² Orora Nimanyekokhe Ro Re Yesus Khena Buhea Hengekoke Onomi Ikeunge (Mark.15:1, Luk.23:1-2, Yoh.18:28-32) ¹ Nebeisa Yesus khakai einye filekokhemo nefike Na yo re ewole. Erei, ndi romiyea Yesusre ro mbai norora nimanyekokhe be na ijonggu honson ranne rokanyele mate. Yesus na rabo halei erekheumine, Yesus nda ro re weunge, "Wa rabo halei leayea mo nekhei, wa bekho yoni yoni ninea faeinyeubokhawale". ³ Nebeisa, Tauratre henaibokhe yo na khena eisa elate, "Nda ro Allahre akhakaube khounge". ⁴ Nebeibe, Yesus na ubenena hayeimi Isaeyeubokhe, Weumi, "Rahene ma ubene bekho ma khena einye nekhauge?" ⁵ Makhei a kayeyea foi ungande, "Wa bekho yoni yoni fanyeukokhale", Nda mekhai ungande, "Anyu nebeisa nahibi alonyoko eye?! ⁶ Nebeibe, mayea isaeyembombe nekhembe nda khani khelane Allahle Khelu Nembai sele romiyea naei niki yoni yoni fanyeumibonde". Nebeisa Yesus nda ro orora nimanyekokhe kiyeare weunge, "Anyu, wa khewa yungmakhe keaibo, eye wa imeare!" ⁷ Nebeinye, nda ro angukhe na imeare ewole. ⁸ Nebeibe, romiyea hebewate erekhate bea fangengge yea khowate Allahre buma kholowanyele Na Kuasa romiyeare ikeumine. (Matius Pajakre Arilele Kiyea Yesusre Hakoungoboke) ⁹ Yesus nebeisa ekhemo, Erewole bea ro mbai Matius yea ikanewanyele pajakre arilele anuwaunge nuweubohke ekhe nekhele. Yesus ye weunge, "Rare hakhoisobo." Nebeinye, Matius angukhe Yesusre hakhoungobokhe. ¹⁰ Ramanne Yesus naei raibokhate anate he yea Yesus erele bea roise arilateyo, bekhore mokhateyo Yesusle homona yo bele nanembainye raibokhe anate. ¹¹ Farisi homonayo nebeima erewatene Yesusle homonayore waimi, "Rahene mai yung raman bekhore mokhate yo bele nanembainye raibokne anate?" ¹² Yesus nebei a borokhene weumi, "Onomilole bokhore erayo buloyoyea eimewate. Onomire nekhate yo yea ban. ¹³ Nebeinye eme nda a eleukokhale isaeiyembombe, "Reyea khena buhea u buheare khena hele inyalere kolonselere ban ya. Reyea mekhale romiyea foijore khaneremilere ban ya, bekho bele yore ya". ¹⁴ Yohanesle homona yo mekhate Yesusre hinainye, "Rahene meai bele Farisi homona yo bele ramang hee neande nekheikoyande, Weai homona yo nebei wanen emokhoi?" ¹⁵ Nenda mekhaijea meyea hineisise ate yo be hung mahung hebenatere nane ro kiyea naei bele mate lombe? Nebeinye ya mbai humbai nane ro neai nolora yaunganyehonde, nebeija neyea hee nenate". ¹⁶ Malo neme malo khakhane baraiboi ehaikoi huluija, rabihine ban benen nane malo khaban hele kayenggonde ya. ¹⁷ Nane merau anggur holoboi khakhane erileiboi huluija, nebei holoboi khakha khayenggonde. Anggur naei holoboi nemene rilenaibondere na foi yande. ¹⁸ Yesus nebei a ne elelemo, Allahle yo imea ralo imea yung nebei nolora ro mbai mekhe Yesusle bene be are eungeke ei molounge, na a weunge, "Reai meangge manenfafeng nare herekhe, nebeibe Mei Wa Me na uga rannne raufinde neyea walembonde". ¹⁹ Nebeinye Yesus angukhe na una homona yo bele nebei ro re hakhanyekokhe ewate. ²⁰ Miyea mbai ralo yakhama haa yea rileumekhe, nebei homora hakhoubokhe mate Yesus na ambeleara ekileubokhe, ²¹ na ubene nda ma yea hayele, "Yesus Na Maloramo ekilerembonde nahului onomi roufele." ²² Nebeibe Yesus beufokhe nebei miyeare ereunge nahibi weunge, "Wa khena eleayea omi wa hila rabo yea onomi inyete nebei hee yea nahibi onomi yeubokhe. ²³ Yesus nebei yungle imeare eweufike, wakhure bate yo, romiyea heleng sele arilewole. ²⁴ Yesus yea weumi, "Mayea nemene embale ba, nda meangge naman ehereija jonggu be honole ya". Nebeibe romiyea heleng ree yea harewainye. ²⁵ Nebei romiyea aibalekhatera, Yesus eweufike nda meangge fa na mera ekileubohke nane meangge fa nahibi angukhe. ²⁶ Nda me u Yesus mokhoubokhe nahibi lombe a bele bu bele yobowounge nebei yo ne. ²⁸ (Ro Bee Ijokho Khumba Yesus Onomi Ikeumi) ²⁷ Nebeisa alainyekokhe ewatemo, ro bee ijokho khumba na moisa hakhoikokhe na khali bele kheanete, "Maere buhea heimiko Daudle khelu". Nebei imeare eweufike nda ijokho khumba bee mekhete nebeinye Yesus yea hineumi, :Mayea bee rabo haleube nda me u mokhorobonde? Yo Tuhan". ²⁹ Yesus na ijokho ranne name kholoukokhemo elele, "Mai hila rabore haleube ma yea yeubo". ³⁰ Hokhol bee ma ijokho nahibi kheleikokhete Yesus a lea yea weumi, "Hiwa yore eweijea nda me u". ³¹ Nebeibe hokholo bee meibalekhe burelen be bote nebeinye romiyea nemene isaei bewate. ³² Ijokho khumba bee eibalekhemo benen amung be yawanyehokhe mekhe nane merau walobo yea na u bulune ayeubokhe. ³³ Yesus nebei walobore hukhengehike ekukera nda ro nahibi a elewole. Nebei romiyea arilewole fayae bowate, elate nda me u wanen Israel nolone ereiboimo ya. ³⁴ Nebeibe Farisi homona yo yea elate, "Nebei walobo naei elaeyea walobore hukheumi". ³⁵ Yesus yo ran yo randa orowole Injil khelewoumi huwe woumi na Yo Imea Ralo Imea, nane merau erana bulona yo onomi yarowate. ³⁶ Yesus romiyea heleng erewoumine khena buhea khowoumi domba na yakha ro ban wanen herayeubokhe. ³⁷ Nebeinye na una homora yore weumi, "Ohakha ani nekai mokhowolebe hokhoi hokhoi yobe oloo ya". ³⁸ Nebeinye Tuhanre riyenne ohakha na noo niyea. Khaliya yo wemmile menate.