(Inoe Kain Etage Pogot Abian Nen Hagatelaike Wene) ¹ Inoe etage pogot Yerobeam en o Israel atoma aweama hagasek werekolek ineki 18 tahun huli welaukwa. Abia ebe Yehuda mene inoe etage pogot ket menisukwa. ² At Abia nen o Yerusalem aweama hagasek werekolek eki 3 tahun welaike. Age etage re Mikhaya, Uriel alogo aua o sili Gibea mene. Abia nen Yerobeam eperak weim halukwa. ³ Ap esa Abia agoresa inebe 400.000 huli weim inanini weak mene hugi. Abia nen it wogosek lilik weim inom halukwa. Yerobeam agoresa ineb 800.000 huli weim inanini weak mene hugi. Yerobeam en weim abia eperak halusak oba arat halike. ⁴ Atiba at Abia ebe o Efraim ukuloake o Zemaraim punua metek logolik en mel isike, "Yerobeam nen apuni Israel mene hinebe obogat lapukogo an nane hinasuk holino! ⁵ Ninopase Etage pogot, Walowak Israel mene nen apuni Israel mene inebe logousak oba hesik arat Daud nen ageinapuri inom ane huli elue oba warogo wogosasike anogo hit he hinokot a. ⁶ Meneat he at Yerobeam, Nebat aput, Daud aput, Salomo atitigeke nen, ebe hebelagalogolik opase eperak weim halukwa. ⁷ Wene motok weak hagalaike, Yerobeam ayalak he inoabut meak nen weak halarek mene hugi welaukwa. At Rahabeam ebe elege oban nen etaukem oane lekma, at en Yerobeam eperak hanggasusak oba mea hagalaike nen apuni at mene inoabut weak motok welaukwa. ⁸ Ninopase Etage pogot logousak oba Daud aput en hagasek werek ari nen lek halogo husak hesik hit hinala ebeno. Hat mene agoromi hopolik wesugun mene inebe motok apik nen wam lembu eak emas Yerobeam en halilogo mene aroma hat en hogoratuke hegetik welagen. ⁹ Apuni Lewi mene Harun nen tagomake Ninopase Etage pogt ane yakulisagarek mene hat en lek halogo hegen, nen wene yogosigilogousak hesik hat en wetewerogo hisegen ati eperak higit he apuni welek mene keangma yoma welaikarek higit hogo halen. Nen yogotak, wene yogosigilogousak hesik hagalasusak oba apuni ake inebe lopok en wam lembu kulok ket mene nen wam domba kulok halok 7 nen wolok waga ati Ninopase Etage pogot mene hesik lek. ¹⁰ Mene re Ninopase Etage pogot Walowak nit mene, nen nit en At ebe heragugun motok lek. Ap Ninopase Etage pogot ane yogosigilougun ati re Harun aput, nen apuni Lewi mene nen ap wene yogosagarek mene At ayubu hesik leberisigilogogun. ¹¹ It en warogo lolik nen Ninopase Etage pogot hesik dupa yihake tihake oheake hemaganoke loletelogogun. Ninopase Etage pogot awi wurikmo a'la it en supuruk Roti werago e sang talekma eratigik higilogogun. It en esage oak emas oba halek atuli telek oba ke wialogo hikomotok welaukwa. Ninopase Etage pogot walowak nit mene hesik nit en ayubu halo motok logogun, hit en nak he At ebe arat heraksaluk wulipep ari. ¹² Ninopase Walowak en nit senisek motok logolik wonisek niko, ati nen it Walowak Esewerek ninomat en ninala aleken oba weim halusak hesik pikon trompet ene togo. Hit apuni Israel mene, Ninopase Etage pogot wenagasusak lek, Ninopase Walowak ninopalak hagoratarek mene ati nen, hit ake hano halogo hikasak lek!'' ¹³ Meneat he at Yerobeam agoromi lagalogolik apuni Yehuda mene inebe inapotna palukwa nen hetakit it inelokoma higit en inom yabukwa. ¹⁴ It Yehuda mene ineilekan lakhasukwa hak he, it Yerobeam agoromi nen inapotna palo inelokoma isukwa. Apuni Yehuda mene nen Ninopase etage pogot teinabin a! Iluk etage palukwa, atem oba ap Walowak Esewerek mene nen pikon trompet ane tasukwa, ¹⁵ Atiba apuni Yehuda mene nen nawem a iluk amit suk isukwa, nen ati like apuni Yehuda mene inane isukwama, Inopase Walowak en Yerobeam agoromi inomame lek aike. Yehuda mene nen Yerobeam agoromi o Israel mene inebe obogat lapukogo mawenetsasukwa. ¹⁶ At Ninopase Walowak en Yehuda mene inagoromi nen Israel inagoromi inoasua'galuk herak sasikomo apuni Israel mene hese motok sak hogo laksasukwa. ¹⁷ At Abia agoromi nen Israel mene inagoresa inebe motok liok lauk hogo apik huli, 500.000 en apuni israel mene hanotek hugi inoatukwa. ¹⁸ Atiba it apuni Israel mene inomame lek aike, nen apuni Yehuda mene inomame aike ati it Inopase Etage pogot, Walowak it inopalak ane wanilaukwa mene oba hipiri tisukwa ati nen inomame aike. ¹⁹ At Abia agoromi nen Yerobeam agoromi mugisek lagalogolik nen o sili hukotek lek hamulutek lek atoma welaukwa mene,ati ebe: o Betel, Yesana, nen Efron Yerobeam werekwe mene sebelukwa ²⁰ At Abia ebe eluk welaike atem oba Yerobeam en yinogo tinogo halusak motok mea arik omame lak aike. Ninopase Etage pogot en warogo hisikomo walaike, ²¹ Ati nen Abia ebe omame aike. At augi inebe 14 huli nen ageinapuri ap 22 huli nen ato alogomi inebe 16 huli. ²² At Abia nen halelaike mene obogat lapukogo suesika oba a'la wene yogosikerek mene Ido oba holal palogo hsike,'' iluk isukwama werek.