¹ Teguu' do anaan, Jisus pano lalo luma' gandum teguu' do Sabat,, dahin kumaan ina'. ² Tapi, teguu' kelunaan-kelunaan Farisi nyinang hia', daha' duaan dahin-Na, "Lemnang, murid-murid-Ka na nun alang jaan da' laan jung d' na t' do Sabat." ³ Tapi, Jisus duaan dahin daha', "Jaan p' ika' kalaak basa nun alang an Daud na teguu' hia' dahin lim alang livoh hia' la'o? ⁴ nuno na tun hia' mutaam halam Umaa' Tipang dahin kumaan roti persembahan alang jaan d' na laan man-Hia' jung kumaan ina', nunaan pa man kelunaan-kelunaan alang peji dahin na, kecuali hanya man lim imam? ⁵ Atau, jaan pa ika' kalaak basaa halam Hukum Taurat, bahwa teguu' do Sabat, lim d' imam ha' Bait Tipang ngelanggar Sabat dahin daha' jaan te' salaa'? ⁶ Tapi, Akui duaan dahim bahwa alang lebih tayaa' man Bait Tipang te' t' tini'. ⁷ Tapi, ha' ika' au jaa, arti na ani': 'Akui nyuhu' belas asii' dahin bukan persembahan', ika' jaan kalaak ngehukum alang jaan te' salaa'. ⁸ Sebab, Anaak Manusia hia' ti' Tanangaan usuun do Sabat." ⁹ Au leka' man hiti', Jisus atang ha' sinagoge daha'. ¹⁰ Nyinang, te' ji kelunaan lake'-lake' alang lumpuh usuu' behenji na. Dahin, daha' metang ha' Jisus, dahun daha', "Apakah an da gii laan ha' navaah teguu' do Sabat?" hujung daha' hamaan pesalaa' Jisus. ¹¹ Au hiti', Hia' duaan dahin daha', "Hi kelunaan na man p'lo alang hipun ji ikoh domba, dahin ha' domba anaan legaak ha' halam luvaang teguu' do Sabat, jaan kah hia' sang api' ina' dahin musaang ina'? ¹² Betapa suu' na nilai manusia man domba! Kenaan anaan, d' gi laan na alang sayu' t' do Sabat." ¹³ Au hiti', Jisus duaan dahin kelunaan anaan, "Im ulur na usuu' ka." Kelunaan anaan mai usuu' na dahin an na navaah sepenuh na nekelung usuu' na alang balee. ¹⁴ Tapi, kelunaan-kelunaan Farisi leka' man tinaan dahin bersekongkol ngelawan Hia', nuno tun daha' hamaan lemate-Hia. ¹⁵ Tapi, Jisus, teguu' jaam hal ani', laap man hiti'. Kahum alang livoh-Hia' dahin Hia' navaah lim daha' pah, ¹⁶ dahin duaan daha' jung jaan na diri-Na d' jaam. ¹⁷ Hal ani' terjadi jung menggenapi nun alang d' gii lalo man Nabi Yesaya: ¹⁸ "Lemnang im, hamba-Kui alang au Ak pili', alang Ak kasihi, alang ha'-Hia' beruaan-Kui ikam. Akui sang metee roh-Kui ha' usun-Na, dahin Hia' sang mai keadilan man bangsa-bangsa bale. ¹⁹ Hia' jaan akan ngelawan, atau pebukaak, dahin jaan akan te' ji kelunaan pun alang ngering dahun-Na ha' alaan-alaan. ²⁰ Buluu' alang punaang jaan akan Hia' munaang, dahin subuh alang sang param jaan akan hia' lemate, atang Hia' na' keadilan menang, ²¹ dahin halam araan-Na, bangsa-bangsa bale sang beharap." ²² Au hiti' ji kelunaan alang putaam roh ja'ak, alang buta dahin bisu, d' geri ha' Jisus. Dahin, Jisus navaah hia' sehingga kelunaan alang buta dahin bisu anaan duaan dahin nyinang. ²³ Lim kelunaan pah jadi hiran-hiran dahin metang, "Mungkinkah Hia' ani' Anaak Daud?" ²⁴ Tapi, teguu' kelunaan-kelunaan Farisi ngering hia' daha' duaan, "Kelunaan ani' jaan mungkin mugaa' roh-roh ja'ak ha' jaan dahin Beelzebul, pemimpin roh-roh ja'ak." ²⁵ Jisus jaam kenaap daha' dahin duaan ha' daha', "Putung umaa' kerajaan alang biang-biang ngelawan diri na dap, an d' laak. Dahin, putung kota atau umaa' alang biang-biang ngelawan diri na dap, jaan akan betahan. ²⁶ Dahin, ha' Iblis mugaa' Iblis, hia' terpecah-pecah ngelawan diri na dap. ha' nunaan, nuno tun kerajaan na sang betahan? ²⁷ Dahin, ha' Akui, mugaa' roh-roh ja'ak dahin Beelzebul, dahin hi lim anaak-anaak ka mugaa' daha'? Kenaan