¹ At Rehabeam o Yerusalem arat waikesik, inebe hobuk logousak oba weim halusak elok hugi Yehuda nen tagomake mel Nen Benyamin mene wim Israel mene inom yabusak hesik inebe 180.000 huli oba atogorinapike. ² A'nogo mene at he Inopase Etagepogot ane palek at Semaya oba isike, Ninopase Walowak ageinyapuri, hesik mel ike, ³ ''At Rehabeam ari yogosin, Salomo aput, inoe kain etage werek Yehuda mene ati. Apuni israel mene o Yehuda nen Benyamin werek mene inebe obogat lapukogo hesik yosan, ati oba ⁴ Hinayalak honom weim halup nen wagilek kamoikano! hinauake lopok pugulakani, wene hagalaga yi An noba werek.''' hagalaga kolek, inoe kain etage werek Rehabeam nen ap esa amonogo Inopase Etagepogot ane hologo kamoisukwa, atiba Yerobeam inom weim halilek inauake pugulukwa. (Rahabeam Ebe Logousak Oba Yehuda Mene Oane Aike Wene) ⁵ At Rehabeam ebe o Yerusalem logolik nen o sili lopok hago logousak oba wurik laike. ⁶ At nen o Betlehem wutik, Etam wutik, Tekoa wutik, ⁷ Bet-Zur wutik, Sokho wutik, Adulam wutik, ⁸ Gat wutik, Mares wutik, Zif wutik, ⁹ Adoraim wutik, Lakhis wutik, Azeka wutik, ¹⁰ Zora wutik, Ayalon wutik, nen Hebron welaike Yehuda nen Benyamin ebe oane negen hago welaukwa. ¹¹ At Rahabeam en o sili lopok haligik hisike ati nen ap ukuloak weim mene hugi o atoma hisasike, nen ake supuruk nigilogousak oba hesik, amusu, nen anggur halogo hidsike. ¹² At nen ake sin ugu higik nen sige o sili lopok higik nen isikomo o sili lopok atoma oane welaike. Ati oba Yehuda nen Benyamin esewerek hagalaukwa. ¹³ Ap wene yogosagarek mene nen apuni Israel mene obogat inebe Rehabeam akit lapugutasukwa. ¹⁴ Apuni Lewi mene inayabuke nen eka palarek haraksaluk o Yehuda nen Yerusalem waukwa. At Yerobeam nen ageinyapuri inom en wene yogosigilogolik yabu Inopase Etagepogot hesik halelogousak lek iluk isukwa ati nen it wene yi halukwa ati. ¹⁵ O tom ukul oba warogo lelologusak hesik, ibilis nen ineki oba wam sapi eak halogo hilik hogoratik usak hesik mel at Yerobeam en yakulisigilouagaluk wete werogo hisasik. ¹⁶ Ati oba apuni Lewi mene Israel haraksaluk laukwa, Israel en tagomake mene inebe obogat lapukogo Inopase Etagepogot Walowak Israel mene oba hipirik logolik o kawerek hesik Inopase Etagepogot, Walowak it inabu inopalak hogorati laukwa mene wogosugun iluk o Yerusalem waukwa. ¹⁷ It en inebe hobuk Yehuda mene logousak hesik oane halogo higik nen pemerintah yabu Rehabeam Salomo aput eki wam mauge henagan huli warogo it inebe welaukwa Daud werek oba nen Salomo welaike eperak higit welaukwa. ¹⁸ At Rehabeam age he Yerimot alogo Mahalat itike. At Yerimot ebe re Daud aput nen Abihail, Abihail Eliab alogo, Elihab he Isai aput. ¹⁹ At he Mahalat en Rehabeam angeinapuri ap ena tagenyapike, it inebe Yeush, Semarya, nen Zaham talaukwa. ²⁰ At Rahabeam en he ake Maakha itike, Absalom alogo helekerek. Maakha nen Rehabeam ageinapuri taginapike, inebe Abia, Atai, Ziza, nen Selomit. ²¹ At Rehabeam nen hemi augi inebe abigat yabu halelaukwa mene at he! 'age Maakha aligat enak etabi welaike. Rehabeam augi inebe 18 huliba nen ayubu halarek mene inebe 60 huli oba welaukwa. At ageinapuri ap motok inebe 28 huli oba nen alogomi inebe 60 huli oba welaukwa. ²² At Rehabeam aput Abia at ayalak inebe apigat mene aligat ebe ukuloak hagalaike, atiba at a'la nen Abia ebe inoe kain etage werek halogo higin 'iluk agasike. ²³ At Rehabeam en wene higit mene halikesik nen at ageinapuri ap hugi inebe lopok o Yehuda toke nen Benyamin o sili lopok oane werek ke hugi hisasike. At Rehabeam en ageinapuri supuruk nikilogousak oba hesik hukoro halogo hisike. At en hogo it hesik hemi wogosasak oba herageinapike.' iluk isike.