PENGORBANAN YESUS KRISTUS SEKALI UNTUK SELAMA-LAMANYA ¹ Musare walora wali hee re foloukoke a yea Allah are heteungekoke nibi neme romiyeare wali himalainyeboke yo yea me beajeumi are nana waneng yea kelewoumi,pele nibi neme hele bang, uw nulu na mokounge hambung keleumi waneng-pele earene Musare walora wali heere foloukoke huluinye romiyea Allahre eite molonainyelere mate yo nahului bang sele,obo yoku na ralo yakamane beai Imam walora Allahre onggouke felenayende walora nea wali himalonai bonde. ² Nahului yea,beneng romiyea rokoyea rokoyea obo yoku yea onggouke efelei haubihine bang Allahre eite molowainye romiyea nanebang sabang roko mbai fanyeumikokera beneng nanebang sabang mokowatene kena uw ne nebang ehubaikoi. ³ Peleyeare obo yoku na ralone yakamane beai onggou feleyate yea mokowoumi romiyea na uw mekai nebang uw benere nammang iteajeyeumi. ⁴ Haubihine bang,sapi mukuu yeale kambing yeale neai okiy yea romiyea neai nebang mokowatere fanyeiboite nahului bang sele. ⁵ Pele earene Yesus wali Ondofolo rake kani kelare meke hee Ondofolo kabang Daud yea moloukoke waneng Yesus yea, Allahre weungu:"Allah, ware obo yoku yeale ani eha yeale onggouke feleaimekete nawaneng hili eha akau eha iybayete weyea kenare okoi Peleyeare hili eha aka eha waneng reai uw weyea mokoungehakea kinyerebonde neaite kena koyea." ⁶ Romiyeaneai nebang mokowate fanyeiboite neaite obo yoku yea ware onggou feleikoyate nawaneng hili eha akau eha iybayete, weai kena foite omokoi. ⁷ Pelera reyea elale, "Allah ereitebo,reai uw weai homo feane molaikoke huluinye, reyea weai kenare koyea huluinye mokorele neaite mekale. ⁸ Narangne moloukoke a hului Wali Ondofolo yea Allahre eleukoke romiyea neai nebang mokowatere fanyeiboi neaite ware obo yoku onggou bea feleikoyatere nawaneng weai kena foite omokoiboi (meahea waneng horoyea Musare walora wali heere foloukokera oele me uw mokonate hele). ⁹ Pelere Yesus eleukoke, ereitebo, weai kena koyea hului mokorele neaite meibale. Pelene bena Allah yea Musare walora wali heere foloukoke horouboke, pelera wali nibe neme yea aiboke. ¹⁰ Yesus wali Ondofolo Allah kenare koiboye huluinye neai uw kinyeuboke hereke. Pele me uw roko mbaimo mokouboke walora eyea neai eleyere hila rabo haleanne romiyea Allah me beammeyende neai kena foite mokomande yo mbea nekande. ¹¹ Yahudi agama neai imam yoni yoni nayane beai neai kalia mokoijate rokoyea rokoyea obo yoku yea Allahre onggouke feleyainye, peleyeare nebang mokowatere mbai sambai eifanyeiboi hului. ¹² Peleyeare Yesus wali Ondofolo romiyea neai nebang mokowate earene roko mbai obo yoku onggouke felewate wanengde, neai uw yea Allahre kinyeungeboke ra Allahre meube reufine ekewekeye. ¹³ Peleheera Yesus Wali ondofolo na yokeijo yoni-yoni Allah mokommibonde neai oro kelee mee keleene menai yorumbonde ya mbea rakeimiyale. ¹⁴ Haubihine ban, roko mbainya uw kinyeuboke, Allah huba bang heai bang wali Ondofolo neai a eleyere hilarabo heleainye romiyeare Allah uw mekai waneng nekate yo yea me beammiyende. ¹⁵ Namekai pele neai Allahre hoo feane Allahre na Roh yea eare iteayeumeboke rake mekai jea eleukoke. ¹⁶ Bena ya mendene reyea rake a heteremikonde bena ya mendene reainya wali heere foloukokale romiyea neai kena uw einye haukemile namekai neai uwbene wabene einye eremolonggonde. ¹⁷ Pelera baraungeboke eleukoke, ne nebang na bune bune mokowatere,reai uw benera endenundengkonde. ¹⁸ Pele nebang yoni yonire fanyeubokamale beneng pele neaite obo yoku yea onggouke efelei. ¹⁹ Pelena aka neai beake neai, yahudi neai Allahre ei mom mom imeane yowa heere naisake malo kabang waneng, Yesusre uw yeuboke neai okiy rileuboke yea pele malo wekeunge. ²⁰ Namekai wali yeale nibi neme yeuboke Yesusre walora eare weaumehike Allahre bokore yolo yolo hele anuwauke nahului be rabulemabonde emambonde. ²¹ Namekai Allahre imea ei obe eite, Yesus eai Imam Kabang mbea me uw eke mokoye. ²² Pele