YESUS ADALAH IMAM BESAR PERJANJIAN YANG BARU ¹ Eyea elande a yoni yoni na no rake niyea reyea narangne. Moloukokale waneng Imam kabang yeale nekande. Neyea nene weawea yeale Allah Surgana ekenekeye kiyeare kendang wamerang meube reufine nuweuboke ekeneye. ² Nawaneng neyea Surgana ei mom mom imea nahele kiyeane Imam Kabangde Tuhan Allah neneaijea aungunuke. ³ Allahre ani eha yeale oboyoku yeale hili eha akau ehare onggou felemmile neaite, Imam Kabang yoni yoni raneijate. Pele earene Yesus onggou felembonde neai hambung rowende hele. ⁴ Rake kanikelane Yesus nekeube yea Imamde eyeiboi sului, haubihinebang tauratre walora wali heere foloukoke hului hili eha akau eha onggou felei felei Imam holona - holona yo ninea ranaimiyeke nekewate. ⁵ Pele Imam mokowate ei mom - mom imea Surgana ekasonate ei mom mom imea nabune wainye hamainyekoke. Pele neaite Musa ei mom mom imea anenunde hee Allah nabere rake waneng mea Musare ukeunge, ware homonggeane keleubo kawale imea bune wane hameungekonde heubonde hele. ⁶ Yesus rake kani kelane Imamde omokoi, peleyeare Surgana mokoyene neai Imamde mokoye neai emeikai jeale bena Imam holona yo mokowatera Allah are heteungekoke nibi neme romiye wali himalainyeboke yo yea me beayeumi arande Yesus Imamde mokoye-pele nibi a eleakei hele heteungekoke ranne,Musare walora wali heere foloukoke yea ehamekoi hului. ⁷ Musare walora wali heere foloukoke nibi mbai naisong kalo omoloiboinya roko beneng do re nibi nemere a eheteikoi hului. ⁸ Peleyeare Yahudi romiyea na uw mekai kalora hubayeukokene neai yendo kayalo Yeremiare walora Allah rake a elea yea eleukoke,ya mbai mensembonde Israel yoho yeale Yehuda yoho yeale, nibi neme romiyeare wali himalainyeboke yo yea me beammile are heteungekoke. ⁹ Neabu neai neako neai Mesir kanira yaweumiboke maibaleke meibate heena Musare walora wali heere foluokoke nibire a hetewamale waneng bang haubihine bang pele a heteungekokale huluinye pele yo enekei nawaneng reyea moi buleumibokale. ¹⁰ Bena ya mendene, reyea rake wali himalainyeboke yo yea me bearemile nibi Israel romiyea re a heteremikonde Pele yo neai uw bene wa bene einye reainya a wali heere foloukokale are haukemile, nawaneng na kena uw einye pele a eremolonggonde, reyea neai Allahre itebonde, pele yo reai romiyea re inyaibonde. ¹¹ Tuhande ronainyebonde neai a uw teai wateai ro miyea mbai nambele yaya wali nibi mbainye ohate yore nawaneng naaka beakere ekelei haubihine bang, pele romiyea kabang kabang,fele fele nanemene Rare ronaitebondene. ¹² Pele romiyea neai uw mekai nebang mokatere Reyea fanyeremile nawaneng na nebang sabang yoni yoni beneng Reai uw bene ne enekei. ¹³ Pele mekai jea nanemene mokainyehakera, nayane beai Imam holona yo na kalia mokoiboite pele imea bene reufine yowa eyeibo meyeibo kate.