¹ Teguu' jima' na', Jisus te ngeliling ha' kuta-kuta dahin desa-desa jung mai daho' dahin megi' Injil Kerajaan Tipang. Puluu' dua' rasul te' peji' dahin Hia', ² nunan pun kuri' dooh alang au ga' sayuu' kan Jisus man lim roh-roh ula' dahin lim pedam. Ha' antara daha' ti' Maria, alang ga' uvi' Magdalena, alang ga' bebaskan Jisus man tusu' roh ula'. ³ Te' pun Yohana hawaan dooh Khuza bendahara Herodes, Susana, dahin masih ngahum ngua' dooh bale na' alang mete' kekayaan daha' dap jung mendukung Hia'. ⁴ Teguu' kalunaan bangu' bekumpul dahin d'kalunaan man berbagai kuta atang ta' Jisus, Hia' duaan ta' daha' dahin ji' bua' perumpamaan: ⁵ "Ji' kalunaan petani te menabur benih. Teguu' hia' menabur, te' bagian alang lega' ha' pinggir alaan dahin ga' ngaja'-ngaja', serta ga' kuman d'manuk ha' di. ⁶ Sebagian ngua' lega' ha' husun ngayan bato', dahin teguu' benih anan mulai tumbuh, benih anan jadi kering kenan jaan te' ata'. ⁷ Sebagian bale na' lega' ha' tebelua' semak duri' dahin tumbuh peji' hia' atang semak anan nyekek hia'. ⁸ Sisa benih alang bale na' lega' ha' tana' alang subur dahin betumbuh atang mai hasel matu kali lipat ngahum na'." Au mengakhiri perumpamaan anan Jisus pebuka', "Hia' alang hipun apang jung ngering, hendak na' ngering nah sayuu'-sayuu'!" ⁹ Au anan, d'murid Jisus metang ta' Hia' tentang arti man perumapamaan anan. ¹⁰ Hia' duaan, "Ta' ika' ga' ai daho' rahasia Kerajaan Tipang, tapi ta' kalunaaan bale ga' ai daho' perumpamaan sebe, 'Ji' kalipun nginang, daha' jaan nginaang, dahin ji' kalipun ngering, daha' jaan jaam."' ¹¹ Ani' nah arti perumpamaan anan: "Benih anan firman Tipang. ¹² Benih alang lega' ha' pinggir alaan anan daha' alang ngering firman Tipang. Au anan, atang nah sitan dahin api' firman anan man kenap daha' sebe daha' jaan pesaya' dahin ga' selamatkan. ¹³ Benih alang lega' ha' husun tanaa' bebato' d'kalunaan alang ngering firman Tipang dahin menerima' ina' dahin sukacita, tapi jaan berakar. Daha' hanya pesaya' aki', tapi teguu' kesulitan atang, daha' temoh berbalik man Tipang. ¹⁴ Benih alang lega' ha' antara semak berduri' d'kalunaan alang ngering firman Tipang, tapi jaruun daha' bertumbuh, daha' ga' sekek ta' rasa khawatir, kekayaan, serta heling urip atang daha' na' hasel bua' alang sak. ¹⁵ Sedangkan benih alang lega' ha' tanaa' alang subur anan d'kalunaan alang ngering firman Tipang dahin melo' ina' halam kenap alang jujur dahin sayuu', serta bebua' halam ketekunan." ¹⁶ "Jaan te' ji' kalunaan pun alang au murip pelita, au anan mekap ina' dahin gantang atau melo' ina' ha' hida' ngayan tudu'. Sebalik na', hia' sang melo' pelita anan ha' husun tudaa' pelita sebe kalunaan alang mutam ha' halam uma' haman nginang malah na'. ¹⁷ Kenan, jaan te' hal alang ga' huk alang jaan ga' nyatakan, dahin jaan te' rahasia alang jaan sang ga' ungkap dahin ga' geri' ta' malah. ¹⁸ Kenan anan, nginaang nah nuno' ika' ngering kenan hi' alang hipun sang ga' ai ngahum ngua'. Tapi, hi' alang jaan hipun, man hia' sang