(Yesus Honaibondere Merau Kolowainye) ¹ Ya bee nekenaikondemo Yahudi maei ya kabam bee Paskah yaele feu ragi bam anenate yaele konatere. Imam falem-falem namekai Tauratre itayaeiboke yo nibi baeubate Yesus kilenaibonde namekai ame karebai jae mokowate honaibondere. ² Nenaeijae elaete, ”Ya kabam komalene emokoijae, romiyae aku yembonde honate yaele." (Yesus Nau Bu Foro Kemboyae Hobewainyele) ³ Betania yone Simonre imaene hamamre annendere, miyae mbai namene narwastu bu foro kembo yaele roke meke. Bele bu minyak nate haendeboube na roi bumana hele. Bele miyae na walamba uke raweuboke Yesus Na falem ranne rileungeboke. ⁴ Belena mekate yo na kena ikileyae katene elate, "Meka bande bele bu minyak meke heraeyeye bam? ⁵ Bele bu minyak roi nate heubobe roi 300 dinar hangga hubayeukoube. Hum bam wai bam nekejate yore bele roi waheumile. " Bele miyaere a yarewainyele. ⁶ Yesus yae weumi, "Nenaei mokou, mekane meyae nebam mokaungele? Rake miyae foijae Ra u re meke mokouke. ⁷ Meyae romiyae kere nale bam yo yaele nembainye nekejaube, mbele he mai kena enggombena, meyae emmimokombe, beleyaere Reyae mambele nembainye enekeyei. ⁸ Rake miyae na u hubawounge mekae yae nahinggi mokondebonde, Ra u re hererele maei nabere mokoukoboke. ⁹ ”Reyae nehale yae mare wamale, "Mbelene ako faeuko huwenayende, rake miyae mokouboke ha bene nekei-nekeite enaitonde enaisuwende." (Yudas Kelai Nibi Neke Mokowoye) ¹⁰ Yesus namoita ohowate yo me bee orone bee yaele nolora ro ehi naro Yudas Iskariot. Neyae imam falem-falem bokore eke. ¹¹ Bake a mekai borokatene rei mai sele koubate, a hokaikoke Yudasre roi jae inyainyelere. Belera Yudas ikainye baeuboye, mbele hee yae Yesus kinyemmibonde. (Paskah Maei Hamam) ¹² Ya bemena, ya kabam feu ragi bam, domba obo na kelu mbai Allahre ongoibae felennele meijeuboke, Yesus namota ohowate yo yae hinainyele, " Mbele anuwaunge Weyae kena koyae meyae Paskah hamam mokomansandere? " ¹³ Yesus namota ohowate ro beere weumi, "Yerusalem yore ebe, bele yone arulebobe mo, ro mbai bu habune yaele kaembonde mende, bele ro hubayenggombe, namota hakonebobe ebe. ¹⁴ Imae mbai te arulensinde, belena rorelere wennele, "Kulu yae hineye, Ra moita ohande yoyaele, mbele anuwaunge mokoungehake Paskah bulau hamam nembainye anemakondere?' ¹⁵ Bele ro mare kelenembombe, anuwau kabam imae raka benem kaye, kaeu-kaeu, hambum nemene na hului-sului mokainyehake mare kelenembombe. Bele anuwaunge aei Paskah hamam mokonehabe. ¹⁶ Namota ohowate ro bee Yerusalem yore ekete. Hokolo bee ekete, Yesus yae are ukeumi mekai beubate. Hokolo bee Paskah bulau hamam anenaikondere mo mokoinyehake. ¹⁷ Reniyai yeuboke mo, Yesus namota ohowate yo yaele mekate. ¹⁸ Nuwaikoke hamamne anewate hee Yesus yae weumi, "Reyae nehale yae mare wamale, ro mbai mai nolora, rake hee hamam nembainye anende Raei kelaite nenendere. " ¹⁹ Na kenara nebam mekai hubawainyelene, naete-naete Yesusre hinainyele, "Tuhan, reyae bam?" ²⁰ Yesus yae weumi, "Bele ro meyae ro me bee orone bee yaele mai nolona, rambele feu yaele kolaei yaele mbainye yawakonde. ²¹ Reyae Allahre bokora mekale, romiyae u re yeubokale Kiyae, homofaene molaikoke mekai Raei u ereherende. Beleyaere kelaite nenende kiyae nebam hele hubannele. Naeisele kelaite nenende ro na foi sele ehonoi nekeube. (Utaei Kristus Na U Melem Yaele Oki Yaele) ²² Hamanne anewate, Yesus feu rouke Allahre helem foi ukeunge bele feu meyae kayewoye namota ohwate yore waheumi, na a weumi, "Rake Raei u melem niyae, yarom anem!' ²³ Belera kolai anggur bu yaele rouke, Allahre helem foi