NASIHAT-NASIHAT UNTUK ORANG PERCAYA ¹ Allahre hila rabo haleannele,mem eyea aka ha beake ha na foi sele yea hole molomande. ² Uw bene ne foi nekemmele,eyea romiyea ro eroiboi yore ei hawemamiyende hele haubihine bang, pele me uw waneng eyea na malaikat-malaikatre ne are eyea nei ehuweiboijea hole molommile. ³ Kawa einye aheamikoke nekeijate hebeijate romiyeare embe eremmile pele yo ekaihebate,weai uwne pongele,weyea eka hebeyea waneng nawaneng,eiwe taisi,kulubo yea molaimi nekeijate romiyeare,mai uw yea embe parammile,haubihine bang,pele weai uw ne poungele,pele me uw waneng ware yea mokayete. ⁴ Ro yeale miyea yeale uw mbainye yeibokoite,wali kena uw,foi kaya hebenete,na uw baite buhea kabang heneyende,haubihine bang,Allah bele romiyea uw nebang waneng mokate,yoko kaimea romiyeare me nommiyonde. ⁵ Roi ninggi roboni rela re kena okoijea,nawaneng weai walire wa roibuna yea balenetera,belera nahinggire wali nahinggire hubaungele,belere Allah neneai a heteungekoke,Reyea ware uw mbai wa mbai te enukeiboi hului. ⁶ Pelene eyea aholo re nahinggi elemale huwemale,Tuhan neyea reai wali hole ro.Ehire ehare reyea hinyere fearende? ⁷ Weai be yun beyebea Allahre a uwteai kelewayete,bene nekeimile foi mokoimile nawali nekayeke mokayekere,belera hakoubonde wameli mekai haraungle. ⁸ Wenea ya,mana ya nawaneng ya huba mokoikoi yane,Yesus Kristus na mbai,mehire eyeiboi. ⁹ Meyea eyereiboi,eyeiteaiboi,wali mekai mehi mehi pelene meyea ehakoijea hele pele wali foi neaite,Allah neai anugerah yea eare elea haweume nawaneng hamang meai mekai mehi mehi yaromale ammalere,pelene eyea wali erowei hului. ¹⁰ Allah neai ei mom mom kang yolo yolo,wakung danne eai yung baimihake namekai pele yung dan ne,bele kaliare mokate ei mom mom kang yolo yolo ne neyea pele yung dan ne eambele hambare ekoihului. ¹¹ Musara walora wali here foloukoke a huluinye,ralo yakama mbai roko mbai Imam Kabang mea obo yoku mbai hili eha akau ehare onggou wea feleibiyate romiyea uw mekai nebang fanyenabondere,bele obo yoku okiy yea hili eha aka eha yea Allahre yolo yolo hele yowa eite rowete eye.Pelera obo yoku uw banggare mo yomoinye iy yea beikiyate. ¹² Pele mekai mbai neai okiy rileuboke yea mokommibonde romiyea Allahre ei haunganyele neaite Yesus yo moinye haiboke,yahudi eha hena huluinye Allahre onggoke felembondere obo yoku folate nibi yea bang. ¹³ Pele earene mem eyea yo moite emabalende waneng Musare walora wali hee re foloukoke a huluinye hakoimiyannere nukemambom,Yesus a uwkea uwkea koibainye waneng nanembainye eambele a uwkea uwkea enaimekonde. ¹⁴ Haubihine bang,rake kani kelane eyea nahibi mo nekemande yo yang bang peleyeare Allah maokungehake yo foi yang foi menjembonde kayerong mbea eyea beaimeyande. ¹⁵ Pelene Allahre ei molonainyele neaite,yahudi romiyea obo yoku onggo wea felewainye,Yesusre walora Allahre onggouke felemande waneng mea romiyea neai bene eai eubara bele yea Allahre ro bumane kolomande. ¹⁶ Me uw foi mokoite,namekai yei wahei wali eisako meisako neaite mai uw bene wabenera nundenenggombe yeale.Pele me uw mokande yea,eai obo yoku yea onggouke felemande waneng,Allahre kena foite mokomande. ¹⁷ Mai be yun be yebea neai a borommiyembe,uwngayembe ijene mokombe,haubihine bang pele romiyea mare kaya hebayembe neaiteAllahre bene wo enaikongkonde hele.Na kalia mokonate neaite uwngayembe huluinye mokombe,haubihine bang bele kalia kena nebang yea mokonatena ,mare foite omokoiboi hului. ¹⁸ Meai jeale ebeli bonnembe,meai kena uw na yolo yolo yea hubamande na mekai me uw nemene mokandere bere hineijaime wali mekaite nekemalere kena kabang kande. ¹⁹ Reai uw mbai neaite mari riyamale,reyea hasale maibokore bukensihinde erele neaite Allahre ebeli bonnele. ²⁰ Eai Tuhan Yesus neai okiy rileuboke yea mo,Allah are heteungekoke hubabang heaibang wali himalainyeboke yo ye me beaijeume nibi neme elea mokouboke.Neai okiy rileuboke,Allah Yesusre nuluyo maheyora aungunuke namekai jemaat yoni yoni neai be yun be yebeare ranaitike.Reyea Allah reimaite yeumi kiyeare ebeli banale. ²¹ Neai kena koyere mokonnele neaite,foi jeale meli mekai wanengde ketenembonbe.Neai mekai reyea ebeli banale,Yesus wali Ondofolore walora Allah kenare koye waneng eai kena uw einye mokommekonde wali Ondofolo mbaitemo,huba bang heai bang hili hebenainyele.Amin. ²² Aka neai beake neai,rake homo koko hele bang peleyeare reyea riyamale,kena nahebeam sebeam mea a uwteai wateai wamale huluinye ei annembombe. ²³ Maiteai nekembe,eai aka beake Timotius kawane hebewoyere hayainyekoke naheki bang mo reai bokore mendena,reyea beneng hubaimakondere Timotius yaufensonde nanembaita mai bokore ale. ²⁴ Meai a meleayayembe,pelena mai be yun beyebea holona yeale Yesus neai eleuboke wekeumi holona yo yealere wemmile,namekai eai aka beake Italia kanina yo mare a meleayayembe. ²⁵ Reyea ebeli banale Allah kena buhea eare bang mea mare nemene henembe.