IMAN ¹ Makayea eyea hila rabore elande? Rake niyea, eyea kena elea hubanne hambung hila rabo haleanne hului enaibende hele,nawaneng rake hee yea eyea ereiboi hambung nahele honate. ² Pele hila rabo waneng ne, nehahina nekewate romiyea re, Allah ro yeale ro yea me beamiboke. ³ Allah a elewoyere hila rabo haleanne walora eyea eateai rake kani kela Allah a eleukoke yea yeaboke, namekai hambung nanemene erande yoni-yoni ereiboi hambungda mokouboke. ⁴ Nehahina nekewate romiyea neai hila rabore eremabondere Allah neai a elewoyere hila rabo halewounge walora Habel hili eha akau eha na foi sele kayero yea Allahre kinyeungeboke. Naka beake Kain mea kinyeungebokera, pele earene Allah yea Habel neai hili eha akau eha neaite huwoye heene, nare wali himaloungeboke romiyea mebeaibounge. Habel hereke horoyea re, a nammang eleye haubihine bang Allah neai are eleyere hila rabo halemande nibira nammang keleyeimeyeume ne. ⁵ Henokh Allah neai a elewoyere hila rabo halewounge walora, Allah yea neare rouke here neyea ehubasiy. Pelene romiyea ehiyo beaibainye, peleyeare neare ehubaikoi, haubihine bang Allah yea nare keaubokene nammang ekeaiboi jea Allah Henokh re rake a eleukoke, nawali reai kena foite mokouke. ⁶ Allah neai a eleyere hila rabo ehaleinye, romiyea ehiyea hayea Allahre kena foite omokoiboi hului. Haubihine bang romiyea hinye Allah yeale mbainye nekenete kiyea rake neaite hila rabo halende hele, Allah nekeye nawaneng romiyea neare beaijainye holo nare foi emmiyende. ⁷ Nuh Allah neai elewoyere hila rabo halewounge walora ijoko yea ereiboi hambung Allahyea keleungebokene ei haweunge. Neai imea einye romiyea holere molommibondere, Nuh kaiy kabang hele mokouboke mokoungehake-neyea Allah neai a elewoyere hila rabo halewounge walora Allah nare wali himaloungeboke royea me beauboke. ⁸ Abraham Allah neai a elewoyere hila rabo halewounge walora Allah a ukeungere hakouboke. Allah kaneungekoke nekewoye yora enduwende, Abraham nawaneng orona menare Allah yea yennele kanire endere, meahea mekai horo ende anuwau na iteai bang, neyea kulungde mo uke eiboye. ⁹ Allah neai a elewoyere hila rabo halewounge walora, Allah are heteungekoke kani kelane kolo ro waneng mea Abraham ekenekewoye. Neyea neai orona mena Ishakre Yakubre fale heuboke nekewate. ¹⁰ Haubihine bang Allah yea merauke raungehike, rukara earure hembonde kusei mahei bang yo yan de Abraham rakewoye. ¹¹ Allah neai are elewoyere hila rabo halewounge walora, meahea mekai horo Abraham rorele yeuboke, nawaneng Sara kiho mbea, fa honoke haubihine bang Abraham nahele yea eleukoke Allah are heteungekoke kiyea nahului mokombonde. ¹² Pele earene rorelene kelu omi nuleiboite nahului bang elewate yea peleyeare ro mbaita yoho kabang hereayeuboke. Naheleng yakuna findelau heleng nen, buheainya ifau heleng nen me re ebeakoi hului. ¹³ Allah neai a elewoyere hila rabo halewounge yea pele romiyea nanemene Allah are heteungekoke hambung yoni yonire eyaroikoi jea heraiboke. Peleyeare neai hila rabo huluinye erewaimi, ahauka ei haubaimi pele yo wo koibate ele moinye kolo ro miyea yea rake kani kelane mekainyekate. ¹⁴ Pele mekai a feauke elate romiyea keleaimi yo yang kani kela neainya hele mare neaimeyate. ¹⁵ Yo yang kani kela nekewate nukaiboke uw benere enekei, haubihine bang mom heleng sele bammbea na yo yang nukaibokera beaibouke ate. ¹⁶ Peleyeare pele romiyea kena heahea hele yo yang mbai neai foi sele kiyea , surgana yo foi tang foi niyea. Neai elewoye are hakowainyene pele romiyea neai Allahyea enainyeronde neaite fe okoi rake holonare Allah yo foi yang foi mbai makoungehake. ¹⁷ Allah neai elewoye hila rabo halewounge walora Allah uwmali hubaungehike hee ne, Abraham kena uw re mokoungehake neai kelu Ishakre obo yoku waneng yea Allahre onggouke felennebonde Allah yea Abrahamde a heteungekoke neai orona mena yea heleng benayende, peleyeare Abraham rilibo bang mea kelu mbai kende kinyenembonde. ¹⁸ Pelene Allahyea Abraham a ukeunge, rake Ishakrena weyea nahului are heteukokawale oronamena yo kabang yang kabang eufoleufinde. ¹⁹ Abraham uw bene nekeinye Allah elea wake yeale kiyea nahului herewate romiyea amminunde. Nahale Abraham mea herewate yo neai uw nolo ow ikaita waneng Ishakre beneng rouke. ²⁰ Allah neai elewoye hilarabo halewounge walora, Ishak Allahre riyeungehike Yakubre