ukeunge, namota ohowate yore nanemene ikeumile rake kolainya buyae anewate. ²⁴ Yesus namota ohowate yore weumi, "Rake Raei oki neyae, ro helem miyae helem aerene rileubokale. Rake oki yaere, Allah are heteungekoke nibi neme, romiyaere wali himalainyeboke yo yae me baemmile. ²⁵ Reyae nehale yae mare wamale, Reyae rake anggur bu aneisi mo nekerende, Maeko mokommibonde romiyae Raei me kelee u kelere mo arulenaibonde nekenate. Benem bele romiyae Rambele nanembainye Maekore yo-yam nemene bele anggur bu anemahinde. " ²⁶ Ataeite koibae buma rainyehike, alainyekoke Zaitun homunggaere eubate. Namota Ohowate Yo Nukainyeboke. ²⁷ Yesus weumi, "Meyae nanemene Rare nukendebombe, mekanebam, homofaene molaikoke, 'Allah na obo kayaa rore hombonde, nabe domba riyana here-ware molombonde, ' " ^{29 28} Bele yaere Reyae walerebonde hee, na bere holo yae mare Galilea kanine ererakembe. " Petrus yae Yesusre weunge, "Mehae mekai horo neyae Ware nukenayeubonde, reyae Ware enukeiboi sele!" ³⁰ Yesus yae weunge, "Reyae nehale yae ware wawale, mana reniyai ojo muku roko benem kaye a okokoimo, weyae roko name Rare itiyam bae weumikonde." ³¹ Bele yae Petrus naei kena elaeyae mo hebewoye, weunge, "Mehae mekai horo reyae Wambele nembainye aherembonde, reyae Ware itiyam bae ewei hangga!" Namota ohowate yo nemene bele a mekai mo elewate. (Yesus Getsemani Einye) ³² Anuwau mbai naro Getsemani, belene namota ohowate yo yaele aibaleke. Yesus namota ohowate yore weumi, "Rake anuwaunge nuwenggo, Reyae Maekore ebeli borensim." ³³ Yesus, Petrus yae, Yakobus yae, Yohanes yae yeweumiboke ekate, Yesus na u buhaehokoungeboke, u kulu-kulu kouboye. ³⁴ Yesusyae weumi, "Ra u hererelere mekai hubanale, meyae rakene nekem, namekai ma u kayaa hebembe. " ³⁵ Benem ahau mekai eke mo, Na u kani ranne ekuke Naekore riyeunge hakonnebondere ane riyeunge. ³⁶ Yesus yae weunge, "Ataei, Raei Maeko, meka hambumbae Weyae na hinggi bam, nebam hubarende yaelene Rare hole molotebo. Bele yaere Raei kena hului jae bam, Waei kena koye wanem bae yembonde. " ³⁷ Benem Yesus beufoke hokolo name bokore meke, ereumi bae ijokune balekate honate. Petrusre weunge, "Simon, ijokuyae honoyae! Weyae na hului bam hele hu ikai mbai kayaare hebeukondere!" ³⁸ Benem Yesus rake yore weumi, "U mekai nebam wabenensimbe balembe yaelene, ma u kayaa yaele namekai ebeli nahibi-hibi mo bonnele. Mai kena Rare hakondebombere kojaube yaere, mai u yambi hele yaeuboke." ³⁹ Benem Yesus beufoke nabe ebeli mekai mbai boungehike. ⁴⁰ Yesus beufoke meke, ijoko ereumibae jokune balekate honate, na ijoko ehekaei sele hubawanyelene, yenggeumikoke bae, onaete-handate meka a yae Yesusre ungainyele. ⁴¹ Benem Yesus roko namenem meke mo, weumi, "Jokune honaube, no yae yem! Annu! Reyae, Allahre bokora mekale, romiyaere yeubokale Kiyaere, nebam re mokate romiyaere kinyenatebondere hee yae meijeuboke. ⁴² Anuu, mebu ema, Yudas kelaite neke kiyae meke nobena." (Yesusre Kilaiboke) ⁴³ Yesus namam ane eleye mo Yudas namota ohowate ro me bee orone bee yaele kiyae meye. Namota ro homo mbai, imam falem-falem, Tauratre itayaeiboke yo namekai Yahudi falem-falem yaele yo, namene ramiyaeli yaele, o bohi-bohi yaele mo meubate. ⁴⁴ Yudas kelaite neke kiyae, a itayeumiboke weumi, "Yoi bulure hunerensinde kiyae na ro niyae, kilembombe, felayo yaele yawemibombe membe." ⁴⁵ Yudas meke Yesusre kelaeunge weunge, “Rab!" Yesusre yoibulure mo huneungekoke. ⁴⁶ Yesusre kelukate mo kilaiboke. ⁴⁷ Bele kelaeunga hebeye ro mbai na raimiyaeli mo yobouboke imam kabam na yebai-bubaei na anggaei jae uke neufake. ⁴⁸ Yesus rake yore weumi, "Meyae raimiyaelei yae, o bohi-bohi yae yaraukoke mekaube Rare kilendebombere, yokolo re kilembombere mekai mekaube? ⁴⁹ Ya-ya Allahre ei moloi-mo loi imaene mo mare kelewekamale, bele yae meyae Rare ekileiboi. Allah na yenjo kayaaro Yesaya nemene homone moloukoke mekai benate yakalanate. ⁵⁰ Belera namota ohowate yo nanemene hakaikoke hebaelayeke, Yesus nabene nembai nukainyeboke. ⁵¹ Ro hokolo fa mbai Yesusre hakoungeboke malo lenan ra mokaiboke yae na u feleuboke, rake homora eubate yo yae nare kilenaibondere, ⁵² Bele yaere na malora kilaiboke rake hokolo fa na malo nukeungeboke namelambae hakaiboke euboye. (Yesus Yahudi Falem-Falembae A Hinewainyele) ⁵³ Yerusalem yore ekate, Yesus yawainyehoke Imam kabam bere mekate. Imam falem-falem, yoyo-koteyo, Tauratre itayaeiboke yo nemene arilewoye. ⁵⁴ Petrus na ahauka mo Yesusre hakoungeboke, Imam kabam imaere yawainyehoke, imaesouke eubate. Belene kayaare hebewate yo yaele itukai kelaunge nuwaikoke ine akelewate. ⁵⁵ Imam falem-falem namekai Yahudi maei yoyo-koteyo Yesusre mere nonainyende honaibonde nibi mbai sambai ehubayeikoi mo. ⁵⁶ Romiyae helem a ame-karebai jae Yesus nebamre mokonainyebondere huwewaimile, beleyaere na ahuba mehi-mehi yae hubaimile, romiyae ehi eleye yaele eboikoi. ⁵⁷ Belera ro ehi afae anyuke mere nonayendere elate, ⁵⁸ "Meyae anggaei borokande Nenaeijae elewoye, 'Reyae rake Allahre ei moloi-moli imae romiyae me yae ainyunuke Reyae kelarebonde, imae ehi rake romiyae me yae anyui kiyae na yaa name mo na hinggi arennunde. ' ⁵⁹ Belene na a faeu elewate ehire-ehire mbainye eyeiboimo. ⁶⁰ Imam kabam romiyae helem arilewoye nolora anguke Yesusre hineunge, "Weyae wo ekoi-koi hangga rike a faeu Waei rannde mo nokayete, Weyae wore ekoikoi!" ⁶¹ Beleyaere, Yesus a mbai sambai ewei, maleu mo hebeye. Imam kabam benem hineunge, ”Weyae Mesias, Allah yae oro mau heraweuboke Neyae”? ⁶² Yesus yae weunge, "Reyae Niyae, meyae ijoko erembe, Reyae Allahre meube reufine ere nuwembonde, wau rannda erendele merele. ⁶³ Imam kabam na rammalomo kaneukoke, romiyaere weumi, "Meka yae romiyae ehi elenaikondere? ⁶⁴ Menaeijae borokaungele Allah yae na u eleukoke, Allahre rore ane hele kolounge! Nanemene fomone na bulaube elete, honaibonde hele. ⁶⁵ Ro miyae ehi Nare ekihesele yae houbainyele, malo yae Nabe felainyeboke, mefae yae, merulu yae roro wainyele, ”Allahre yendo kayaaro yae! Roibona, hinye yae ware habete? (Petrus, Yesusre Oneungeyae Eleukoke) ⁶⁶ Petrus Imam kabamre imae sounge nekeye bae, mangge mbai imam kabamre u mokoi bele nolore meke. ⁶⁷ Rake maengge Petrus ine akelewoye, ijoko ereungekoke mo weunge, "Weyae na ehi neyae yae Yesus Nazaret yona Kiyae nembainye ohowaube. " ⁶⁸ Beleyae Petrus oneunge yae weunge, "Reyea onaele-handale, meka a mekaijae rare ware. " Petrus nahibi anguke aloungekoke imaesou romauke eye bae anggaei boroye ojo a koukoke. ⁶⁹ Bele miyae benem Petrusre erewounge mo romiyae hebewatere weumi, "Bike ro ehi neyae Naei holo mbainye ohowate. " ⁷⁰ Beleyae, benem Petrus oneunge yae eleukoke. Na hekibam mo belena romiyae hebewate yo Petrusre erewainye, wainyele, "Weyae na ro ehi niyae yae, mekanebam, weyae Galileana ro." ⁷¹ Bele mekai wainyelene, Petrus olomo rorowoye a na ikele u yae eleye, "Reyae rike ro eleyaube, onaenale yae!" ⁷² ”Petrus bele a mekai eleukoke heera ojo roko beenem a koukoke, Petrus u bene nekeungehike, meka yae Yesus ukeunge, "Nanemam ojo roko benem okokoijae, weyae Rare roko name oneukekonde yae weimile. Petrus bene nekeungehike, eke helene eke rimewoye.