At Inoe Kain Etage Werek Salomo Nen Yabu Halelogousak Hesik Halike Wene) ( 1 Raj 9 : 10-28 ) ¹ At Salomo nen Inopase Etagepogot awi wutik nen ap inoe kain etage werek logousak oba o wutik ikokolek eki wam mauge 20 huli oba kopokogo hagalaike. ² Atiba nen hobuk lagakogo at Salomo nen o sili lopok Huram nen ake wogotikomo at nen apuni Israel mene o sili atoma logoni o iluk yogosasike ati. ³ Atiba nen lagakogo at Salomo o Hamat-Zoba nen atoma mitlaike. ⁴ At en he' o sili Tadmor o leimo apuni lekma atoma nen o sili obogat lapukogo o Hamat atoma yimene time huguke wutike. ⁵ At en he'o sili lopok Bet-Heron abet po nen Bet Heron abel ma o sili eloke leget ninghogo wurogo hisike,nen kwe ape kwegareke temek hogo yagarogo hisike. ⁶ Ati hake eperah higit hogo at o sili Baalat nen o sili obogat at mene atoma uguluk ake yabu wilik supuruk abi yagasogo nikilogous hesik hsike. At en o sili oguluk ake kereta a, la kalogo lagilik weim laikarek mene hesik logouagaluk halogo hisike nen o sili ake ap weim mene wam kuda oba lagilik weim halarek mene inaua logousak oba halike. At Salomo nen o obogat a'la wolok wusigin iluk akasike ati o re Yerusalem, Lebenon, nen o obogat lapukogo re inoe kain etage werek aua. ⁷ Apuni Israel mene o ati welaukwa huk at he apuni etake mene o atoma welaukwa. It ati inebe re apuni het mene mel, Amori mene mel, Feris mene mel, Hewi mene mel, nen Yebus mene mel, ⁸ It mene nen tagomake o atoma welaukwa mene apuni Israel mene nen ap inukuloak ati mene inebe motok ake weagarinabilek, it ati re at Salomo nen yabu halelogousak oba hisaikomo yogotak ati at werek yi. ⁹ Anogo halusak mene at he, At Salomo nen apuni Israel mene inebe ake yabu haluke halogo hisigilek. It inebe weim mene hagalagik, ukuloak weim mene agik, ap weim mene esa ake wogosek lagalogousak mene agik, kain ukuloak kereta oba lagilik weim halelogousak mene agik nen weim mene wam kuda wolok lagalogousak hesik aukwa. ¹⁰ Ap inyeiyabu hukotek inoe kain etage werek werekma halelogousak hesik at Salomo nen apuni at mene inebe 250 huli oba halogo hisike. ¹¹ At Salomo nen Firaun alogo o at logousak oba wurogo hisasikesik, o sili Daud werekma nen wolok waike. "An nege ati ebe o ap inoe kain Daud werekma atoma logousak lek, nen uguluk at welaike oba mene re, Ninopase Etagepogot ane huli warogo wonisasike mene ati husak oba re oguluk ati re tegelek hano logousak.'' ¹² At Salomo nen Inopase Etagepogot hesik wam warogo wulikin o okawerek awi wurikmo seleponma selekma halike oba lolitike. ¹³ At Salomo nen okawerek hesik eki ebe lopok wogotilaike ati at Musa nen halilogoino iluk iske ati eperak higit hogoat, nen ake okawerek hesik ineki paioak oba ebe lopok wogosusak at, ake tugi ket mene holokogo isago nikilogolik husak at, nen ineki henagan oba wam mauge warogo isakogo nasak ati supuruk Roti serasap mene werago nasak, ineki paioak oba wesa usak ati isago nasak nen nen ineki ake isago nasak eka mene palogo o hamulugelak hogo pokhogo halukwa atiba halusak. ¹⁴ At Salomo opase Daud nen halelogousak iluk isike higit hogo halilaike. At mene wene yakulisigik yabu halarek mene hesik inebe esa ake welaukwa. At mene apuni lewi mene yabu it halarek he Ninopase Walowak hogoratik nen wesa halusak oba ap wene yogosagarek mene inyeilanem halik igilaukwa mene hesik welaukwa, nen wene yi re ineki ebelopok o Inopase Etagepogot awi wurikmo nen a'la kilik halelaukwa. At mene inebe kwe ape oba yage logousak hesik Daud nen yogotike higit hogo ap esa ake kwe ape oba jage welaukwa, Inopase Walowak hesik ayabu halarek ati. ¹⁵ It apuni Israel mene hesik nen at Salomo ane isike mene ake kolo tigilek ap wene yogosagarek mene nen it apuni Lewi mene halusak higit hogo at helelaukwa. At nen halusak iluk isike higit hogoat ake heragigilek halelaukwa ati. Ati hake yimene timene hagarek welaike atoma motok oko hukotek mene nak welaike. ¹⁶ Ake, At Salomo nen yabu Inopase Etagepogot awi arat halike. Yabu ati halugun iluk isukwasik tik mabin hisukwa oba nen pikit halik motok'ake ato higilek motok Inopase Etagepogot awi arat awurek kopokogo wutukwa. ¹⁷ Atiba lagakogo at inoe kain etage werek Salomo ebe o Ezion-Geber laike nen o Elot i laut hoko hekelekma esakoma, o Edom atoma laike. ¹⁸ At Huram nen Salomo kapal oba loagaluk lakeiwaike. At Huram agot nen wolok loagaluk kapal ati re ebe wolok lago a'la elu mene lakeiwaike. It Salomo agot ake eperak Ofir oba laukwa nen wagalogolik emas ekin 15.525 huli oba mene inoe kain etage werek Salomo oba wolok waukwa." iluk isike.