earene mem,rake uw mekai waneng yea Allah yeale mbainye nekemale nahele Allahre neaite kena kande yea, wali Ondofolo neai a eleyere nahele hila rabo haleannele yea. Eai kena uw yolo yolo yeale nekemale rake nibi yea eai kena uw yolo yolo mokomande. Eai nebang mokowande fanyembondere nibi mbai mokombonde neaite Yesus na okiy yea rileuboke nahele elandene nulu kemmebonde Nahele nulu kemmebondere kelemamile neaite bu konaimebonde. ²³ Mem rabo elea halemande Wali Ondofolo neai a eleyere hilarabo haleanye romiyeare Allah yea Wali himalainyeboke yo yea me beami haubihine bang are nulengngeboke huluinye mokomale. ²⁴ Nawaneng mem uw nou hemakom, maka nibi yea ehiyea ehire moi hurennele kena buhea uw buhea hemammile, nawaneng uw mekai foi yoni-yoni yea mokomale. ²⁵ Eai uw nolo uw ikainya ehiyo yea beaiboke Allahre ei mom-mom imeara moi buleaiboke nekeijate uw mekai waneng enekeijea Peleyeare eyea nahibi hibimo homo mbai ambanye ohomande.Haubihine bang eyea eateai Tuhan mende ya nobeungekoke ne. ²⁶ Eyea iteayeandeboke Wali Ondofolo eai nebang mokowandere fanyeumebondere nibi mbai mokombonde neaite hereke, nawaneng Allahyea neai a eleyere hila rabo haleainye romiyea wali himalainyeboke yo yea me beammile, peleyeare mehau bea na hibi hibi uw mekai nebang mokomalena, pele nebang mokomale fanyeiboi neai hili eha akau eha ehi u. ²⁷ Pele wali mekai nekandena, buhea yea hokommele rakemale Allah me nommeyondera neai yokeijo bele italo naumene hukelenaimekonde. ²⁸ Romiyea mbai Musare walora wali heere foloukokere asasi koikiyeyena romiyea be name yea ijoko hiloiboyainyene kena buhea bang mea hoibiyate. ²⁹ Allahre kelu oroyea hayeaikoke romiyea, nebang emeikai jeale mokowate Yesus na okiy rileubokene, Allah yea pele romiyeare neai me uw waneng nekate yo yea me beaumiboke, neai a heteungekoke huluinye, peleyeare pele romiyea Yesus okiy re haubihi bang mea me beate, namekai pele romiyea Allahre Roh nare kena buhea eare bang mea heiboumi kiyeare me uw foi neaite a nebang huiboumi pele uw mekai waneng romiyeare Allah ehee bukulu na ne nebang helee yun rang keambeai ranne emmihayende. ³⁰ Eyea eateai Allah rake are eleukoke kiyea, reyea romiyea na me uw huluinye ehe bukulu eremibensonde kiyea, mokorebonde hele, nawaneng neyea eleukoke, Tuhan neai holona romiyea neai wali hului emmikolonde. ³¹ Uw nene hele wali yeale Allah ehe bukulu hainyemile enainyehubande. ³² Uw bene nekayenggo, na bere mai nolone hehe neakoke waneng meyea Wali Ondofolo na afoi feaufoite boraukoke. Pele heene meye nebang hubawaunge horo, wali Ondofolo eleye a huluinye na hibi nekewaube. ³³ Roko hi romiyea hosoro neai bene mai neaite a nebang huwaime nawaneng weitasi koijayembe, roko ehi romiyea ehi mai nebang hubawaunge waneng mbai hubawainye yore hakowaumi nambele ohowaube. ³⁴ Kawane ekaisebate yo yea kena nebang hubainye waneng mbai meyea hubawaunge, nawaneng mai hambung yoni yoni yo ehi yarowate maikena reimaijea nekewaube, haubihine bang meyea maiteai wali Ondofolore einye foi jeale huba bang heai bang hononende hambung pele mai neai honayembene. ³⁵ Pele earene meyea na hibi hii rabo elea halemembe Allah nuleungeboke a huluinye mokye, haubuhine bang pele wali mekai jea mai roi bu kabang yaronggombe. ³⁶ Allah kena koye huluinye mokongkombera,neai are heteungekoke foi yoni yoni enjarombe neaite-mai kenane herawenembe Wali Ondofolo wembe a huluinye mokomembe. ³⁷ Haubihine bang Allahrebhomofeane rake waneng moloukoke Allah yea eleukoke, mendere rakaunge kiyea na heki bang mende neai mende ya moite yea oyoboi. ³⁸ Peleyeare Wali himalainyeboke yo yea reyea me beale romiyea reai a elalere hila rabo halenate, pele romiyea moi ukenenai hindena, pele kiyea reai kena foite omokoiboi. ³⁹ Peleyeare eyea moite yea kemabonde Allahre pele emawahende yo bang peleyeare eyea Wali Ondofolo neai a eleyere hila rabo haleannele romiyea Wali hena bona uw mekai hubannele yo.