(Etu Pogot Oba Nen Piwaikomo; Etai Oba Hogoratukwa Wene) ¹ At Salomo wesa arat halikomo nen, etu pogot oba nen biwaikesik warogo oawerek hesik hisukwa mene amulok hulunghogo naasike. Ninopase Etagepogot omame huko mene Inopase Etagepogot awi wurikmo pelakeiwaike ati. ² Inopase Etagepogot awi wurikmo a'la kigilek ati re Inopase Etagepogot oane o wuriko piwaike ati nen ap wene yakulisagarek mene a'la kigilek kamosukwa. ³ Atiba apuni Israel mene inebe obogat lapukogo nen etu pogot oba nen piwaga logolik nen Inopase Etagepogot oane o wurik a'la werekma ineleken hasukwa ati, it inyecep awi yagasogo nen hogoratilogolik ineloken keangma sogomogo logolik hogorati logolik nen Ninopase Etagepogot hano. Iluk isukwasik it en etai oba hogoratukwa. "Ninopase Etagepogot ati oabut hano. atiba hanisek motok logogin.'' (Wam Warogo Isago Nikilogolik Eloken Soalogo Hisukwa Wene) ⁴ Atiba nen lagakogo, inoe kain etage werek Salomo nen apuni Israel mene inebe obogat lapukogo Inopase Etagepogot hesik wan warogo elokoma hisukwa. ⁵ At inoe kain etage werek Salomo nen wam lembu 22.000 huli oba nen wam sapi 120 huli oba nen wam kambing domba okawerek hesik hisike. At inoe kain etage werek nen apuni inebe obogat lapukogo nen Ninopase Walowak awi wurikmo eloken soalukwa. ⁶ It ap wene yagulisagarek mene nen it yabu halarek higit hogoat haluok en iluk melarik laukwa, ati heke at apuni Lewi mene pikon oba watilogolik Inopase Etagepogot hogorasuogeluk pikon watukwa. Pikon ati ebe inoe kain etage werek Daud en hai Inopase Etagepogot watilogolik Ninopase Walowak hogoratilaike. Ap wene yakulisagarek mene nen ake apuni Lewi mene nen etai watukwa ''Aii'Ninopase hetagepogot hoabut hano nen hanisek motok logogin.'' Ap wene yakulisagarek mene nen pikon Trompet mene oba apuni Lewi mene inyelokoa metek logolik ane tasukwa. Nen apuni Israel mene inebe obogat lapukogo melaukwa. ⁷ At Salomo nen Ninopase Etagepogot awi wurik oguluk tulek hulisa papak sek ma eloken tulem akit soalike. Oguluk atire at Salomo nen wam warogo etu lolitik nen inom hulirek mene liolusak iluk wam amusu lolitik, wulikin tempaga mene halek ati oba wam warogo lolesusak nen, isago mene mel amok lenek mel obogat lapukogo lolesusak husak mea. ⁸ Atoma Salomo nen apuni Israel mene obogat lapukogo ineki paiogak huli oba isago nasukwa. Salomo oba apuni inebe motok apigat en waukwa sik inom omakima notogotukwa, it ati inebe re o kwe ebokwe kegarekma Hamat en pigit i hamulugat lagarek oba o Mesir huli nen waukwa. ⁹ Ineki 8 huli oba re, it en ap inougi kaintek inetage werek atogotilogousak hesik halogo hisukwa. It nen ineki paioak huli isago nikilogolik wulikin eloken soalogo isago nasukwa. ¹⁰ Ineki 23 huli tugi paioak oba, Salomo nen it inau o lesi wurike lopok lasak iluk isike. It inala hano aike, it inala hai apik aike, ati re Ninopase Etagepogot Daud eperak hano welaike atiba, at salomo oba hanoat, nen ageinyapuri Israel mene inoba hanoat welaike. Ninopase Etagepogot Eki Pire Oba Salomo Elokoma Weinem Aike Wene) ¹¹ At Salomo nen o Ninopase Etagepogot awi nen inoe kain etage werek logousak oba arat halike. At en o ninopase Etagepogot awi nen inoe kain etage werek logousak oba haligin isike mene obogat arat wurogo hisike. ¹² Atiba nen lagakogo Ninopase Etagepogot o huako Salomo oba waikesik nen mel yogotike, "Salomo, wesa halen mene An arat nesako holi, nen oguluk yi An nokawerek hesih arat wetewerogo hagigi. ¹³ An nen ake pogot oba kwe pali halok, moso ake piwesigin lek, nen ake An nen pulue yogotenem keangma yoma weagarogo higin, nen ake ou age weak mene apuni An mene yoma hesik lakeiwesigin, ¹⁴ Nen akeapuni an mene nen An netage wanesugun, hinekawerek en hinebe sebek igik, wesa halilogolik nen An heranausak, it ake nen weak mene ake halik lek logougun halok, An o pogot oba nen nasuk holilik it weak hagata mene sagalogo legetsilik o it werekma atoma hano halogo higin. ¹⁵ Yogotak An neileken hinoba at welagi yoma nen hit wesa ikenem nasuk hologo at welagi. ¹⁶ An nen arat wetewerogo higirik nen o yi tegelek hano motok logousak hesik wusigin, atiba nen An netage atoma motok logogin. An neileken oba nen netaiken oban o atoma motok at logoigin. ¹⁷ Nen Salomo, hat hesik he yi, hat hebe hobuk he hat hopase, Daud heperak higit at logogin, hat nen An nane igin mene obogat haleloigin, nen yinogo halusak lek iluk halogo hisigi mene ati oba higit hogo haleloigin. ¹⁸ Atiba An nen hat hopase Daud neperak wene jinogo haligin iluk awok yogotigi hak hat hebe inoe kain hetage werek halogo haigin. An nen wene ake hat yogohesik, 'Daud nen tagomake mene nebe kaintek inetage werek Israel mene hagasek lougun.' ¹⁹ Atinogo mene at he hit en yinogo halusak lek iluk nane huli palogo hit wogisasigi mene ati, higit hogo hologo halik lek, nen it nen keangma mene hogoratik nen ayabu halelagep, ²⁰ Ati nen An nen keang hit wogisi mene oba nen henogo woginyabigin. Nen nawi wurik ati An nokawerek netage oba eloken arat soalogo hagigi, An nen etage lek halogo higin. Nen An nen o wurik ati it apuni welek mene inukul etage lopok en eto agalouagen iluk halogo higin. ²¹ It apuni ake inebe lopok en Ninopase Etegepogot awi wurik kwe lagalogolik it en he igilogolik egi nayuk e! Ninopase Etagepogot nen wene ake ninayuk asusak mene keang oba halik nen Ninopase Etagepogot awi wurik mo yi nenahalok en hale?' ²² Nen atiba lagakogo it apuni ake nen wene ogo igilogolik,' hagalaga yire it apuni Israel mene nen Ninopase Etagepogot, Walowak it inabu inopalak o Mesir nen wogosek wulibiwaike mene ane isike mene higit hogo halilugi lek en halomo yi. It en we keangma mene oba lagalogolik nen ake keangma mene aweama logolik ayabu halik hogorati igilugi ati. Ati oba nen, At nen yoma obogat lapukogo inayuk asusak mene halogo hike yi re it inoabut oba nen hale yi hani.''' iluk yogosasike.