anaan, daha' sang jadi hakim ka. ²⁸ Tapi, ha' dahin Roh Tipang, Akui mugaa' roh-roh ja'ak, Umaa' Tipang au atang usuun p'lo. ²⁹ Atau, nuno tun ji kelunaan hamaan mutaam ha' umaa' alang naje' dahin api' gat-gat na ha' hia' jaan ngatung kelunaan naje' anaan lebih unaak? Au hiti', hia' maring nako umaa' anaan. ³⁰ Hi lim alang jaan peji Dahik, ngelawan Akui. Dahin, hi lim alang jaan mehengkung peji Dahik, petasaak-tasaak. ³¹ Kenaan anaan, Akui duaan ha' ika' bahwa putung dusa dahin dahun kelunaan sang d' apon, tapi dahun man Roh jaan sang d' apon. ³² Dahin, hi lim alang duaan gat alang ngelawan Anaak Kelunaan sang d' ai apon, tapi hi lim alang duaan ngelawan Roh Kudus jaan sang d' ai apon, sayu man do ani' maupun do alang sang atang." ³³ "Ha' kayo' anaan sayu', buaa na pun sayu'. Atau, ha' kayo' anaan jaan sayu', buaa na pun jaan sayu'. Sebab, kayo' an d' jaam man buaa na. ³⁴ Hai, anaak ular beludak, nuno pa ika' alang ja'ak duaan gat-gat alang sayu'? Kenaan man kenaap, ba hamaan duaan. ³⁵ Kelunaan sayu' musaang gat-gat alang sayu' man jayaa' na alang sayu' dahin kelunaan ja'ak musaang gat-gat alang ja'ak man jayaa' na alang ja'ak. ³⁶ Tapi, Akui duaan dahim, bahwa putung daho' alang sia-sia, alang kelunaan duaan, daha' sang mempertanggung-jawabkan ina' teguu' do penghakiman. ³⁷ Kenaan man dahum, ika' sang d' gi laan, dahin man dahum, ika' sang d' hukum. ³⁸ Au hiti', te' kuri ahli Taurat dahin kelunaan Farisi duaan dahin Jisus, "Guru, kame' ikam lemnang inaa man-Ika'." ³⁹ Tapi, Jisus nyuee dahin duaan dahin daha', "Generasi alang ja'ak dahin berzina ani' nuntut gat inaa. Dahin, jaan sang te' inaa alang an d' ai man daha', kecuali inaa Nabi Yunus. ⁴⁰ Sebab, nekelung Yunus alang te' ha' halam butit masik ayaa' selama telog do dahin telog malam, nuti lim pa Anaak Kelunaan sang te' selama telog do dahin telog malam halam butit tanaa'. ⁴¹ Kelunaan-kelunaan Niniwe sang nekring peji dahin generasi ani' t' do penghakiman dahin sang ngehukum hia' sebab daha' betubat teguu' au ngering khotbah Yunus. Dahin, lemnang, alang lebib tayaa' man Yunus te' ha' tini'. ⁴² Ratu man selatan sang biti' peji dahin generasi ani' t' do penghakiman dahin sang ngehukum hia' kenaan hia' atang man ujung bumi sang ngering hikmat Salomo. Dahin, lemnang, alang lebih tayaa' man Salomo te' ha' tini'. ⁴³ "Teguu' roh ja'ak musaang man kelunaan, hia' lalo nayaan-nayaan alang jaan ngeata' sang t' pelip nayaan ngelae, tapi jaan habung ina'. ⁴⁴ Au hiti', hia' duaan, 'Akui sang nekulah ha' umaa' kui, nayaak musaang.' Dahin, teguu' atang, hia' lemnang umaa' anaan guhaang, au an d' paa, dahin ma'ang. ⁴⁵ Au hiti', roh ja'ak anaan liung dahin gerii peji dahin na tusuu' roh bale alang lebih ja'ak man hia', dahin daha' mutaam serta melaak ha' hiti'. Akhir na, keadaan kelunaan anaan jadi suu lebih ula' man sebelum na. Nuti pa alang sang jadi dahin generasi alang ja'ak ani'." ⁴⁶ Jiarun Jisus masih duaan dahin kelunaan kahum, lemnang, hinaan dahin d' harin-harin-Na nekring ha' luar, usaha sang duaan dahin-Na. ⁴⁷ Ji kelunaan duaan dahin-Na, "Lemnang, hinaam dahin d' harim nekring ha' luar, usaha duaan Dahim." ⁴⁸ Namun, Jisus nyuee kelunaan alang megi man-Hia' naan dahin duaan, "Hi kah Hinaak dahin hi kah Daharik?" ⁴⁹ Dahin, sambil nuto usuu'-Na ha' arah murid-murid-Na, Jisus duaan, "Ani' lah Hinaak dahin Daharik! ⁵⁰ Kenaan hi pun alang na suhuu' Ame-Kui alang ha' telaangjulaan, hia lah Harik alang lake', Harik alang doh, dahin Hinaak."