bele kani oubom haubom yeuboke, meke hu joko name yeuboke ³⁴ Hu joko name yeuboke Yesus a elae hele Naekore kaneunge, "Ataei, Ataei makane Rare nukeukebokae?" ³⁵ Ehiyo na bokona hebewate yo borowate elate, "Borombo! Eliare kaeneunge!" ³⁶ Ro mbai hebaeleuweke meke anggur manim mo fakone rileuboke holombane neke, neungerike Yesus anensindere, na a yaele eleye, "Ijoko eremam, Elia .nehale mende ohali randa rewende hanembondere!" ³⁷ Yesus ele kaeneukokera na no u yeuboke. ³⁸ Bele hee Allahre ei moloi-moloi imae kabam kiyae, einya malo kabam hilowoye reu bee kayeukoke, na bumara oke ane. ³⁹ Fela falem hebewoye Yesusre erewounge na no u yeuboke eleye, "Nehale rake ro Allahre Kelu." ⁴⁰ Miyae maengge hokowoye nolone, Maria Magdalena yae, Maria Yakobus nenake yae, Yoses nenake yae Salome yae. ⁴¹ Galilea yone nekewate hee, rake miyae riya yaele nembainye ohowate namekai Nare rikewainyele hakowainyele. Miyae maengge helem Yerusalem yore Yesus naei nembainye mekate. (Yesus Na Bulene Nekainyele) ⁴² Huwae yeuboke mo, are heteungekoke yaa, Sabat yaa ⁴³ Ro mbai naro Yusuf Arimatea, yoyo-kote nolo na, Riya Kabam na ro, rake ro Allah Na yo yam mendere rakeungeke, Pilatus bokore Yesus na no re rewendere meke. ⁴⁴ Pilatus bumara ohoukoke rake a boroke ne. Pilatus fela falem re kaeneungekoke meke hineunge, nehale Yesus hereke. ⁴⁵ Pilatus itayeuboke fela falem rera, Yesus na no Yusuf re ikeunge. ⁴⁶ Yusuf malo roijae rouke, Yesus na no ruboungeboke oke, malo yae ruleufike, kaeuboke bule homunggae enene waeuboke bele einye eke nekeunge. Ruka kabam oleungekoke bele bule mau hileukoke. ⁴⁷ Maria Magdalena yae, Maria Yoses nenake yae, Yesus na no nekeunge anuwau ijoko ninae erewainyele.