(Allah Na Yo Imae Ralo Imae Horombonde) ¹ Yesus Allah re yo imae ralo imae ra meukukemo “Namota ohowate ro mbai jae weunge, "Kulu, ereyae rike imae na ruka foi sele namekai na imae hawu hele anyunuke hebeye!" ² Yesus yae weunge, "Rike imae kabam-kabam mokanyehake hebate ereyae? Nanemene kerenaisonde ruka ehi ran ehi ranne arunggoi hononate. " (Bulofela Relennekonde) ³ Zaitun homunggaene ike nuweuboke Na ijoko Allahre yo imae ralo imae re beufoke ereye mo, Petrus yae, Yakobusyae, Yohanesyae, Anderias yae, Yesusre nenaeimo hinainyele, ⁴ ”Mare a yakalaimebona, are eleukokae nanemene mbele hee enaibende? Bele bendere meka igwau yae rilende?" ⁵ Yesus yea weumi “Kayaa hebembe, romiyae ehi yo ame-karebaijae wabenayenggombe yaele. ⁶ Romiya helem menate ame-karebaijae elenate, 'Reyae Wali Ondofolo, Allahyae ukeuke mekale.' Bele yo helem sele, ame-karebaijae wabenaimile. ⁷ Buloo fela kulum relennele, namekai a yo-yo buloo bulo fela kaenainyebonde maei emborombe yane, buhae ohokoijae. Bele wanem nemene inyaibonde hele, ⁸ Na nemene benate yakalanate, isam-fela yohi yaele, rake kani-kelaa kabam yo-yam fela ehi yo yaele relenainyele, onyeu kabam ahine-ahine, moni-mau mende nende hebende, bele nemene miyae fare honende wanem relennele. ⁹ Beleya ma kena u kayaa hebembe, Raei aerene mare kilenayembe, haubae sinagoge-sinagogene habenayembe, yobonayembe Sanhedrin bere embe na mekai beyu-beyebae bere embe. ¹⁰ Nawanem huba mokoi ya emeijae Raei a foi-faeu foi romiyae nemene hungaimile hele. ¹¹ Mare yaungayembe namekai kilenayembe hee, buhae ehokoijae meka yae weya eleukonde, beleyaere nason a eleukonde, Allahre Roh yae ware e bene yakalanembe mekaijae a eweleukonde. Bele a eleye waei a bam, Allahre Roh waei u walora eleye. ¹² Raei aerene romiyae mare helem ikele konayembe. Ro mbai na aka baekere enaisombonde maei kelai nenende, bele mekai mbai naekoyae na kelure. ¹³ Raei ro aerene mare u mekai nebam yae kelenayembe. Beleyae hinye Raei einye mo nekendena huba ennemokonde neyae onomi endowende. (Hambum Nebam Mokomibonde Himi Hama Bemale) ¹⁴ Yo keijo eremmile na anuwau bam ne hebenatena, homo faere eraube yo ubene rowembe Yudea na romiyae hakaembe homunggaere embe emfaembombe. ¹⁵ Romiyae yam bumana nekaube yo, are oyoijae namekai eite eyaruleijae, hambum emaena rouke. ¹⁶ Hekena eka mokoyae, benem imaere ebeijae, ra rammalo rouke ba. ¹⁷ Bele ya mensembonde, miyae emale miyae namekai wayeu miyae, na u nebam hele hobunainyele. ¹⁸ Ebeli kali bombe rake yaa mekai ralo him-mandilim hee yae ebeijae. ¹⁹ Bele yaa mensembonde, hambum nebam hele benate, Allah rake kani-kelane mokoubokera meke rake hee eyeiboimo rake wali ne, namekai benem eyeiboi mo hononende. ²⁰ Allah yae eleukoke holona holere molommibondere aerene nebam hubanainyehinde ya fofo mokonebonde. Bele mekai emokoiboi mo ehi yae wali erewei. ²¹ Romiyae ehiyae mare ungayembe, 'Ereibo, Kristus rakene nare hebeye!' namekai 'Ereibo, Kristus rikene nare hebeye!' Bele a ungayembena nehale yae eleijae. ²² Bele hee mende, ne hake bam wali ondofolo namekai ne hale bam yenjo-kayaaro yaele yakalanaibonde, ha eme mokonate beleyaere nehale bam. ²³ Maei u kayaa hebembe! Reyae mare namemambae nemene mare weubamale mo. ²⁴ Bele ya mensembonde, Allahre homofaene rake mekaijae moloukke, "Hu hehe wende oubom yembonde, oko na hehe kebenggonde, ²⁵ Bumana ralo yono-yoni yakura balenate onate, yakuna elae-wake Allah yae kusemmikonde, ' Yesus Naei Mende Ya ²⁶ Bele ra romiyae erenaiyele Reyae Allahre Kelu wau randa mende Na one henggo yaele ketennebonde mende. ²⁷ Naa wanem mende hee, malaikat-malaikat wemmile Allah Naei eleukoke yo nanemene arilemmile, ebum refira, robom refira, ralira, waita nemene arilemmile. ²⁸ Ara no ra mo itayembombe : Akaunga fae rimi-rimi baete, hi ketate mo, na fae reu yakalate mo elande ronsam bondere. ²⁹ Reu eme yakalate, fae nime balate, meyae itayembombe yakama mendere rosansam wende nine nobeungeboke. ³⁰ Reyae nehaleyae mare wamale, rake hokolo ehereiboijae, rake hambum benate yakalana. ³¹ Rake kani kela nebam embende, beleyaere Raei ako faeuko hena bona honenende. U Kayaa Hebemayende ³² Naei mende ya, ro mbai miyae mbai nateibam, namekai surgana nekate malaikat nateibam, Na Kelu nateibam, Ako nembai sele nataei nekeye. ³³ Kayaa hebembe, meyae itiyam Naei mende ya. ³⁴ Rake yaa bende yakalande, ro mbai kolo endere mekai. Na imae nukeibiyoye eye, ro ehire kayaa hebende, kaliya mokonate maei, namekai ro mau na kayaa yaele mo hebende. ³⁵ Belene mare wamale, kayaa nahibi-hibi mo hebembe, meyae mataeibam mbele na imae rorele mende, huwae raijae mende, riniyai nolo yae mende, ojo konate yae mende, nare kaukau hele mende. ³⁶ Nasom ba mende bae aere eremmile ijoku ne honande. ³⁷ Belene mare wamale : ”Kayaa” kayaamo hebembe ukamale, meyae nanemene wamale : 'Kayaa hebem!"