(He Inoe Kain Syeba Mene Salomo Oba Waike Wene) ¹ At He inoe kain Syeba a'nogo nen Salomo halerek mene hesik asuk holike. At ebe o Yerusalem waike ati Salomo wene oko usak mea mene yogotenem elok usak a mea iluk wene oko usak mea mene hinok wokasike. At He inoe kain Syeba nen apuni inebe motok apigat mene ake wam unta oba kelapa al salagalek kalogo liakelik, emas, nen helep eilekan halek mene inom wolok waukwa. At ebe Salomo oba waikesik nen at a'la ebetike mene eberak wenekak isukwa. ² At Salomo nen wene oba hinok wanike mene ake pelagigilek obogat oko isike. Wene egen mene hesik an nen piligirogo elok usak. ³ At He inoe kain Syeba nen Salomo a'la kagalek eileken hasike, o ap inougi kaintek inetage werek logousak oba hano motok wutikomo, ⁴ Nen e talek oba inoe kain etage werek supuruk nasak oba eileken hasike. At nen hogo ayabu halarek mene inoabuk hulasusak oba eileken hasike, yabu helarek mene nen a'la yabu halelogousak mene nen su inogat labesusak hesik mel, it i halarek mene nen su isusak mene mel ake Inopase Etagepogot awi wurikmo okawerek hesik warogo lolesusak oba obogat eileken hasike. ⁵ Ati oba at nen inoe kain etage werek yogotike, "Wenekak ati an naua nen hat yabu haletek oba motok huko nen hala kagalek oba haletek iluk nasuk holilagi,ati re eberogoat. ⁶ Oban werekolek wenekak ati mene obogat ikenem an nala nen eberogoat iluk agilek mene an ya wagi oba neileken nen tukum hogo higi. Eberogoat mene, an noba ega mene ake hamulugat serep hogo hat hala kagalek hukoro an noba lagilek. Hat hebe huko eberogoat mene wenekak ikenem arat an nasuk holima. ⁷ Apuni nen hat hayubu halilugi mene nen hat halakagalek ati it inasuk holilik it hat hayabu halilugi mene inala hanorogo logonik. ⁸ Aiii! Ninopase Hetagepogot, Walowak hat mene! hat hoba arat ebete nen hat hebe logousak oba o At nen Israel mene inoe kain hesik hetage werek halogo hike, at Ninopase Walowak hat hebe etabi nen apuni Israel mene inebe logousak a'la agike oba yogotak werek, ati oba hat hebe Israel mene inoe kain hetage werek hagalagen ati wene higit hogo halik nen eberogoat mene hesik igilogousak.'' ⁹ Atiba nen He inoe kain Syeba a'nogo nen inoe kain etage werek Salomo 120 eka talenta emas mene,ake kelapa al sagalek mene motok apigat, ake helep eil eken halek mene inomat wogotike. Apuni hetakit nen kelapa al sagalek motok apigat mene a'nogo wogosasak motok lek mene He inoe kain Syeba nen Isarel mene hesik wogotike. ¹⁰ At Huram atitigeke mene nen at Salomo atitigeke nen emas o Ofir nen wolok waukwa nen ake e cendana ake helep eil hagarek mene wolok waukwa. ¹¹ E cendana ati inoe kain etage werek en Inopase Walowak awi wurikmo inesok hakaluk halik nen inoe kain logousak oba aua halik isukwa, ake pikon kecapi halik nen Gambus ap etai watelogousak hesik halik isukwa. Apuni Yehuda mene atinogo halarek lek mene halenem ati inyeileken hasukwa. ¹² At inoe kain etage werek Salomo nen he inoe kain syeba ati yimene timene at a'la walok akasike mene nen kino isike higit hogoat wogotike, inoe kain etage werek hesik apik hogo at at wolok lilik wogosusak oba hesik hisike. Atiba nen Hemi mene inoe kain a'nogo atitigeke mene eperak o it inaua laukwa. ¹³ At Salomo eki wam mauge omaket huli oba warogo emas 666 oba eka talenta ekimo agalaike, ¹⁴ Ati apuni emas yabu halarek mene nen wolok wagalaukwa mene inom wenatilek. Inougi kaintek inetage werek o Arab mene nen ap ukuloak o atoma mene nen emas,perak at Salomo hesik wolok wagalaukwa. ¹⁵ At inoe kain etage werek Salomo nen sin tok sike waganem kek wanarek mene emas oba 200 huli nen halike. Sin ugu omaket he 600 eka syikal emas