(Inebe Logousak Oba Mogolaike Wene) ¹ At Rehabeam ebe o sili Sikhem laike, oba hanorogo halogo hilik inoe kain etage werek halogo huogen iluk uguluk apuni Israel mene welaikareke inebe obogat lapukogo o atoma laukwa. ² Ineki ake atiba Yerobeam, Nebat aput inoe kain etage werek Salomo oba nen hese o Mesir laikesik welaike. Atiba nen Rehabeam ebe arat inoe kain etage werek hagala isukwama at Yerobeam asuk holike, ati nen at ebe o Mesir en hobuk waike. ³ Apuni inebe miren hake nen Yerobeam watukwa, watukwama Yerobeam nen apuni Israel mene inebe obogat lapukogo Rehabeam oba hawaukwasik mel isukwa, ⁴ Hat hopase Salomo nen nit yabu haluagaluk ekin mene arat ninoba hike. Ninoba hisesikmo, yogotak nit yabu se mene halok wonisamo nen nit hat hayubu halapelougun.'' ⁵ Lani! hineki henagen oba logopik en hinapotke weganem An elok lek igik mea igik yogohigegen." Isikomo, apuni ati inau laukwa. ⁶ Atoma ap inaluetek inebe miren hake logolik at Salomo ebe eluk welaike atem oba ane amusu palenem lebetigilaukwa. Halenem inoe kain etage werek Rehabeam en kimene halusak nogo iluk apuni yi hinok wogosike. Ake nen igilogolik, "an noba kinogo nasuk waten nogo it ati hesik wene oko yogosak?" ⁷ Ap inaluetek ati nen wene ake igilogolik, "hat nen apuni hano halogo hisasak halok, it inebe hono hagasek welagik nen it ugun mene hasuk holilik hane higit mene igilogousak, a'nogo halenem it nen hat hano halogo haiko motok logogun." ⁸ A'nogo yogotukwa mene at Rehabeam wene a'nogo a'la wanilek herakesike ati. At nen apuni elegetek at ayalak inom higit salukwa mene eralue welaukwa a'monogo inoba hinala ebetep mene ake yogoni isike. ⁹ At Rehabeam nen it wene ake yogosigilogoluk, "An nopase nen it yabu wogosike mene apuni nen an noba yabu se mene halok wonisasak luk kino ega. Hat nen kinogo halusak agegen? An nen it wene oko konogo yosak?" ¹⁰ A'nogo isikomo ap elege at ayalak inom higit mene nen wene oko mel isukwa, "It nen at yogotilogolik, 'Hat hopase nen nit nenebe logousak oba titap hogo hinigilaike hake eperak higit hogo ninoba ekin bekin hogo wolok wagalago, ati nen nit ninala walok hat nen ekin mene ati se halogo hinan.' An nopase aloak makelak mene an neki seleget huko. ¹¹ An nopase nen hit ekin mene hinoba hike, mene at he an nen ekin mene ake inomat hinoba higin. An nopase nen hinogat lipik labak hogo ukum hinoba hike, mene at he an nen kalajengking oba ukum hinoba higin.''' ¹² Ineki henagan oba welaugasik ake oba, Yerobeam nen apuni inebe obogat lapukogo Rehabeam oba waukwa, inoe kain etage werek Rehabeam nen it yogosasike higit hogo hagalaike. ¹³ Ati oba at inoe kain etage werek Rehabeam en wene oko it yogosigilogolik ane uarek iskesik, it ap inaluetek en yinogo halusak iluk isukwa mene a'nogo halusak lek isike, ¹⁴ Nen it wene oko igilogolik eperak higit yekerugilak oban mene nen yino halusak, ega ati, "An nopase nen yabu ekin mene wonete, meneat he an nen ake inoman yabu ekin noba aga ati. An nopase nen nogat lipik labak hogo ukum noba hane, mene at he an nen hat hesik kalajengking oba ukum hoba higin.'' ¹⁵ Ati oba nen inoe kain etage werek apuni at mene nen kino ikenem asuk holilek heraksigilaike. Ninopase Etagepogot nen Yerobeam mene hesik abok isike mene higit asuagaluk wene yi halilek welaike, Nebat aput Ahia aua Silo men ati oba nen halaike. ¹⁶ Apuni Israel mene ineileken inoe kain etage werek Rehabeam lakasukwa mene it inane asuk holilek halelaike. Atiba nen it en inoe kain etage werek yogotilogolik, "Nit ninebe re Daud werek meneat akegen nogo a? keang Isai mene ake nit agoma werek nogo a? Lek! mare, apuni Israel mene yi sani, Daud aput nen apuni at mene hagasek logouak en nit he heraksaluk luok!" ¹⁷ Mene at he at Rahabeam ebe inoe kain etage werek oban hagalagilek logolik apuni Israel mene inebe miren hake mene o sili lopok o Yehuda welaukwa. ¹⁸ Rehabeam nen Hadoram ebe ukuloak halogo hilik yabu inawit werekolek ninghogo halini igilaike,atiba nen apuni Israel mene nen helep oba Hadoram watukwama ebe motok lauk hogo walaike. Atiba nen Rehabeam ebe hese o Yerusalem lasak hesik esok hagarek oba lagelik weim halarek mene oba lagesike. ¹⁹ Hagalaike ati oba nen pikit yogotak apuni Israel mene nen Daud wereke inom inaselei negen werek ati,'' iluk isike.