ga' api', bahkan nun alang hia' kira hia' hipun." ¹⁹ Lalo, hinaan dahin harin-harin Jisus atang pehina'-Hia', tapi daha' jaan haman jelang-Hia' kenan kerumunan kalunaan. ²⁰ Jadi, ga' gi' nah ta'-Hia', "Hinaan dahin harin-harin-Ka' tengaah nekering ha' hawa', daha' ikam pehina dahin Ika'." ²¹ Tapi, Jisus nyuee daha', "Hinaan-Kui dahin harin-harin-Kui daha' alang ngering firman Tipang dahin na' ina'." ²² Teguu' ji' do, Jisus mu'un ha' halam haru' peji' d'murid-Hia' dahin Hia' duaan ta' daha', "Te nah ita' lawat ha' sisi bale man danum ani'." Maka, te nah daha' ha' seberang. ²³ Namun, teguu' daha' berlayar, Jisus tetudu'. Lalo, ngehar nah di nyawan ha' danum anan dahin haru' daha' ga' mutam ata' atang daha' te' halam bahaya. ²⁴ Au anan, lim murid atang ta' Jisus dahin maur kan-Hia' sambel duaan, "Guru! Guru! Ita' sang binasa!" Lalo, Jisus pun maur dahin ngebentak di nyawan anan serta gelumbang alang bergelora anan. Di nyawan anan pun berhenti dahin danum anan jadi tenang. ²⁵ Dahin, Hia' duaan ta' daha', "Ha' hino' kah iman ka?" Daha' jadi takut dahin hiran sambel duaan ji' ta' alang bale, "Hi' kah Kalunaan ani'? Hia' bahkan mai perintah ta' di dahin ata', dahin daha' mematuhi-Hia'." ²⁶ Lalo atang nah Jisus dahin d'murid-Na' ha' wilayah kalunaan Gerasa, ha' seberang Galilea. ²⁷ Teguu Jisus ngileh ha' darat, Hia' ga' pehinaa' ji' kalunaan lake' man kuta anan alang ga' mutam roh-roh ula'. Kalunaan anan au dara' jaan mete' basung dahin jaan mela' ha' uma', melainkan ha' kuburan. ²⁸ Teguu' kalunaan anan nginaang Jisus, hia' pun pebuka' dahin sujud ha' nang-Hia'. Dahin dahun alang nyaring hia' duaan, "Nun kah urusan Ika' dahin akui, hai Jisus, Anaa' Tipang Alang Bo? Aku muhon ta'-Ika', am nyiksa akui!" ²⁹ Gat anan jadi kenan Jisus nyuhuu' roh ula' anan musang man kalunaan anan. Sitan anan pegin mihir-mihir kalunaan anan atang hia' ga' rantai, ga' borgol, dahin ga' jaga kalunaan, tapi hia' haman ngebutat rantai na' dahin ga' geri' sitan ha' ngayan-ngayan alang sepi. ³⁰ Au anan, Jisus metang ta' kalunaan anan, "Hi' araan ka'?" Sue kalunaan anan, "Legion" kenan te' ngahum sitan alang ngemutam hia'. ³¹ Sitan-sitan anan ake muhon ta'-Hia' sebe Hia' jaan nyuhuu' daha' jung te ha' jurang maut. ³² Ha' ngayan anan, te' sekawanan taya' bavi alang tengaah ilo kuman ha' bukit. Sitan-sitan anan ake muhon ta' Jisus jung nyebe daha' mutam ha' halam kawanan bavi anan, dahin Jisus mengizinkan daha'. ³³ Maka, sitan-sitan anan pun musang man kalunaan anan dahin mutam ha' halam bavi-bavi, lalo kawanan bavi anan te liung ngileh lereng bukit alang curam te ha' danum dahin tenggelam. ³⁴ Teguu' lim penggembala bavi nginaang na', daha' ngeliung diri' dahin megi' kejadian anan ha' kuta dahin ha' kampong sekitar na'. ³⁵ Jadi, kalunaan bangu' atang jung nginaan nun alang terjadi. Daha' atang ta' Jisus dahin kela' kalunaan anan au ga' bebaskan man sitan-sitan anan tengaah melo' ha' jelang tudaa' Jisus, au mete' hakaow, dahin au waras pikiran