werago mene wanusak oba werek. ¹⁶ At nen emas werago oba sin magatek mene 300 huli nen halike,sin ebe lopok 300 huli nen eka syikal emas oba halusak, obogat lapukogo halogo oma a'la "Libanon ekama husak.'' ¹⁷ At inoe kain etage werek Salomo nen ebe hurek logousak oba huko halikesik epenake wam gaja aik mene walingirogo emas inom hapelogo halike. ¹⁸ At ebe hurek logousak oba ati inesok hakaluk he ebe huap en halike, nen ineso haguguke emas mene halike. Hulauke pire halek oba inapot heatuguke halike, singa hagarek oba pire welaike, ¹⁹ Ati nen inesok hakaluk huap en aleketek halek 12 nen mene singa ineki nen auak hagarekma metek welaike, inesok hagaluk halek welaike higit higit hiluk laukwa. Ati hake hagarek eperak ati higit hogo it ake welaikarek ke atoma hagarek lek welaike. ²⁰ Atoma obogat inoe kain etage werek Salomo agei nasak oba emas mene halek welaike.ake o a'la welagarek mene oboga lapukogo, emas mene halek o'ekama Lebanon'atoma welaike. At Salomo ebe inoe kain etage werek welaike atem higit oba perak ati mene eken lek hake aike! ²¹ At inoe kain etage werek Salomo mene kapal o sogei waganem haguguke su mene karek o Tarsis apuni Huram mene inoba lauke welaike, nen wam mauge ineki henagan oba warogo kapal ati o Tarsis nen emas, perak, ganding, kera, nen sue merek wolok wagalaike. ²² At inoe kain etage werek Salomo agorok eimo wul'alak welaike nen ebe a'la kauksek welaike ati higit inougi inetage werek yiawi tiawi at inom walasak mea. ²³ Ap inougi kaintek inetage werek yiawi tiawi mene inebe obogat lapukogo at Salomo hawagalaukwa ati wene at nen higit mene ane amusu sikipogo palilaike ati hesik oba wagalaukwa. It wagalaukwa ati Ninopase Walowak nen Salomo a'la kaguksek wogotike mene wene ikenem inasuk holiagalaukwa. ²⁴ Wam mauge ebe lopok warogo it ap inougi kaintek inetage werek ati nen yimene timene, emas mene hagarek, su inogat laberek mene, halek, kelapa e oba sagalek mene,wam kuda, nen wam keledai, at Salomo hesik wolok wagalaukwa. ²⁵ At Salomo mene wam awi halek wam kuda nen Kereta a'la kalogo laikarek mene logousak oba hesik 4.000 huli oba welaike. At mene ato ap weim wam kuda oba laikarek mene nen ake kereta oba lagilik weim laikarek mene 12.000 hulioba mene hesik nebe logousak oba o sili inalikmo halogo nen o Yerusalem omakima welaukwa. ²⁶ At Salomo ebe inoe kain etage werek logolik at en ap inougi kaintek inatage werek aweama hagasek welaike, ati o Efrat ima nen pikit o apuni Filistin mene werekma, nen ati huli oba nen pikit motok o Mesir hulisanem oba welaike. ²⁷ At inoe kain etage werek Salomo mene perek motok apik welaike, helep motok apik o Yerusalem welaike. Nen at mene e cendana uguloake eka muli hano nak yago welaike. ²⁸ At Salomo hesik wam kuda o Misraim nen o apuni inauake hetakit atoma mene lakeiwaukwa. (Salomo Ebe Walaike Wene) ²⁹ Oban werekolek At Salomo nen tak Inopase Etagepogot nen wene oba warogo hikenem yogosigilaike mene at Natan halelaike mene alep en pikit awurep oba kopokogo holal palogo hisike nen wene Ahia aua o Silo mene, nen hagalasigin iluk holal palike nen at Ido ati nen eileken lakigilaike mene holal palike, hagalasigin mene lakigilaike ati. At Ido ebe re aponak hobuk hagalasigin mene lakigilaike anogo oba Yerobeam Nebat aput hesik hobuk hagalasigin mene hesik holal halogo hesike. ³⁰ At Salomo ebe inoe kain etage werek o Yerusalem eki wam mauge 40 huli oba aweama hagasek welaike. ³¹ Atiba at ebe walaikomo opalak salinabukwa oba omakima salukwa. Apuni walaganem o sili opase, Daud werekma salinabilaukwa. Atiba nen Rahabeam, aput Salomo ugulukmo inoe kain etage werek hagalaike." iluk isike.