Esaure nawali eneinyekende heene foi yoni yoni yea ei hawemmiyende. ²¹ Allah neai elewoye hilarabo halewounge walora Yakub herendere nobeungekoke hee yea Allahre riyeungehike Yusufre keluwa beere foi heleng ei hawemmiyende, nawaneng a fea aunguke o me hukungne barauboke,Allahre ei molowounge. ²² Allah neai a elewoyere hila rabo halewounge walora, Yusuf nawali huba mokoikoiya nobeungekoke yea, Israel romiyea Mesir kanira enaibalende neai iteayeumiboke namekai Yusuf na bo roungayende neai uw iteai ukeumi. ²³ Allah neai a elewoyere hila rabo halewainye walora,Musa honggatera na heki oko name einye nenakere nunne herawaiboke nekeukoke. Haubihine bang pele fa king foi hamai foi erewainyene nawaneng hokolo bee Mesir kanina Ondofolore are asasi koneikondere buhea ohokoi. ²⁴ Allah neai a elewoyere hila rabo haleunge walora Musa holeaisike kabang yeubokera, Ondofolo Firaunde meanggere fa yea ro meleayenainyelere ahi hele elewoye. ²⁵ Wali kuikui meamea hena bona bang nebang yea feleumiboke hubawainyere,ahi eleukoke peleyeare mehau bea Allah me re mokoumi holona yo yeale nanembainye nebang nambele hubawainyele. ²⁶ Musa hubawounge neai foi sele Allahyea are heteungekoke wali Ondofolore weitaisi kaitele,Mesir kanina eba he kinyaitelera, haubuhine bang Musa bena yana roibu enneyende rabo elea halewoungene. ²⁷ Allah neai are elewoyere hilarabo halewounge walora, Ondofolo ikele isang kondere buhea hokoiboi bang Mesir kanira Musa kulung uke eiboye na kena heraweweke Allah uwounge are hakowounge. Haubihine bang nakena uwne Allah ijoko yea ereiboi kiyeare erewoungene. ²⁸ Allah neai elewoyere hila rabo halewounge walora Musa Paskah ya kabang mbai naisong me nuleuboke, here malaikat mende hee,Israel neai bena kelu fa fare honggonde yealene, Musa Isarel romiyeare ukeumi domba folonate na okiy neai imea romau buma reufine hobenate. ²⁹ Allah neai a elewoyere hila rabo halewainye walora Israel romiyea kolsum bu wewe moloukoke kani randa alainyekoke nahului faimeauboke fokate, buyea eumifeleubokene heraiboke. ³⁰ Allah neai hila rabo halewainye walora Israel romiyea Yerikho yo re yanewaine,puka hembeali naiboke ya mehine bee yeale yanainyekokera kereufoke oke. ³¹ Allah neai a elewoyere,hila rabo halewounge walora-uw naite heweke meangge na ro Rahab na yona Allah uw woumi are oboroiboi romiyea ehi yeale nanembainye ohoikoi, haubihine bang,Israel neai ijoko ijoko Yerikho yore mekayerewate yo re ei foi sele aimibokene. ³² Reyea nahului a nahibi hibi huwerele, peleyeare reyea mom bang mea hubanale, Gidion, Barak, Simon, Yefta, Daud, Samuel namekai Allahre yenjo kayayo pele yo neai uhaba yea reyea nammam ehuweikoi. ³³ Allah neai elewoyere hila rabo halewainyelere walor, pele romiyea rake me uw mokowate, neyea yo kabang yang kabang faiseraweukoke me uw na ijene mo mokowaimi, Allah yea are heteungekokere, yaraikoke hubainye, Singa euwba muluwaimi. ³⁴ Iy naume elea habaimiboke, ramiyeali feauka hole moloumiboke, neai uw malemyambira elea yeale yeaboke, kani ehi yeale bulo fela relewainye hee ne eleayeale yeaiboke nawaneng be rabuleumi boke na yokeijo na fela yore here weare molaimiboke. ³⁵ Nake miyea yoni yoni neai aka beake buheare heibami yo heraibokera waleumibokene beneng maisubayekoke. Bena yane amminundera wali neai foi sele kayeero re enaiyaronde, romiyea ehi Allahre oneainye a yea elenaikondene hainyainyekondere ahi elewate. ³⁶ Pele romiyea ehere a kabang bea aukaka koibaimi, ehawuwea olewaimi, okiy yea wo koibaimira kawane ahewaimi. ³⁷ Pele romiyea ehi ruka yea hekelewaimine, heraiboke gergaji yea folowate fo bee re. Ramiyeali yea kunyewate herewate. Ehiyo hung wai bang domba yeale, kambing yeale wa yea malore hiraiboke, uw mekai nebang hubawainye,wei taisi koibaimi. ³⁸ Allahre ro be roinye rake kani kelane wali nebang nibine ohate romiyea nayeisi reaiboi ana yeale pele romiyeara. Neyea a kala kalane yeale mokone yoinye yeale yanewate, namekai ruka bulune yeale kani bulune yeale nekewate. ³⁹ Pele romiyea Allah neai a elewoyere hilarabo halewainyene neai neaite a foi elewoye horo ye, hi yea hayea Allah are heteungekoke hambung orowei. ⁴⁰ Pele holona yeale eambele neai walire aloinainyehande neaite, eai neai wali haraiboite hambung yoni yoni na foi sele Allah merau raungehike (Wali nibi, iman kabang, hambung ehi yeale)