MENELADANI YESUS ¹ Allah neai are elewoyere hila rabo halewainye romiyea heleng yanaimikoke ijoko isa eraime earene, mem oro halumde hayeyeume hambung yeale uw mekai nebang mokoimiyeyande yeale eai uw ne eaimefoke hambung nanemene rubomambon, wanggo kate romiyea no bang hee bang hebealate waneng mea eyea kena heraumale, wali ondofolo aweume huluinye-mokomabon. ² Eai ijoko Yesus re yea eremande. Neai bune wane hamemande. Neyea Allah neai a elewoyere hila rabo halemande nekemande neaite kelewoume, namekai nahibi hibi kelemale-neyea neateai Allah bokore reimaijea nekenendere kena herauboke yea ohaline paikoke, ferekoikoi here waneng. Ohaline paikoke uw buhea hubawoungeyea, rilibo bang mea hereke, pelere Allahre kendang wamerang meube reufine ekenekeye. ³ Mai hila rabo elea bang yembonde yeale,namekai kena uw wau wau enjembonde yeale,Yesusre mai uw bene ne nekenayembe, nebang mokowate yo yea neare me nebang uw nebang mokowainyele. Peleyeare kena heraweubokene, Allah weibounge ane hakouboke. ⁴ Uw mekai nebang eaifoyembene relewaunge kulungne roko mbai okiy erileiboi. ⁵ Allahre homofea eai kena rowemmehinde a meyea Allah neai kelu omi yea ukembere uw benera nundenenggombe yeale kelu neai omi neai, mai be elea uw elea huluinye,Tuhan mai walire hiyei ranenembombe me uw mokonenggobere Haubihine bang eleijea namekai neyea a uteai wateai elea uwngembene kena nebang okoijea. ⁶ Haubihine bang,Tuhan buheare heyeumi romiyeare wali hiyei ranemmibonde me uw yea mokoyeumi nawaneng kelu omi yea me beaijeye romiyeare ako nake waneng ehe bukulu eijewoumi. ⁷ Nebang hubannelena, Allah mai walire hiyeibe ranembe yea erennele Allah neai kelu omi wanengne mare mokombe. Kelu omi nemene nawalire ako yea hiyeiraneijaimi. ⁸ Romiyea namene na be elea uw elea huluinye nawali hiyei ranenaimibonde me uw re hubainye.Allah bele uw mekai wamekai waneng mare omokoinya meyea neai kelu omi bang,peleyeare kaifa fa yea nekaube. ⁹ Bararembonde neai rake kani kelane ako eai walire hiyei raneijaime horo, eyea ei hawammine,emeikai yeale ako Allah eai kena uwre heleye kiyea neai weume are hakomale hele. Bele wali mekai nekemalena wali hena bona uw mekai hubamande. ¹⁰ Mom na heki bang eai kani kelana ako na kena foi jea hubainye eaiwalire hiyei meiraneikoyaime, eyea nahului neai waneng uw mekai wa mekai yolo yolo yea emanekende neaite.Allah afoi neaite eai walire hiyei mei raneikoyoume. ¹¹ Romiyea ehi eai wali waneng hiyei ranenaimelene kena foite ehubaisi kena uwne buhea komale eimoko waime, peleyeare mom yeale emarowende eyea walire hiyei ranaimeboke romiyeare wali himalainyeboke yo yea erenaimele nawaneng reimai komale. ¹² Pele earene,orore hebealate yo nahibi hibi oro hebealatene oro iy me iy elea yarate waneng mea ralennembe. ¹³ Mainolona orore rebeate romiyea oro nebang hele inyaibonde yeale peleyeare onomo yaronatere,mai oro nibi ehiyea ranembo.Wali Ondofolo wembe a huluinye nekembe,pele namekai mai jemaat nolona hila rabo yambi romiyea Wali Ondofolore wali nibine enaleisiy ebalei,peleyeare elea yeale benatere,mai walire Wali Ondofolo wembe a huluinye jea hiyei ranembo. ¹⁴ Romiyea nanemene mambele reimai jea nekembere,namekai uw mekai yolo yolo re uw haranembe neaite,elea relennembe.Pele uw mekai bang romiyea Tuhande ijoko eyebeboi hului. ¹⁵ Maite neiate uw kau yeale