¹ Teguu' do anaan, Herodes, raja wilayah, ngering dengah-dengah tentang Jisus. ² Dahin, hia' duaan ha hamba-hamba na, "Ani ka Yohanes Pembaptis. Hia' au bangket man t' haang kelunaan mate dahin kenaan anaan na mukjizat-mukjizat ani' nyadi halam-Na." ³ Sebab, Herodes au nangkap Yohanes, ngatung hia', dahin mutaam hia' ha penjara kenaan Herodias, hawaan Filipus, harin Herodes. ⁴ Kenaan Yohanes kalaak duaan dahin na, "Jaan an d' gi laan man ika' jung hipun Herodias," ⁵ Dahin, meski pa Herodes ikam sang lemate Yohanes, hia' takut ha kelunaan kahum kenaan daha' nganggap Yohanes nekelung nabi. ⁶ Tapi, teguu' do ulang tahun Herodes atang, anaak doh Herodias ngaraang ha nang daha', dahin anaan na senaang kenaap Herodes, ⁷ sehingga hia' besumpah sang mai nun lim alang an doh anaan ake. ⁸ Maka, au an hinaan na pehigaak, doh anaan duaan, "Im ai na man akui tini', man Yohanes Pembaptis ha usun tapaan." ⁹ Meski pa raja sedih, tapi kenaan sumpah na dajin kenaan kelunaan-kelunaan alang kumaan peji dahin na, hia' pun nyuhu' jung hal anaan d' aii. ¹⁰ Hia' nyuhu' jung merung kuhung Yohanes ha penjara. ¹¹ Dahin, kuhung Yohanes an d' geri ha usun tapaan, d' aii man doh anaan dahin hia' geri hia' te ha hinaan na. ¹² Au hiti', murid-murid Yohanes atang, apii' lu'ung na, dahin ngubor ina'. Au hiti', daha' leka' dahin megii' man Jisus. ¹³ Teguu' Jisus ngering hal ani', Hia' leka' man tinaan dahin haruk, te ha nayaan alang lengiyo dap. Dahin, teguu' kelunaan-kelunaan ngering ani', daha' livoh-Hia' metek pano tudak man kota-kota. ¹⁴ Teguu' Jisus musaang, Hia' lemnang kelepang kelunaan, dahin masii' daha', dahin navaah pedaam daha'. ¹⁵ Teguu' do sang jelang malam, lim d' murid atang te ha Jisus au hiti' duaan, "Nayaan ani lengiyo dahin do au sang nahari malam. Nyuhu' na kelunaan ngahum anaan leka' te ha desa-desa au hiti' melek pengumaan man daha' dap." ¹⁶ Tapi, Jisus duaan ha daha', "Daha' jaan perlu u'ak. Ika', aii na daha' kumaan." ¹⁷ Daha' duaan dahin-Na, "T' tini' ita' jaan hipun nun-nun, kecuali 5 roti dahin 2 masik." ¹⁸ Dahin, Hia' duaan, "Gerii' na teranaan hini', ha' Akui." ¹⁹ Au hiti', Hia' nyuhu' kelunaan kahum anaan melok ha tun urok, dahin Hia' apii' 5 roti dahin 2 masik anaan, Au hiti' sambel lemnang ha langet, Hia' ngucap syukur dahin munaang-munaang roti anaan. Au anaan, Hia' mai ina' ha d' murid-murid-Na dahin ha kelunaan kahum. ²⁰ Dahin, lim daha' kumaan dahin d' ngebesoh. Au hiti', daha' apii' unaang-unaang alang sisa, te' pulu' dua' keragaak penuu'. ²¹ Dahin, daha' alang kumaan kira-kira te' 5.000 lake'-lake', jaan pa termasuk d' doh dahin d' nyaam. ²² Jisus pehigaak d' murid-murid-Na mutaam ha haruk dahin leka' unaak mau-Hia' ha dipah, jiarun Hia' nyuhu' kelunaan kahum anaan laap. ²³ Dahin, au Jisus nyuhu' kelunaan kahum anaan laap, Hia' mu'un ha usun ngalaang dap au hiti' sebayaang. Teguu' sang malam, Hia' dap ha hiti'. ²⁴ Tapi, haruk anaan au suu' man bahe', geraan lupaak kenaan belawan dahin dii'. ²⁵ Dahin, teguu' jam kepaat malam anaan, Hia' atang ha daha', pano ha usun ata'. ²⁶ Teguu' lim d' murid lemnang-Hia' pano ha usun ata', daha' pun takut pate au hiti' pebukaak, "Anaan tok!" Au hiti', daha' pebukaak-pebukaak kenaan takut. ²⁷ Tapi, Jisus temoh duaan ha daha', dahun-Na, "Im naje' na kenaap ka! Ani' Akui, am takut.'' ²⁸ Dahin, Petrus duaan dahin-Na, ''Tanangaan, ha' anaan Ika', suhu' na akui atang ha-Ika' ha usun ata'.'' ²⁹ Jisus duaan, "Atang na!" Maka, Petrus musaang man haruk, dahin pano ha usun ata', dahin atang ha Jisus. ³⁰ Tapi, teguu' lemnang dii, hia' takut au hiti' nahari ngenee. Hia' bukaak, ''Tanangaan, selamat im akui!" ³¹ Jisus temoh mai usuu'-Na, mekam Petrus, au hiti' duaan, "Ika' alang kurang iman, na nun pa ika' ragu-ragu?" ³² Teguu' daha' mutaam ha halam haruk, dii pun ngeraam. ³³ Au hiti', daha' alang te' ha haruk menyembah Jisus dahin duaan, "Alang sebenar na, Ika' naan Anaak Tipang!" ³⁴ Au lavaat, daha' atang ha tanaa' Genesaret. ³⁵ Teguu' kelunaan-kelunaan ha nayaan anaan jaam-Hia', daha' megi man lim daerah anaan au hiti' geri pah kelunaan alang medaam ha Jisus. ³⁶ Daha' ake' asii' ha Jisus jung ikam nyentuh ujung hakaw-Na, dahin pah kelunaan alang nyentuh ina' jadi sayuu'.