hia'. Gat ani' na' daha' ketakutan. ³⁶ Daha' alang nginaang kejadian anan megi' ta' kalunaan bale nuno' kalunaan alang ga' mutam sitan anan ga' sayuu' kan. ³⁷ Lalo, lim kalunaan alang mela' ha' daerah sekitar Gerasa ake Jisus jung mela' kan daha' kenan daha' ga' cekam ta' ketakutan alang taya'. Kenan anan, Jisus mu'un ha' haru' dahin nekulah ha' Galilea. ³⁸ Tapi, kalunaan alang au ga' bebaskan man sitan-sitan anan muhon ta' Jisus sebe hia' haman peji dahin Jisus. Namun, Jisus nyuhuu' hia' te, kurin-Hia', ³⁹ "Lap nah ha' uma' ka' dahin gi' nah gat-gat alang au Tipang na' ta ika'." Kalunaan anan pun leka' ha' lim penjuru kuta dahin megi' nun alang au Jisus na' ta' hia'. ⁴⁰ Teguu' Jisus nekulah ha' Galilea, kalunaan bangu' menyambot-Hia' kenan lim daha' au kave-Hia'. ⁴¹ Ha' tinan te' ji' kalunaan araan Yairus alang atang ta' Hia', hia ji' kalunaan kepala sinagoge. Sambel sujud sembah ha' tudaa' Jisus, Yairus muho sebe Hia' atang ha' uma' na', ⁴² kenan hia' hipun ji' kalunaan anaa' dooh tunggal alang kira-kira umor na puluu' dua' duman, dahin anaa' anan sang mate. Dahin teguu' Jisus te ha' tinan, kalunaan bangu' berdesak-desakan ha' sekeliling-Hia'. ⁴³ Ha' tinan te' ji' kalunaan dooh alang au menderita pendarahan bahat atang 12 duman, jaan te' ji' kalunaan pun alang haman na' hia' sayuu'. ⁴⁴ Dooh anan jelang Jisus man la'ung dahin mekam ujung jubah-Hia', maka takjat anan pun pendarahan na' berhenti. ⁴⁵ Lalo, Jisus duaan, "Hi' alang mekam-Akui?" Kenan lim kalunaan menyangkal, Petrus duaan, "Guru, kalinaan bangu' ngumpol ha' sekeliling-Ka' dahin berdesak-desakan dahin-Ika'!" ⁴⁶ Tapi, Jisus duaan, "Ji' kalunaan mekam-Akui kenan Akui ngerasa te' kuasa alang musang man Akui." ⁴⁷ Teguu' dooh anan nginang bahwa hia' jaan haman muhu' diri', hia' atang ta' Jisus dahin ngedar dahin bersujud ha' nang-Na'. Ha' nang lim kalunaan, hia' megi' na' nun hia' mekam Jisu, dahin nuno' hia' dahin takjat na' haman ga sayuu' kan. ⁴⁸ Au anan, Jisus duaan ta' hia', "Anaa'-Kui, iman ka' au na' sayuu' ika'. Te nah halam damai sejahtera." ⁴⁹ Teguu Jisus masih duaan, ji' kalunaan man uma' kepala sinagoge anan atang dahin duaan ta' Yairus, "Anaa' dooh ka' au mate. Am ngua' merepotkan Guru." ⁵⁰ Tapi, ngering gat anan Jisus duaan ta' Yairus, "Am takut. Pesaya' tua' anaa' ka' sang selamat." ⁵¹ Teguu' Jisus atang ha' uma' Yairus, Hia' jaan nyuhuu' hi' pun mutam peji'-Hia' kecuali Petrus, Yohanes, Yakobus, serta taman dahin hinaan anaa' anan. ⁵² Lim kalunaan nangi dahin meratapi anaa' dooh, tapi Jisus duaan, "Am nangi, hia' jaan mate tapi tudu'." ⁵³ Kalunaan bangu' anan pun kesing ta' Hia' kenan daha' jaam anaa' dooh anan au mate. ⁵⁴ Tapi, Jisus mekam usu' anaa' anan dahin muvi' hia', "Maur nah, naa'!" ⁵⁵ Maka, nekulah roh anaa' anan takjat anan pun hia' nekering. Lalo Jisus nyuhuu sebe anaa' anan ga' ai gat jung hia' kuman. ⁵⁶ Dawa' taman dahin hinan anaa' anan pun takjub, tapi Jisus jaan nyuhuu' daha' jung megi' hi' pun tentang nun alang au terjadi.