hebembe mai nolona rake me uw keli yembonde yeale,mbai kayere,romiyea Allah kena buhea eare bang mea hembe neaite ehubaikoi,bee nendo romiyea mabai mai uw nolo uw ikainye kena uw ikele yeale yea romiyea helengde mokommibonde aku hombe namekai Allahre ei ehawei nekenate. ¹⁶ Name nendo romiyea ehi yoko kaimea konate keli nendo nehahina nekewoye ro Esau Allahre ei ehawei kiyea wali waneng nekembe yeale.Neyea kelu bena kiyea yea rowende foi yoni yoni hamang hote mbai earene neai uw bakere kinyeungeboke. ¹⁷ Meyea maitea,neako herendere koiboye heene,Esau kena koukoke pele hambung yoni yoni neakorera rowendere meke hee,nahului bang mea ukeunge.Nanebang mokoubokere foi mokoi boite rime yea a yea koiboye hirewoye horo,neako uw bene mehire eyeiboi,pele hambung eyei. ¹⁸ Meyea huba raweuboke Allah romiyea wali himalainyeiboko yo yea me beaijeumi nibi neme huluinye nekewaube hee.Israel romiyeare Allah yea Musare walora wali heere foloukokere yemmile elure meyea emei pele elu iy yawi yawi beiboyere,ougeng kika beiboye,alu bondilin raiboye. ¹⁹ Me bea hayeiboi waneng a eming waku waneng hambung kulun raneuboke a mbai elea eleukokene borowate yo riy tiy riybainye beneng pele a wanengde eyeleijea. ²⁰ Haubihine bang,pele a ukeumire buhea hele hokoumibokene.Rake a mekai jea ukeumi.Rake hemunggea na obo yoku,romiyea,uw baranaibonde yo nanemene ruka yea hainyamikonde hele. ²¹ Na mekai Israel romiyea erewate yoni yoni uw nene koikoi wanengne Musa yea eleye,Reyea buhea hele hokoukebokene oro me kuluwai roukale kale. ²² Peleyeare meyea rake anuwau wanengde mekaube.Sion hemunggea,surgana Yerusalem yo,wali yeale Allahre yo yang malaikat heleng buleng hokoumeke reimai kate anuwau. ²³ Allah bena fa neai jemaana holona romiyea,neai ro surgana aimoloukoke yo bokore,Allah romiyea nemene neai walire hului kolommikonde kiyeare bokore namekai nehahina wali himalainyeboke romiyea rake hee neai uw nulure hiyei raneimiboke yo hokoumeke bokore mekaube. ²⁴ Meyea Yesus bokore mekaubere,nawaneng nawaneng na rileuboke,okiyne mekaube,Yesus Allahre ro be royoinye romiyea eare oleijeumi Allah are heteungekoke romiyeare wali himalainyeboke yo yea me beaumi nibi neme a huluinye.Nehahina Kain nauwbake Habel houboke Yesusre okiy rileuboke nafoi sele Habelra,haubihine bang Yesus okiy rileuboke yea Allahre romiyea wali himalainyeboke yo yea me beaijeumi nibi neme elea mokoumiboke,peleyeare Habel rileuboke okoy yea mokoumiboke romiyea Kainde honaibondere. ²⁵ Bene foijea nekenayembe Allah mare are wembe kiyeare moi eibuleijea haubihine bang Allah rake kani kelane are weiboumi kiyeare mo buleainyeboke romiyea me nommiyokene,emeikai yeale eare Allah surgara weume kiyeare a oboroyei moi jea belemande yo re me nommeyonde. ²⁶ Allah rake kani kelane are eleukoke hee,euwbana a yea rake kani kela kuseungekoke.Peleyeare Allahre homo feane rake hee neaite,neyea a heteungekoke,beneng roko mbai rake kani kelamo kusenggonde bang peleyeare surga yeale. ²⁷ Roko mbai a mekai haraungeboke,nuleuboke na elea bang yoni yoni nanemene wenende,ekuseikoi kiyea yea hononende. ²⁸ Eyea hubamande neaite Allah yea ekuseikoi emaheikoi yo neme yang nemere mokoungehakene,mem,Allahre helengfoi uwmanende nemekai jea ei moloumande. ²⁹ Haubihine bang,eai Allah iy feau feau yeale nekeye nebang yoni yonire feanyeye.